Galulue i Oganuu e Galueaiina Soo
1 Tatou te fiafia i lipoti o loo mauaina mai e faapea, e tele faapotopotoga o loo galueaiina soo a latou oganuu. (Mata. 24:14; 1 Timo. 2:3, 4) E ui lava o lenei mea e aumaia ai se luʻi tutasi, ae ua faaalia i mea e tutupu le mafai ona faafetaiaia ma le manuia lea tulaga, pe afai tatou te sauniuni lelei ma faaauupegaina i tatou e fesagai ma tulaga eseese e tulai mai.
2 O Faatomuaga Uigā o Ki Ia: E tāua tele le sauniuni e faaaogā se faatomuaga ua lelei ona mafaufauina, e tasi pe sili atu. E ao i na faatomuaga ona aofia ai ni faamatalaga malamalama e faamanino ai mafuaaga tāua o a tatou asiasiga fai soo.
3 Ua aumaia e le tusi Reasoning le tele o faataitaiga lelei o faatomuaga fetaui e faaaogā. E tolu faatomuaga o loo lisi mai i le itulau e 15 i lalo o le ulutala “I Oganuu e Masani ona Galueaiina.” Faataitai faatomuaga e te manao e faaaogā i lau oganuu.
4 Ua taulau ma le manuia nisi tagata talaʻi i le faaaogāina o ni mea e tutupu o loo taʻua i nusipepa a o latou lava atunuu e amata ai ni talanoaga i oganuu e galueaiina soo. Ua iai i le tusi o le Reasoning ni faataitaiga se tolu o auala e mafai ona faia ai lenei tulaga. Iloilo le faatomuaga lona lua i lalo o le ulutala “Solitulafono/Saogalemu” i le itulau e 10, ma uluai faatomuaga e lua i lalo o le ulutala “Mea e Tutupu” i le itulau e 10 ma le 11.
5 Faatomuaga E te Sauniunia: Ia saoloto e fafau aʻe ma faaaogā ni faamatalaga fetaui o faatomuaga e tutusa ma na o loo faatulaga mai i le tusi o le Reasoning. Faamatala i au lava upu ma le tulaga e te masani ai. E mafai ona e faataitaia i se tagata talaʻi ua lava le tomai a o leʻi faaaogāina i le fanua.
6 Mo se faaaoaoga, atonu e te fai atu se faamatalaga faapenei:
◼ “Talu mai la ma asiasiga ia te oe i le vaiaso ua mavae, [taʻu se mea o tupu i lou vaipanoa o loo talanoa i ai tagata]. Ona o le toatele lava o i tatou o loo aafia uma i lena tulaga, ua faaalia ai e le toatele o o tatou tuaoi le manatu mamafa i lena mea. Atonu foi ua e tau manatunatu i ai. [Mapu teisi ma faatali se tali mai.] I le vaai atu i tulaga o le lalolagi i aso nei, pe e te lē ioe ea i le mea na tusia e le perofeta o Ieremia i le Ieremia mataupu e 10 fuaiupu e 23? Pe a uma ona faitau le mau, fesili atu i le tagata e ona le fale mo ni ona manatu, ona tatai lea o manatu i se mau patino o loo faaalia ai le auala o le a foia ai e Ieova le faafitauli patino o loo talanoaina.
7 Pe e te fai atu foi:
◼ “E lē taumate sa e matauina i tala i le taeao nei [taʻu se mea patino na tupu]. Atonu e te ioe o lenei mea e aafia uma ai lava i tatou. [Mapu teisi mo se tali mai.] E mafai ona tatou faamoemoe i faiga malo latou te aumaia se fesoasoani mo se taimi puupuu; ae ua faaalia e le Tusi Paia le auala o le a foia ai e faavavau le faafitauli.” Tatai manatu i se mau patino ua faamatala ai le mea o le a faia e le Atua.
8 “Aisea Tou te Asiasi Soo mai Ai?” O tali fetaui i lenei fesili e ono taofia ai le talanoaga, o loo aumaia i le tusi o le Reasoning i le itulau e 20 i lalo o le ulutala “Aisea Tou te Asiasi Soo mai Ai?” E tusa lava pe e lē fesili mai tagata, ae e mafai lava ona tatou avatu se molimau lelei pe afai tatou te faaaogāina so o se avanoa talafeagai e fesoasoani ai i isi ina ia talisapaia lo tatou alofa moni i le Atua ma tuaoi, lea ua uunaia ai i tatou e asiasi soo atu i se tele e mafai ai. E mafai ona faamaonia le matuā aogā i lenei tulaga o le talanoaina o upu a Iesu i le Ioane 21:15-17.
9 Seʻi o tatou faaauau pea ona fesagaia le luʻi o le galulue i oganuu e galueaiina soo, seʻi oo ina fetalai mai Ieova, ua lava. E ala i lenei maumauai, ua mafai ai ona tatou mautinoa lana taitaiga, lana puipuiga, ma ana faamanuiaga i le taimi nei seia oo i le gataaga.—Mata. 28:19, 20.