Faatomuaga Uigā
1 Pe a auai i le galuega mai lea fale ma lea fale, ua lē utuva ona tatou fesagai ma le fesili, “O le ā laʻu uluai tala o le a fai.” Ua ofoina mai e tagata talaʻi agavaa o ē masani ona maua iʻuga lelei i le auaunaga i le fanua le lasi o faufautuaga aogā. O ā nisi o na?
2 Muamua, e tāua ona ia naunau faamaoni i tagata o ē tatou te talanoa. O sea naunau totino e faataʻitaʻia mai lea i upu ma gaoioiga. E tāua foi ona tāea i manatu le taofi o lē ona le fale. Siligia ni fesili talafeagai ma ia faalogologo ma le faaeteete i lana tali mai. I mea uma lava, e tatau ona tatou taumafai e fesoasoani i lē ona le fale e tagai pe mafai faapefea ona aogā totino ia te ia le iloiloina o le mataupu o loo tatou talanoaina.
ILOILO O LATOU TAOFI
3 A o molimau Iesu i le fafine Samaria i se vaieli e lata ane i Sukara, sa salaese nisi o ana faaupuga i le faalogo a le fafine. Sa lē ōgatasi ma ona manatunatuga po o le ala sa ia tapuai ai. Na faalogologo ma le faaeteete Iesu, ma ina ua tali atu, sa ia tāea i manatu le mea na ia taʻua. Sa ia finagalo e fesoasoani ia te ia. (Ioane 4:13, 14, 19-26) Pe o tatou taumafai e mulimuli i le faaaʻoaʻoga a Iesu i lenei vala a o tatou auai i le galuega molimau?
4 Afai e tali mai tagata o lau oganuu i au upu amata faapea, “Ua iai laʻu lava lotu,” o le ā e te ono faia? Ua taʻua e se tusitala o le Tusi Paia: “E manatunatu le loto o lē amiotonu, ina ia fai se tali.” (Faata. 15:28) Pe e te faia lena? Pe ua e iloiloina le faamatalaga i itulau e 18-19 o le tusi Reasoning faatasi ma le manatu autu o lenei mau i le mafaufau? E mafai foi ona tou galulue faatasi ma tagata talaʻi o ē e uigā i le auaunaga i le fanua ina ia aʻoaʻoina ai pe faapefea ona faia au upu tomua ia sili ona uigā.
5 I vaipanoa e toatele ai tagata e faaaogāina le teteega faapea ua iai a latou lava lotu, atonu o le a e iloa le aogā o le muai silafia o ō latou manatu ma lagā muamua ai le mataupu. Mo se faaaʻoaʻoga, pe a maeʻa sina faafeiloaiga amata, e te ono faapea atu: “Pe e iai sa outou lava tapuaiga? [Faalogo i la latou tali.] Ou te manatu o lea auā o le toatele o tagata i lenei vaipanoa ua iai. Peitai, o le mafuaaga o loʻu asiasi mai i lenei taeao o le . . .” Ona faaauau lea o le mataupu e te manao e talanoaina.
6 Afai e toatele tagata o aiga e faapea mai, “Ou te pisi,” e mafai ona e filifilia se tasi pe sili atu ni manatu ua faamatalaina i itulau e 19-20 o le tusi Reasoning ma fetuunai ai i latou i le manaoga o lau oganuu. O le faaeseese o nei faamatalaga e ono faaaogā i le talitalia o teteega e masani ona taia i le faalogo.
FAAAOGAINA FAATOMUAGA MAI LE TUSI REASONING
7 E toatele ua latou maua taunuuga lelei i le faaaogāina o faatomuaga i itulau e 9-15 o le tusi Reasoning. O le a e mātauina ua iloiloina e ia mataupu o loo taatele ona popole iai tagata, e pei o mea tutupu i le taimi nei, saogalemu totino, galuega, fale, olaga i le aiga, ma le lumanai. Peitai, ia mātau foi o le faaupuina o faatomuaga ua fautuaina i le tusi Reasoning o loo valaaulia ai lē ona le fale e folasia ia lava. E fesoasoani ia te ia e iloa le tāua o le mataupu na aaoina ma lona aafia totino ai. O le faaaogāina ma le uigā o nei faatomuaga atonu e taofia ai lē ona le fale mai le faaaogā o nisi o teteega masani.
8 Ia mafaufau ma le faaeteete i faatomuaga e te talitonu o le a sili ona uigā i lau oganuu. Aʻoaʻo e faaaogā faatomuaga i le tusi Reasoning. Ia maua aogā mai le agavaa o isi tagata talaʻi. Tatalo mo faamanuiaga a Ieova i au taumafaiga. Faatasi ma taumafaiga sogasogā ma faamanuiaga a Ieova, atonu o le a toatele ni tagata i lau oganuu o le a tali mai ma le fiafia i le tala lelei o le faaolataga.