Ofoina Le Olomatamata ia Me
1 O le fuafuaga o Le Olomatamata, o loo taʻua puupuu mai lea i lomiga taitasi i le pito i luga o le itulau e 2. O le ā e mafai ona tatou faia ina ia ōgatasi ma lena fuafuaga lauiloa, e fesoasoani ai i le toatele o tagata e mafai ai? Ia Me, o le a tatou faia ai se taumafaiga faapitoa e faalaeiauina tagata uma o ē faaalia le naunau i le feau o le malo ina ia faitau e lē aunoa i Le Olomatamata.
2 E mafai ona tatou faapea atu i se tasi e fai mai o ia o se Kerisiano:
◼ “O loo matou fesiligia o matou tuaoi i se fesili, ma e talisapaia foi sau tali i ai. Ona ua aʻoaʻoina i tatou e Iesu ina ia tatalo atu mo le Malo o le Atua ia oo mai ma faia ai Lona finagalo i le lalolagi e pei ona faia i le lagi, faamata e te manatu o le a faia moni lava le finagalo o le Atua i inei i le lalolagi?” Faataga mo se tali, ona suʻe lea i le Isaia 55:10, 11 ma fai atu i lē ona le fale ia matau le auala o le a faataunuuina ai folafolaga uma a le Atua.—rs, itu. 12, le faatomuaga lona lua i lalo o le “Malo.”
3 Afai e faaalia e lē ona le fale le naunau, e mafai ona e fai atu atili:
◼ “O se tasi o fuafuaga o le mekasini o Le Olomatamata, o le tataʻi atu lea o manatu i le faataunuuga o valoaga o le Tusi Paia. Matau foi le mataupu lea.” Ona faasino atu lea i le mataupu lona lua o Le Olomatamata o Me 15, “Le Lolo i Tala Faaanamua a le Lalolagi” ma faapea atu: “Atonu o loo e tau mānatu, Pe aiseā e ao ai ona tatou naunau i le lolo i ona po o Noa?’ Matau foi le mea o loo fai mai ai le palakalafa o loo sosoo ma le palakalafa faaiʻu i le itulau e 8 e uiga i le lolo.” Ona faitau lea o lena palakalafa.
4 E ao ona e iloa mai gaoioiga a le tagata po o mea ua ia fai mai ai pe faamata e naunau o ia i mea na e faasino atu i ai. Afai e naunau, ona e ofoina loa lea i ai o kopi fou faatoʻā taunuu mai o mekasini. Afai e masani o ia i a tatou lomiga ma faaalia le talisapaia moni mo lomiga i le faapea mai, “E masani lava ona ou faitauina a tou mekasini,” ona e faamatalaina loa lea i ai o le auala na te mauaina ai e lē aunoa Le Olomatamata i le faia o se tusiga.
5 Afai e te manao e faaumiumi le talanoaga, e mafai ona faalautele atu lena lava taulimaga e tasi ina ia aofia ai le mau i le Faaaliga 21:3-5, e pei ona faasino mai i le tusi Reasoning.
I lenei itu, a uma ona faitau le Isaia 55:10, 11, e mafai ona e faapea atu:
◼ “E lē o toe mamao ona faataunuuina lea o se valoaga matagofie e uiga i le finagalo o le Atua mo le lalolagi. O lea valoaga e aafia ai o ta ola. Faafofoga foi i le mea ua tusia i le Faaaliga 21:3-5.” Ona e faitauina lea o na fuaiupu ma talanoa i faamanuiaga o le a aumaia e le pulega a le Malo o le Atua. Ia faasino i ai le auala ua faasilasilaina ai e Le Olomatamata le pulega a le Malo o le Atua.
Atonu e te faapea atu:
◼ “O loo faatomuaina e le lomiga o Me 1 le mataupu ‘Ia Matataʻu ia Ieova ma Vivii atu i Lona Suafa Paia.’ O le a fesoasoani lea ia te oe ina ia iloa ai, pe mafai faapefea ona e ola i le lalolagi fou amiotonu i lalo o le Malo o le Atua lea na ta faitau i ai i le Faaaliga 21.”
6 Faaaogā Le Olomatamata o se Laasaga i le Faia o se Suesuega Faale-Tusi Paia: O lo tatou sini o le fesoasoani lea i isi e aʻoaʻoina le upu moni, ina ia mafai ai foi ona avea i latou o ni ē faigaluega faatasi ma Ieova, ma tofu sao ai i le faasilasilaina o le Malo o Ieova. O lea la, a tatou mauaina tagata o ē naunau mai, tatou te mananao e faamauina i lalo ma ia vave ona toe asiasi atu i ai.
7 A o tatou tufaina atu le upu moni i isi faatasi ai ma le fesoasoani a Le Olomatamata, tau ina ia tatou sailia pea le taʻitaʻiga a Ieova i la tatou galuega e mafai ai ona tatou maua ma fafagaina ē e pei ni mamoe.—Ioane 21:15-17.