Taulimaina o le Tala Lelei—I Oganuu ua Galueaiina Soo

¹ Ua tulaʻi mai ni luʻi faapitoa i le talaʻiga i oganuu ua galueaiina soo. O le a faapefea la ona e faatumauina pea le fou ma le faatosina o le feau? O ā ni faafeiloaiga e ao ona faia agaʻi i nisi e foliga mai latou te matuā lē fiafia lava? O le ā e mafai ona fai atu ai ia i latou o ē faapea mai ua tatou asiasi soo atu? E mafai faapefea ona faafoe le faatatauga o le faafaigofie ona tufatufaina lomiga, i oganuu ua masani ona galueaiina?

IA MAUMAUAI

² E ese mai le mea atonu o loo manatu i ai nisi, o oganuu e galueaiina soo ma maeʻaeʻa, e masani lava ona fua mai ai ni iʻuga lelei i lo o oganuu tatou te lē asiasi soo i ai. O se tasi la o toʻatugā e manaomia ona foia, o so o se manatu sese lea e uiga i le asiasi atu e lē aunoa i le fale lava e tasi. E manaomia ona avatu i tagata avanoa uma e faalogo ai i le feau o le Malo. O se mea sese i la tatou vaega le faaiʻua faapea ua faamasinoina e Ieova i latou e lē talilelei mai e le aogā, e ui i le tele o taimi sa tatou asiasi atu ai ia i latou.

³ E tāua faapitoa lava le faaalia o le manatu mamafa i oganuu e galueaiina soo. I le iai o se feau patino e faailoa atu ai mea o loo aafia ai tagata i o latou nuu, e ono maua ai se tali maumauai mai nisi o ē e lē faalogo. O e nofo uta ea i mea fou o loo tutupu, ma ua e sauni ea e faaali atu le auala e mafai ai e le feau a le Tusi Paia ona fesoasoani i tagata e foia faafitauli o latou fesagaʻi?

IA FESUISUIAI FAAFEILOAIGA

⁴ Ia fesuisuiai au faafeiloaiga i oganuu e masani ona galueaiina. Atonu e te faaaogāina se sāvali i se tasi taimi o se vaega o lau faatomuaga. I se isi tulaga e mafai ona fetuunai se tasi o faatomuaga e silia i le 40 ua fautuaina i le tusi Reasoning i itulau e 9-15 ina ia fetaui ai ma ni mataupu o loo faapopoleina ai lou vaipanoa. E mafai foi ona e toe ta i lau asiasiga na faatoʻā uma atu i lena vaipanoa, ma faaitiitia ai i lea le faavae mo le teteega. Afai na e faamauina se manatu aogā o lē ona le fale i le taimi o lau asiasiga na faatoʻā uma atu, e mafai ona faaaogā lena o se laasaga i nisi talanoaga e faagaee ai le fiafia.

⁵ Manatu i tagata e pei ona silasila i ai Ieova, ma ia faaauau pea ona faaalia le manatu mamafa mo i latou o ē atonu na faapea mai ia i tatou latou te matuā lē fiafia lava. Na talosaga faafia atu Ieova i ona tagata anamua e ui ina latou faatauemu i ana avefeau. (2 No. 36:15; Iere. 7:13) O le toatele o ē na manatu i se isi taimi e lē fiafia ua avea ma o tatou uso ma tuafāfine i aso nei. E oo foi i ē sa soona tetee mai ua manumalo ai le upu moni. Ua faafetai nei i latou ia ona sa faaauau pea ma le onosai e se tasi ona asiasi atu ia i latou ma le tala lelei.

TAUSIA FAAMAUMAUGA LELEI

⁶ O se mea e aupito sili ona tāua o le tausia lea o se faamaumauga lelei o lea fale ma lea fale. O le tuliloaina o i latou o ē sa lē maua i aiga o le a faamautinoa ai le ufitia maeʻaeʻa o le oganuu ma faateleina ai le taimi i le va o a tatou asiasiga ia i latou o ē e iai i aiga. Ua iloa foi e nisi le lelei o le fesuiaia o faamaumauga o ē sa lē maua i aiga mai le galuega i le ogatotonu o le vaiaso ma i latou e galulue i le oganuu i faaiʻuga o vaiaso. O le a faaeseese ma le uigā ai e lenei faiga le taimi e asia ai tagata o aiga ma faateleina ai le avanoa e maua ai tagata o ē ua faifai pea ona lē iai i nisi taimi o le aso ma i nisi aso o le vaiaso. E mafai ona maua faufautuaga faaopoopo i Le Olomatamata o Ianuari 15, 1990, itulau 15-20.

⁷ O loo silafia lelei e Ieova pe ua lava ma totoe taumafaiga e ausia ai tagata uma o ē o le a faalogo. I lalo o le taʻimua a Keriso, o le a faaauau ai pea ona tatou usiusitai ia te ia, i le mautinoa o le a faia le galuega i totonu o le taimi ua atofaina.—Eseki. 9:11.