Faatomuaga e Faagaeeina ai le Naunau
1 Sa matuā tomai lava Iesu i lona faaaogāina o faatomuaga. Pe talanoa atu i se vaega toatele po o se tagata e toatasi, na mafai lava e Iesu ona faatosina mai manatu o lana aofia e ala i le faaaafia totino ai o i latou. Na ia faailoa atu i ē sa faalogologo ia te ia le aogā o lana mataupu.—Mata. 5:3-12; Ioane 4:7-30.
2 Manaomia Sauniuniga Mamao: Ina ia faagaeeina le naunau i la tatou feau, e manaomia ona fai fuafua a tatou faatomuaga ina ia faaaafia ai le tagata, faafesootai ma ona popolega, ma faaalia ai o le a fesoasoani le feau o le Malo ia te ia lava.
3 I sauniuniga mo le faiva, ia autalu mea o loo popole i ai tagata o le nuu i le taimi nei. Pe na tosina atu ea manatu o tagata uma i tala mai faasalalauga na faia talu ai nei? O le ā se mea e naunau i ai se tagata talavou? Se tagata matua? I tane, avā, po o mātua? Na i lo o le faaaogāina o se faatomuaga e tasi i fale taitasi, e masani lava ona sili atu le uigā o le sauniunia o ni nai faatomuaga eseese, ma ia sauni e fetuutuunai a o e matauina le tali mai a tagata o aiga. Sa taulau manuia nisi o tagata talaʻi i le sauniunia, ma le faaaogāina o faatomuaga eseese mai le tusi Reasoning i taimi taitasi latou te ō ai i le faiva i lea fale ma lea fale. (rs itu. 9-15) O lea ua faafouina ai ma faaofosia ai pea le naunau i a latou faatomuaga.
4 I le masina o Aokuso, atonu e te manao e faaaogāina se taulimaga e pei o lea:
◼ “Talofa. Sa matou talatalanoa ma nisi o tuaoi e faatatau i ni uiga latou te fia vaaia i se tagata na te puleaina isi. Pe e mafai ona ou fesili atu po o ā ni uiga, e tasi pe lua e te manatu e sili atu ona tāua? [Faataga mo se tali. Amanaia ona manatu. Ioe i ai pe afai e talafeagai.] Pe e te silafia o loo faamatalaina e le Tusi Paia agavaa o Lē ua faamaonia e avea ma pule o le fanau a tagata? O loo maua i inei i le Isaia 9:6, 7. [Faitau.] Faamata o le ā sou manatu i le auala o le a ola ai i lalo o se pule faapena?” Faataga mo se tali, ona tataʻi atu lea o manatu i le Salamo 146:3, 4 ma le mataupu o loo i le tusi Reasoning, itulau e 153-154 e faatatau i le uiga e faamautinoa ai le pulega a Iesu. Pe e mafai foi ona faaaogā le tusi Ola e Faavavau, itulau e 112 ma le 113, e faagaee atili ai se isi talanoaga. Afai e matauina le naunau faamaoni, atonu la o le a e manao e ofo i ai le lomiga.
5 Afai tou te talatalanoa ma ni tagata tausi aiga, e mafai ona aogā tele i ai le taulimaga o loo mulimuli mai pe a faatomuaina le tusi Ola e Faavavau.
A uma se faafeiloaiga masani, atonu e te faapea atu:
◼ “Po ua e matauina ea o loo aumaia e omiga ma faafitauli i lea aso ma lea aso se luʻi moni i aiga i aso nei? [Faataga mo se tali.] E te manatu ea o fea e mafai ona liliu atu i ai aiga mo se fautuaga poto? [Faataga mo se tali.] Ua matou faasinoina atu manatu i le mea o loo fai mai ai le Tusi Paia e uiga i lenei mataupu. Matau foi le mea na fetalai atu ai Lē na amataina le faaipoipoga i le uluai ulugalii.” Faitau le Kenese 1:28 ona suʻe lea i le itulau e 238 i le tusi Ola e Faavavau, ma faaauau ai le lua talanoaga, i le faaaogāina o ni manatu e filifilia mai i le mataupu e 29.
6 I le faataʻitaʻi i auala a Iesu e faatosina mai ai le naunau ma le faaaafia ai o ē faalogologo i talanoaga, tatou te faaalia atu ai i ē loto faamaoni le aogā o mea faaleagaga.