Auai ma le Loto Atoa i le Faiva i le Fanua
Vaega 2: Atiina Aʻe le Maelega
1 E faigofie tele ona maelega e uiga i se gaoioiga pe afai tatou te fiafia i ai. Ua moni foi lea i le tulaga lautele, afai sa sauniuni se tagata e faia se mea, e fiafia foi e fai. E matuā moni lena i le faataunuuina atoatoa o la tatou faiva.—2 Timo. 4:5.
E MANAOMIA SAUNIUNIGA
2 O lo tatou maelega i le faiva i le fanua e fesootai tuusaʻo lava i le lelei o loo tatou sauniuni ai ma le tele tatou te ō ai i le auaunaga. Mo se faaaʻoaʻoga, afai e faailoa mai e se tasi tatou te feiloai i le faiva i lea fale ma lea fale faapea o ia o se Musalimi, e mafai faapefea ona tatou tali atu? O se tagata talaʻi e lava saunia, e ono tali atu faapea: “Manaia lena. E lē toatele ni Musalimi ua ou talanoa i ai. Ae sa ou faitau i se mea e uiga i nisi o aʻoaʻoga a lau lotu i le tusi lenei. [Sue i le itulau 23 o le tusi Reasoning.] O loo faapea mai tou te talitonu o Iesu o se perofeta ae o Muhammad o se perofeta mulimuli ma e sili ona tāua. Pe lē o le tulaga ea lena? [Faataga mo se tali.] Pe tou te talitonu foi faapea o Mose o se perofeta moni? [Faataga mo se tali, e faamautinoa ai.] E mafai ona ou faaali atu ia te oe i Tusitusiga Paia le mea na aʻoaʻoina e Mose mai le Atua e uiga i le suafa totino o le Atua?” A uma e mafai ona e faitauina le Esoto 6:3. I lenei auala, atonu o le a e amataina ai se talanoaga fiafia.
3 O le toatele o i tatou e faafaigata ona manatuaina numera o itulau patino. Peitai faatasi ma sina sauniuniga itiiti ma le faataʻitaʻia, e mafai ai ona tatou faaaogā le vaega ua taʻua o “Taofiga o Talanoaga” e latalata ane i le amataga o le tusi Reasoning. O loo aofia i lena vaega nisi o itulau o faamatalaga e fesoasoani ai ia i tatou e tali atu i tagata o ē faailoa mai e iai sa latou lava tapuaiga patino.
4 O loo iai foi i le tusi Reasoning se vaega lelei o faatomuaga. Aiseā e lē fafau ai au faatomuaga ina ia mulimuli i ai? Atonu e manaomia ona fetuutuunai a tatou taulimaga e faatatau i le tulaga. I faaiʻuga o le tele o mataupu i le tusi Reasoning, o loo iai se vaega “A Faapea mai se Tasi,” ua saunia ai faamatalaga tuusaʻo e tali ai fesili patino po o ni mea e fesootai i le mataupu. Peitai, faatoʻā aogā lava nei faamatalaga lelei uma, pe afai tatou te faaaogāina i a tatou sauniuniga.
E FAAPEA ONA SAUNIUNI
5 Ia mataala i so o se lomiga o le a talanoaina i le Sauniga o le Auaunaga ma ia iai na tusi ia te oe e toe sue i ai i le taimi o talanoaga ma faataʻitaʻiga. I lenei auala, e mafai ai ona e maua aogā atoatoa e sili atu mai sauniuniga a isi.
6 E aogā ona faaaluina sina taimi e sauniuni ai mo le auaunaga. Ia mautinoa ua e maua lomiga e te manaomia. Faaalu ni nai minute e autilo ai le Mataupu mo Talanoaga. Autalu mau ua faaaogā, ma saili ni manatu patino e talanoa i ai i le lomiga ua faatomuaina. E afai ona aogā le faia faatasi o lenei mea o se aiga.
7 Faia ni vaega e faataʻitaʻi ai. E mafai ona e faataʻitaʻia i ni taimi eseese—pe a maeʻa le Suesuega Tau Tusi a le Faapotopotoga, i se taimi o evaevaga, pe a ō faatasi i taavale, ma i le va o fale. O le faafoeina o taulimaga, le talanoaina ma le faatʻitaʻia o auala e faafoe ai teteega, e mafai ona avea o se fiafiaga ma saunia ai ni faatasiga lelei e faamaʻaiina ai o tatou tomai.
8 O sauniuniga tinoū e atiina aʻe ai lo tatou maelega mo le faiva ina ia mafai ai ona avea i tatou o se au faigaluega tomai ma seleseleina ai le olioli faamalie loto.—Ioane 2:17.