“Tou te Faia le Mea Nei e Fai ma Faamanatuga ia te Au”
1 Na poloaia e Iesu ona soʻo ina ia faamanatu le sauniga faaletausaga o lona maliu. (Luka 22:19) O le a avea lenei sauniga o se mea e faamanatu mai ai le taulaga sili na saunia e Iesu mo le fanau a tagata. I lenei tausaga o le a faamanatu ai e Molimau a Ieova i le lalolagi aoao le Faamanatuga o le maliu o Keriso i le Aso Faraile, Aperila 17, pe a mavae le goto o le la.
2 Sauniuniga Totino: E mafai faapefea ona tatou sauniuni mo se sauniga talafeagai o lenei faatasiga tāua? O se tasi o auala, o le toe manatunatu lea faatasi ma le tatalo i le soifuaga faalelalolagi ma le faiva a Iesu. Na avea o ia ma Togiola o le fanau a tagata e ala i le foaiina mai o lona ola lelei atoatoa faaletagata e fai ma taulaga. (Mata. 20:28) Ina ia fesoasoani i tagata taitoatasi e talisapaia lenei sauniuniga, matou te fautuaina ai le iloiloina o mataupu e 112 e oo i le 116 o le The Greatest Man Who Ever Lived.
3 O la tatou faitau Tusi Paia a o leʻi oo i le Faamanatuga o lenei tausaga, e pei ona matauina i le 1992 Calendar of Jehovahʻs Witnesses, o loo maua i fuaiupu ua filifilia mai le tusi o le Tusi Paia o Mareko. O lenei faitau Tusi Paia faapitoa ua fuafuaina mo le vaitaimi e ono aso, mai le Aso Sa e oo i le Aso Faraile, Aperila 12-17. O i tatou uma lava tatou te mananao e faaalu se taimi e lava ma totoe ina ia mafaufau loloto ai i nei mea tāua na tutupu.
4 Sauniuniga Maeʻaeʻa a Toeaina: Ia mautinoa ua maua tusi valaaulia o le Faamanatuga. Pe ua lava ma totoe ea ni nofoa mo ē uma ua faatalitalia e auai? Afai e sili atu i le tasi le faapotopotoga o le a faaaogāina le maota, e manaomia la ni fuafuaga maopoopo ina ia lava ai le taimi e faamanatuina ai e faapotopotoga taitasi le Faamanatuga. E ao ona muai logo ia i latou e galulue o ni tautua o latou tiute. O le a latou mananao e tausolomua i le faafeiloaia o tagata fou e auai. E ao ona filifilia se failauga e sili ona agavaa o lē na te tauaaoina ma le manino faamatalaga e tusa ai ma le Tusi Paia. Ia tofia ni toeaina maufaatuatuaina po o ni auauna o le faiva e faasoaina atu le areto ma le uaina. E ao ona saunia se areto lē faafefeteina ma se uaina lē filogia. Mo ni faamanatu faaopoopo, ia matau le lomiga o Le Olomatamata o Aokuso 1, 1985, itulau e 19.
5 E ala i muai sauniuniga maeʻaeʻa, o le a tatou faaalia ai tatou te talisapaia atoatoa le uiga o lenei faatasiga faapitoa ma tatou te faanaunau e faamanatuina le Faamanatuga o le maliu o Keriso i le ōgatasi ma le poloaiga a Iesu.—1 Kori. 11: 23-26.
[Pusa i le itulau 5]
1. Pe ua muai logo ea tagata uma, e aofia ai le failauga, i le taimi tonu ma le nofoaga o le faamanatuga? Pe o iai se auala o le failauga?
2. Pe ua faia ni fuafuaga maʻoti ina ia saunia faatusa?
3. Pe ua faia ni fuafuaga mo se tasi e aumaia se ie laulau mamā ma ni ipu malamalama ma ni sasa e manaomia?
4. O ā fuafuaga ua faia mo le faamamāina o le maota a o lumanai le Faamanatuga ma mo le toe faamamāina puupuu i le faaiʻuga, pe afai e faaaogāina e se isi faapotopotoga le maota i lena afiafi po?
5. Pe ua tofia ni tautua ma ni ē faasoaina atu le uaina ma le areto? Pe ua fuafuaina se fono ma i latou a o leʻi faia le Faamanatuga ina ia faamanatu ai o latou tiute? O afea? O le ā le faasologa o le a mulimuli ai ina ia mautinoa ua lelei ona tautuaina tagata uma?
6. Pe ua maeʻa ona faia ni fuafuaga e fesoasoani ai i ē matutua ma uso ma tuafafine e lē atoatoa le malosi? Pe ua faia ni fuafuaga e tautuaina ai so o se tasi o ē faauuina atonu o loo faataotolia ma e lē mafai ona auai i le Maota o le Malo?