Talia le Avega Tauave o le Faia o Toe Asiga
1 E tele mafuaaga malolosi o loo iai mo le auai i le atoatoa e mafai ai i le faia o toe asiga. Tatou te mananao e faataunuuina maeʻaeʻa le galuega ua tuuina mai ia i tatou e faia, e pei foi ona sa faia e Paulo. (Galu. 20:21, 24) Afai o loo maeʻaeʻa ona tatou toe asiasi atu i tagata uma e naunau, o le a tatou faatumauina ai se loto fuatiaifo lelei a o tauivi e faataunuuina atoatoa la tatou faiva.—2 Timo. 4:5.
2 Aumaia e le Poto Avega Tauave ia i Tatou: O le mea moni ona ua lamatiaina ola, e ao ai ona uunaia i tatou e tinoū i le faia o toe asiga. (Ioane 17:3) O lo tatou iloa o le faamasinoga a Ieova ma le lalata tele mai o Amaketo e ao ona faagaeeina ai i tatou e lē gata ia lapataia ē amio leaga, ae ia fesoasoani foi ia i latou o loo ‘oi ma mapuitiga ona o mea inosia o loo tutupu i le lalolagi.’ (Eseki. 9:4) E manaomia ona aumaia i latou ina ia auaumea ma le faalapotopotoga vaaia a Ieova.
3 E manaomia e tagata le fesoasoani ina ia malamalama tonu ai i le upu moni. (Galu. 8:30, 31; 18:26) O se isi lenei mafuaaga e ao ai ona tatou talia la tatou avega tauave e toe foi atu e “faasūsūina” fatu o le upu moni na lūlūina. Faamata o le ā le tele o lo tatou lava agaʻigaʻi i luma faaleagaga, pe ana lē toe asiasi atu se tasi mai lea taimi i lea taimi e fesoasoani ia i tatou ina ia maua le poto saʻo e uiga ia Ieova ma Ana fuafuaga matagofie?—Mata. 7:12.
4 Faaalia le Alofa ma le Maelega: O le faia o toe asiga, o se auala lelei lea e faaalia ai lo tatou alofa mo tagata. Na faapea mai se uso tauaso o loo auauna o se paeonia sauatoa: “Talu mai lava loʻu papatisoga, o loʻu faanaunauga o le taʻuina atu lea i isi o mea sa ou aʻoaʻoina mai le Tusi Paia. Na ou fiafia ona sa leʻi taofia aʻu e loʻu tino lē atoatoa mai le faia o lenei. . . . Sa ou aʻoaʻoina foi le tausia o se faamaumauga i le mafaufau o fale taitasi o le auala, ma i lenei faiga, na mafai ai foi ona ou faia toe asiga i tagata e naunau i se suesuega faale-Tusi Paia.” E mafai moni lava e lenei uso tauaso ona vaai faatasi ma lona loto, ma e lē mafai ona taofia o ia mai le faia o toe asiga ma le faaalia o lona alofa faa-Kerisiano mo isi.
5 Pe a faia toe asiga, e masani ona tatou maua avanoa e faaaogā lelei ai le Tusi Paia, ma avatu ai ni mafuaaga mo le faamoemoe o loo ia i tatou. (1 Pete. 3:15) O lenei mea e lē gata ina fesoasoani ai i lē ona le fale, ae sasao aʻe ai foi lo tatou lava maelega ma le talisapaia mo le upu moni. O le faia o toe asiga, e aumaia ai le olioli, e leai se isi auala e mafai ona maua mai ai. Ma e manaomia ona aua neʻi faaitiitia le uigā o lena olioli. E mafai ona faafouina e lē aunoa e ala i lo tatou faia ma le maelega o toe asiga.—Faata. 10:22.
6 E tatau ona tatou manatu mamafa i la tatou avega tauave o le faia o toe asiga. Ua lē taofia e tagata o Ieova se mea lelei mai isi, ma e mafai ona vaaia lenei i la tatou galuega i le lalolagi aoao i le tausaga faaleauaunaga 1991. (Faata. 3:27) Sa tatou faia ai toe asiga e 344,926,952 ma faafoeina ai suesuega faale-Tusi Paia i aiga e 3,947,261. Na iai soʻo fou e 300,945 o ē na tuuina atu i latou lava ia Ieova ma papatisoina. O le a lē mafai ona tupu lenei faatelega ofoofogia pe ana leai lo tatou loto malilie e talia le avega tauave o le faia o toe asiga.—1 Tesa. 2:8.