Faataunuuina La Tatou Faiva o le Malo i le Fanua
1 O le alofa mo Ieova ma tuaoi e uunaia ai i tatou e talaʻi atu le tala lelei o le Malo. I le taulimaina ma le tomai o le upu moni, e mafai ai ona tatou lepetia “manatunatuga ma mea faasiasia uma ua mapuna aʻe e faasagatau i le poto o le Atua.” (2 Kori. 10:5, NW) Ua fuafuaina le faasino mataupu Watch Tower Publications Index e fesoasoani ia i tatou i lenei tulaga.
2 O le ulutala autū mo faamaumauga e faatatau i la tatou galuega talaʻi i le fanua o le “Faiva i le Fanua.” Ua ta aofaia ai i inā vaega uma, e aofia ai o tatou uiga totino, faatomuaga, le foia o teteega, taulimaga o lomiga taitasi, toe asiga, ma suesuega faale-Tusi Paia. Pe e te manao ea e faataʻitaʻi se manatu e ala i ni mea lelei na tutupu? E mafai ona e maua le mea tonu lava lena o loo e manaomia i lalo o le ulutala ogatotonu “Mea Tutupu.”
3 Ua faitio mai ea se tasi faapea e fetōaʻi le Tusi Paia lava ia, ma sii mai ai ni fuaiupu patino e foliga e feteenaʻi? I lalo o le “Moni Aʻiaʻi le Tusi Paia,” o loo aumai ai i tamaʻi ulutala “feteenaʻiga” ma le “feāugalelei” ni faamaumauga i talanoaga lautele o lenei teteega. I lalo o le tamaʻi ulutala “feāugalelei mau,” o le a e maua ai se lisi tele o fuaiupu taitasi e foliga mai e feteenaʻi, ma faamatalaga ua faapea ona foia manino ai i latou.
4 I nisi o tulaga, e tatau ai ona tatou lepetia manatunatuga e faavae i aʻoaʻoga sese a Kerisinetoma, e pei o le Tolutasi, le afi i hele, ma le lē mafai ona oti o le solu. E tofu a na manatu taitasi ma ulutala autū o loo iai. I lalo o le “Tolutasi” ma le “Lē Mafai ona Oti o le Solu,” o le a e maua ai le tamaʻi ulutala o “mau ua faatatauseseina e lagolago ai.” O le a faasinoina oe e lenei i talanoaga o loo auiliiliina ai mau taitasi. E faapena foi le vaega o loo maua i lalo o “Hele,” faatasi ma lona tamaʻi ulutala o “mau ua faaliliuseseina.”
5 O e moomoo ea e amata se suesuuega faale-Tusi Paia? Pe o iai sau suesuega e aliali mai e lē agaʻigaʻi i luma? I lalo o le ulutala “Suesuega Faale-Tusi Paia” o loo iai tamaʻi ulutala “amataina,” “fesoasoani—,” ma le “aʻoaʻo atu,” e tofu a ma faamaumauga e fesoasoani ia te oe i le sailia ma le faafoeina o ni suesuega faale-Tusi Paia e agaʻigaʻi i luma. Ina ia fesoasoani ia te oe e iloa po o le ā le taimi e sili ona lelei e faagata ai se suesuega, ia iloiloina tamaʻi ulutala “faamuta se suesuega e lē fua mai” ma le “faagataina.”
6 O e faanaunau ea e aapa atu mo nisi faaeaga atili i le faiva i le fanua? O ulutala “Faiva Faataimi Atoa,” “Paeonia Lagolago,” “Paeonia,” “Misionare,” ma le “Auauna i Nofoaga e Telē se Manaoga” o le a faasino ai oe i manatu aogā i le auala e maua ai na sini ma tala fiafia o mea na tutupu sa olioli ai i latou a ē ua maeʻa ona faia faapea.
7 O le faataunuuina o la tatou faiva o le Malo i le fanua e telē se faamalie loto e aumai ai. (Ioane 4:34) E mafai ona fesoasoani le Watch Tower Publications Index ia te oe a o e auai i lenei galuega olioli.