Le Luʻi o le Faia o Toe Asiga
1 I le avea ma faifeau o le tala lelei, ua poloaia ai i tatou ina ia faia ni soʻo. (Mata. 28:19, 20) E aofia ai i lenei mea, le faia o toe asiga. Po o ia te oe ea se vaaiga mautinoa e uiga i lenei vaega tāua o la tatou faiva faa-Kerisiano? O le tomai i le faia o toe asiga, e mafai ona avea o se luʻi e faagaeeina ai.—Faata. 22:29.
2 E ao i Kerisiano taitoatasi ua tuuina atu ona manatu, o se avega tauave le auai i le galuega o le faia o soʻo. Atonu e manaomia ai i lenei itu, ona faataatia ese nisi o mea tatou te naunau totino i ai, ina ia mafai ai ona faailoa atu le faamoemoe o le Malo i isi. Ua aumaia e toe asiga mo i tatou le avanoa e fesoasoani atu ai i ē naunau faamaoni ina ia faamalieina o latou manaoga faaleagaga.
3 Tuliloa Ē Uma e Naunau: E ao ona faia toe asiga i ē uma latou te faaalia le naunau i le feau o le Malo, e tusa lava pe latou te lē taliaina a tatou lomiga. O loo toatele tagata o ē faaalia le naunau e ala i lo latou loto malilie e talatalanoa i ni mataupu o le Tusi Paia ma i tatou. Na faailoa mai e Iesu ma le au aposetolo le auala e mafai ai ona atiina aʻe le naunau i le feau o le Malo, e ala i le faaaafia ai o tagata i ni talanoaga aogā faale-Tusi Paia.—Mare. 10:21; Galu. 2:37-41.
4 O la tatou fuafuaga mo le toe asiasi atu, o le amataina lea o se suesuega faale-Tusi Paia. Atonu e mafai ona tatou faataʻitaʻia i lē ona le fale, pe faapefea ona faia se suesuega faale-Tusi Paia i le aiga. E mafai ona e mautinoa o le a tali mai Ieova i lau tatalo mo le fesoasoani i le sailia o se tagata loto faamaoni ina ia aʻoaʻoina. O le a faamanuiaina e Ieova au taumafaiga ma le naunautai i lana auaunaga. Aiseā la e lē sailia ai le fesoasoani a Ieova, ma ia avea o se sini le amataina o se suesuega faale-Tusi Paia?
5 Faaaogā Tatau Sāvali: E mafai ona faaaogāina ma le uigā sāvali e amata ai ni suesuega faale-Tusi Paia. Ua mafai e le toatele ona amataina se talanoaga, i le tau lava o le talanoaina o le ata o loo i le faavaa. Ia auauai ona faitau palakalafa i lē ona le fale. A faia se fesili, ia faatali ae valaaulia lē ona le fale e faaleoina mai ia lava. Ia suʻe mau ma faailoa i ai le auala e faatatauina ai. Ona tataʻi atu loa lea o le talanoaga i le lomiga e mafai ona faia ai le suesuega.
6 Faaaogā le tusi Reasoning: E mafai ona faia ni toe asiga uigā i le tusi Reasoning. I le autaluina o le faasologa o mataupu autū po o le faasino mataupu, e mafai ai ona fesoasoani ia te oe ina ia filifili ni faamatalaga talafeagai e talatalanoa i ai, pe a faaauauina ni talanoaga na faia muamua atu. E mafai ona aogā le vaega o “Mau e Masani ona Faatatau Sese,” pe a feagai ma ni teteega e ono mapuna aʻe. Ua lipotia mai e paeonia le matuā taulau i le amataina o suesuega faale-Tusi Paia, e ala i le faaaogāina o faamatalaga e pei o na o loo maua i le tusi Reasoning, i le itulau e 204 i lalo o le “Faapefea ona maua e Molimau a Ieova lo latou faamalamalamaga o le Tusi Paia?” O loo faailoa atu ai i tagata naunau, le auala ua tatou tuu atu ai i le Tusi Paia na te aumaia lona lava faamalamalamaga. Na matuā aogā lelei lenei mea, ma ua iʻu ai i le amataina o le tele o suesuega faale-Tusi Paia.
7 E pei o Iesu ma le au aposetolo, e manaomia ona tatou faaalia le naunau faamoni i mamoe a Ieova. (Luka 9:11) O le alofa mo tagata, o le a fesoasoani lea ia i tatou ina ia faaoo atu ai ia i latou upu moni o le Malo. (2 Kori. 2:17) A tatou matuā faamamafa le ofoina atu o i tatou lava mo le lelei faaleagaga o isi, ona mafai ai lea ona tatou faafetaiaia le luʻi o le faia o toe asiga.