Fesoasoani i Isi a o Auai i le Auaunaga i le Fanua
1 E mai lava i lona amataga, ua avea ai le faapotopotoga Kerisiano o se faalapotopotoga o faievagelia. Sa aʻoaʻoina totino e Iesu ona soʻo i le galuega talaʻi ma ‘muai aauina atu i latou e taitoalua.’ (Mare. 6:7; Luka 8:1) Na taʻua e le aposetolo o Paulo ana ‘aumea faigaluega’ i le faapotopotoga i Filipi o ē sa ‘finau faatasi ma ia i le tala lelei.’ (Fili. 4:3) E ui ina e lē tau manaomia pea ona iai sa tatou paga i le faiva, ae e talisapaia e le toatele o i tatou le ō faatasi ma isi. (Fai. 4:9) E mafai faapefea la, ona tatou faalaeiau ma fesoasoani le tasi i le isi a o tatou talaʻi?
2 O se tasi o fuafuaga o a tatou faatasiga mo le auaunaga i le fanua ina ia avatu ai le fesoaoani i tagata talaʻi fou ma ē e itiiti le poto masani. (om itu. 77, 97) E oo foi i paeonia fou faatoʻā tofia atonu latou te mananao e galulue faatasi ma tagata talaʻi ua lava le poto masani pe faatasi ma se toeaina po o se auauna o le faiva. Maeu se avanoa lelei e “feofoai ai faalaeiauga”!—Roma 1:12, NW.
3 Mo ni mafuaaga tau le saogalemu, atonu e fautuaina ai tagata talaʻi ia galulue faatasi i nisi o nofoaga. Pe e iai taimi atonu e manaomia ai ona tolopo ni uluai fuafuaga ae galulue ma se tasi ina ia tofupaga ai tagata talaʻi e itiiti le poto masani o loo auai i le faatasiga mo le auaunaga. Afai e talosagaina i tatou e faia faapea, o le mea moni o se auala alofa mo i tatou le faia o so o se fetuutuunaiga manaomia e “fesoasoani i e ua vaivai,” e ui ina atonu ua masani ona tatou galulue ma se aumea patino.—Galu. 20:35.
GALULUE AUTASI
4 So o se taimi lava tatou te ō faatasi ai ma isi i le auaunaga i le fanua, tatou te mananao e galulue autasi o se ʻau. (Faatusatusa 1 Korinito 3:6,9.) E mafai uma e le toalua ona saosaolaumea i le avatuina o le molimau, atonu e auauaʻi i le amataina o ni talanoaga i aiga. O uiga lelei e faaalia lea i lo tatou faalogologo ma le faaaloalo ma uaʻi atu a o talanoa la tatou paga.
5 E ui ina atonu e talafeagai i nisi taimi ona auai atu i le talanoaga pe afai e taʻimua la tatou paga, ae manaomia ai i lenei mea le utaga poto. Tatou te lē mananao e faasalavei se faasologa o manatu ua faaaogā mo se iʻuga lelei ma lē ona le fale. O le mea moni, afai e amata lagona e se tagata talaʻi e itiiti le tomai e faigata ona ia taulimaina se teteega, e lē taumatea o le a ia talisapaia se fesoasoani ua lelei ona faatonutonuina.—Fai. 4:12.
6 E mafai ona tatou faaaogāina tatau le taimi i le va o fale e talatalanoa ai i ni auala e ono faaleleia ai la tatou taulimaga. Atonu o le faaaogāina o se tasi o faatomuaga i le tusi Reasoning po o se fautuaga ua faaauivi mai i La Tatou Faiva o le Malo o le a sili atu ona uigā. O le galulue faatasi foi tatou te maua ai le avanoa e iloa lelei ai le tasi, ma faamalosia ai le fusi o lo tatou usoga faa-Kerisiano.
7 Ioe o la tatou faiva o se oloa e silisili ona tāua. (2 Kori. 4:1,7) A o tatou maua le avanoa e galulue faatasi ai ma isi i le auaunaga i le fanua, e mafai ona tatou atiina aʻe ai i le tasi ma le isi se talisapaia loloto mo la tatou galuega paia. I le taimi lava e tasi, o le a tatou maua ai le faalaeiauga ma aʻoaʻoina ai mai isi taitoatasi. O le iʻuga o le a faateleina ai le olioli, e matuā uigā ai i le avatuina o se molimau, atoa ma se faalogona faamalieina o le autasi ma o tatou uso ma tuafafine.—Sala. 133:1.