Auai ma le Loto Atoa i le Faiva i le Fanua
Vaega 1: Le Aogā o le Talisapaia mo Ieova
1 O le auai ma le loto atoa i le faiva e pogai mai lea i le talisapaia loloto o Ieova atoa ma mea uma ua ia faia mo i tatou. (2 Samu. 22:2,3) E ao i se vaaiga faanoanoa i tulaga o le fanau uma a tagata ua vavaeese mai le Atua, ona uunaia ai i tatou e pulunaunau i tatou lava i le auaunaga. (Mata. 9:36; 2 Kori. 5:14,15) O le tele o lo tatou tuutoina atu ia Ieova ma le tele o lo tatou manatu mamafa mo tagata, o le tele foi lea o le a uunaia ai i tatou e auai ma le maelega i le auaunaga i le fanua. (Mata. 22:37-39) Ona avea ai lea o la tatou faiva o se oloa e sili ona taugatā. (2 Kori. 4:7) Ae e mafai faapefea ona atiina aʻe sea talisapaia mo le faiva?
KI I LE ATIINA AʻE O LE TALISAPAIA
2 E fesoasoani le suesuega totino ma le suesuega faale-Tusi Paia a le faapotopotoga ia i tatou faatasi ma mafaufauga loloto i tatalo e atiina aʻe ai se faiā totino ma Ieova. E oo ai ina tatou tāea le matagofie o ona uiga ma lona peresona. Pe e te mulimuli i le faasologa mo le faitau Tusi Paia faalevaiaso? E masani ea ona e faataatia ese se taimi e suesue ai lomiga a le Sosaiete? Faamata e te sauniuni, auai ma faia se sao i sauniga uma a le faapotopotoga? (Epe. 10:24,25) A o faia ma pe a maeʻa le taimi o suesuega totino taitasi, o mafaufauga loloto e aogā, o le a atiina aʻe ai le talisapaia i le loto mo le tauagafau o lo tatou Atua faamafanafana loto ma ana faatatauga mo le tapuaiga moni.—Sala. 27:4.
3 O se isi auala e mafai ai ona tatou siitia le tulaga o lo tatou talisapaia, o le iloilo totoʻa lea o le faaaʻoaʻoga a isi faifeau tuutoina ma le loto atoa a le Atua. Sa ogotia le perofeta o Ieremia ona o le naunau mo le galuega na faatuatuaina atu ia te ia. (Iere. 20:9) Na tuua e Iesu se faaaʻoaʻoga, i le faaalia lea o se agaga talisapaia ma le maelega. (Ioane 4:34) I ana galuega i le faiva, na faailoa ai foi e le aposetolo o Paulo lona loto faafetai mo le alofa mutimutivale tauatua na faaalia ia te ia. (1 Timo. 1:12,13,17) A o tatou toe manatunatu i na faaaʻoaʻoga, atoa ma faaaʻoaʻoga faaonaponei, e mafai ai ona tatou atiina aʻe se talisapaia o le a faapea ona avea ai i tatou o ni ē auai ma le loto atoa i le faiva.
4 A aʻoaʻoina i tatou e uiga i le pupula matagofie o le malualii o Ieova ma tatou manatu mamafa i ana galuega ofoofogia, e uunaia ai i tatou e folafola atu lona silisiliese ma alalaga ma le olioli i lona viiga. (Sala. 145:5-7) Tatou te faaalia ai tatou te faapelepele i o tatou avanoa e molimau atu ai i le suafa tauatua e ala i le sogasogā e sailia auala e faasalalauina ai le feau o le Malo.—Luka 6:45.
5 Peitai o iai ea nisi mea e uunaia ai i tatou ina ia auai ma le loto atoa i le faiva? Afai e iai, o ā la na mea? E mafai faapefea ona fesoasoani mai toeaina, auauna o le faiva, paeonia, ma isi o ē agavaa e folafola le Malo? O le ā le vaega e faatinoina e sini i le galueaiina o le aasa? O ā aogā e mafai ona faatalitalia? O ia fesili atoa ma isi o le a taliina i lenei faasologa o vaega e lima, o le a faaauau atu i lomiga o loo mulimuli mai o La Tatou Faiva o le Malo.