Tuliloa ni Tagata Fiafia na E Maua
1 A o galulue mai lea fale i lea fale, e masani lava ona faatapulaa le taimi e mafai ona tatou faaalu mo se tagata fiafia. I le tele o tulaga, o le galuega moni o le aʻoaʻo atu, e tele ina faia pe a tatou ō atu e faia toe asiga ma suesuega faale-Tusi Paia. (Mata. 28:19, 20) Ina ia mafai la ona aʻoaʻo ma le uigā i le toe asiga, e manaomia ona toe autalu mea na tatou talanoa i ai i le uluai asiasiga ma sauniuni loa mo se isi talanoaga atili.
2 Afai sa oulua talanoa i le lē mautu o le faatulagaga faaleaiga, e mafai la ona e faaaogaina manatu na o loo iai i le mataupu e 29 o le tusi “Ola e Faavavau.” E mafai ona e faapea atu:
◼ “Talu ai, sa ta talanoa e uiga i le atamai o le mulimuli i fautuaga a le Tusi Paia ina ia maua ai se olaga faaleaiga fiafia. O le ā sou lagona o le ā le ki i le autasi o aiga i aso nei?” Faatali mo se tali. Faasino i le palakalafa e 27 i le itulau e 247, ma faitau le Kolose 3:12-14. Faaopoopo atili e faaalia ai le auala ua mafai ai e le alofa moni ona autasia aiga. Faamatala po ua faapefea i le faiga o le suesueina o le tusi Ola e Faavavau ona fesoasoani e foia faafitauli.
3 Afai sa e talanoa i lau uluai asiasiga i tulaga ua agaʻi ina sili ona leaga ua iai le lalolagi, e mafai ona e tuliloaina lena talanoaga i lou faapea atu:
◼ “Ou te mautinoa e te ioe ua manaomia ni suiga tetele pe afai o le a mafai ona tatou ola i le filemu. Ua faaalia e le Tusi Paia e faapea, o Satani o le pogai autū lea o o tatou faafitauli. E toatele lava ua tau mānatu pe aisea ua faataga ai o ia e le Atua e faaauau pea mo se taimi umi. O le ā sou manatu?” Faatali mo se tali. Suʻe i le itulau e 20, palakalafa e 14 ma le 15 i le tusi Ola e Faavavau, ma faamatala le pogai ua lē faaumatia ai loa Satani. Ona faitau lea o le Roma 16:20, o loo faailoa mai ai le mea e mafai ona tatou faatalitalia i le lumanai lata mai.
4 Afai sa e talanoa e uiga i faamanuiaga ia o le a maua i le pulega a le Malo i lau toe asiga, e mafai la ona e faapea atu:
◼ “O le a aumaia e le Malo o le Atua faamanuiaga ofoofogia i le lalolagi ma tagata. Ua matagofie ona faaataina mai nei faamanuiaga i inei i le itulau e 12 ma le 13. O le ā se mea o e tagatagai mai i ai i inei e te fiafia tele i ai? [Faatali mo se tali.] Seʻi manatu foi i le ituaiga o olaga o le a iai i se lalolagi e pei o lenei.” Faitau le palakalafa e 12. Afai e faaalia se naunau, fai le fesili lena o loo iai i le palakalafa e 13, ma talanoaina le tali. Ia faasino i ai e faapea, o loo taliina i lenei mataupu le tele o fesili e faatatau i faamanuiaga o le Malo ma o le a e fiafia lua te talanoa i ai i le isi au asiasiga.
5 Atonu e mafai ona e amataina se suesuega i lou faapea atu:
◼ “E toatele lava tagata ua maua tali i a latou fesili faale-Tusi Paia e ala i le faaaogaina o lenei tusi.” Suʻe i le faasologa o mataupu, ma fesili i ai: “O lē fea o nei mataupu e te fiafia i ai?” Faatali mo se tali, ona suʻe lea i le mataupu ua faaosofia ai lo latou fiafia, ma faitau le palakalafa muamua. Faamatala pe faapefea i fesili o loo i le pito i lalo o le itulau ona faamatilatilaina ai manatu autū i palakalafa taitasi. Faataitai i le talanoaina o se palakalafa se tasi pe lua, ma faia se fuafuaga e toe asiasi mai.
6 O le tuliloaina o ni tagata e fiafia i le tusi Ola e Faavavau, ua faaalia ai lo tatou naunau ina ia faaiuina atoatoa la tatou faiva. (2 Timo. 4:5) E mafai ona tatou fesoasoani i a tatou tagata faalogologo ia aapa atu mo le ola e faavavau.—Ioa. 17:3.