Taulimaina o le Tala Lelei—Faaaogāina o le The Greatest Man Who Ever Lived
1 I le gasologa mai o tausaga, e toetoe lava o a tatou lomiga taitasi uma ua taʻua ai le olaga ma le faiva a Iesu Keriso i nisi o auala. Ua talafeagai tele lena, ona “e leai...se tasi ua i ai le ola; e leai lava se isi igoa i lalo o le lagi ua foaiina mai i tagata e mafaia ona faaolaina ai o i tatou.” (Galu. 4:12) O lenei tusi fou e tutasi ona o le uluai taimi lenei ua taulai atoatoa atu ai se tasi o a tatou tusi i le olaga o Iesu.
2 Ofoina i Isi: O ā nisi o vala mananaia o lenei lomiga e mafai ona tatou faailoa atu? Ua lagā i le mataupu e 5 se fesili talafeagai mo lenei taimi o le tausaga, “Fanau mai o Iesu—I Fea ma o Anafea?” Atonu e mafai ona e puʻeina le naunau o se tamaitiiti i le tala faafiafia loto i le mataupu e 44, “Faafilemuina o se Matagi Sousou.” E mautinoa le faamafanafanaina o se tagata o loo maua i se maʻi faaletino pe lē o atoatoa le malosi i le mataupu e 57, “Alofa mo Ē Mafatia.” O le mataupu e 90, “Le Faamoemoe o le Toetu,” e ao ona fiafia i ai so o se tagata o lē ua leva ona faanoanoa i le oti o sē pele. E mafai ona taʻitaʻia se talanoaga e uiga i tulaga mafatia o le lalolagi i le mataupu e 111, “Le Faailoga o Aso e Gata ai.”
3 Atonu e te faapea atu a o iai i se fale: “O le ā ua faatalitalia e le Atua mai ia i tatou o ni Kerisiano? Ua faasino i tatou e le Tusi Paia ina ia faataʻitaʻi i le faaaʻoaʻoga ua faataatia e le tagata silisili i le lalolagi, o Iesu Keriso. [Faitau 1 Peteru 2:21.] Sa ia aʻoaʻoina ona soʻo ina ia alolofa i o latou tuaoi, ia tausisi i amioga mamā, ma tatalo mo le oo mai o le Malo o le Atua. E faalagolago lo tatou faaolataga i le iloaina ma le usiusitai ia Iesu o lo tatou Faaola.[Faitau Ioane 14:6.] Sa lē pei Iesu o tagata lautele. Ua faamatalaina o ia i lenei tusi o le tagata silisili o ē uma na soifua mai. Ua faamautinoaina lenei mea i le mataupu e 59, lea ua faailoaina ai o ia o ‘le Keriso, le Alo o le Atua soifua.’ Ona tatou te faalagolago ia te ia mo le faaolataga, e te lē manatu ai ea la o loo iai se manaoga mo i tatou ina ia aʻoaʻoina le tele e mafai ai e uiga i lana galuega ma mea na ia aʻoaʻoina? Ua saunia faapitoa lenei tusi mo lena fuafuaga, ma ou te fiafia e avatu ma oe lenei tusi?
4 E mafai ona e tau i le toatele o tagata loto faamaoni o ē o le a talia ma faitau i lenei lomiga fou, The Greatest Man Who Ever Lived. Ia mautinoa ua toe asia tagata uma na e tuua ai lenei tusi po o Laʻu Tusi o Tala o Le Tusi Paia. I nisi tulaga, atonu e te filifili e faaaogā le tusi fou e amata ai ni suesuega faale-Tusi Paia i aiga ma i latou o ē tautatala faa-Peretania. O le fetufaai ma isi i nei lomiga e mafai ona fesoasoani ai ia i latou ina ia maua le ala i le ola e faavavau.