Fetufaaʻi le Poto Saʻo e Uiga ia Iesu Keriso
1 I la tatou faiva i le fanua ia Tesema, o le a tatou faatomuaina ai le tusi E Mafai ona E Ola e Faavavau i Parataiso i Le Lalolagi. O le ā o le a e fai atu ai e amata ai se talanoaga faale-Tusi Paia talafeagai, ma o le a faapefea ona e faailoa atu lenei lomiga e sili ona lelei?
2 Faaaogāina a Tatou Sāvali Fou: Ua iloa e nisi tagata talaʻi lo latou taulau manuia i le faaaogāina o sāvali e faagaee ai le naunau o se tagata a o leʻi ofoina atu se isi lomiga. E mafai faapefea ona fesoasoania i tatou ina ia faataunuuina lenei mea? E ala i le faatomua o la tatou sāvali fou Po o le a Faasaoina ea Lenei Lalolagi?
Pe a uma se feofoaiga talafeagai, atonu o le a e faapea atu:
◼ “O loo matou tuufesili i tagata pe latou te ioe o Iesu Keriso o le tagata silisili lea o ē uma na soifua mai. [Faatali mo se tali.] E moni e toatele tagata na latou taaʻina le gasologa o mataupu faaletagata, ma o nisi ua saosaolaumea i le agaʻigaʻi i luma o tagata, ae seʻi matau po o le ā ua tulaga ese ai Iesu mai isi tagata uma lava. [Faitau le Ioane 17:3.] E leai lava se tasi ua iai le mana na te aumaia ai le ola e faavavau i tagata. [Suʻe i le itulau e 3 o le sāvali.] Ina o iai Iesu i inei i le lalolagi, sa ia faamatalaina mea o le a muamua ona tutupu a o leʻi oo i le iʻuga o le lalolagi. Ae sa ia faalaeiauina foi ona soʻo ina ia olioli auā o nei mea tutupu, e iloa ai, ua ‘latalata le faaolataga.’ Pe a uma ona talanoaina puupuu nisi o vala o le faailoga o le faatasi mai o Keriso, ona tataʻi lea i le itulau i tua, lena o loo faaalia ai nisi o faamanuiaga o le pulega a lona Malo.
3 E mafai e se tagata talaʻi talavou, po o se tagata fou, po o se tasi foi e leʻi lava lona poto masani, ona faatomuaina ata i se sāvali e fai ma upu tomua.
I le faaaogāina o le sāvali “Po o le a Faasaoina ea Lenei Lalolagi?,” e mafai e se tagata talaʻi ona suʻe i le itulau e 3 ma le 4 ma faapea atu:
◼ “Matau ata nei e lua, o le tasi o se vaalele o loo faapaʻūū ni pomu i le taimi o le taua, ma le isi o se tamaitiiti ua matelaina i le fia ʻai. [Suʻe i le itulau e 5.] Tagai i nei ata, o se mafuiʻe, ma se tagata maʻi i luga o se moega i le falemaʻi. [Faatali teisi.] Ua faaalia i le Tusi Paia faapea ua toeitiiti ona faaiʻuina lea o nei mea leaga uma.”
4 Afai e foliga mai ua naunau le tagata, ona faitau saʻo lea i ai o le Faaaliga 21:3, 4 mai le Tusi Paia pe taʻua e pei ona sii mai i le itulau e 6 o le sāvali. E faalagolago lava i le naunau ua faaalia, e mafai ona e faamatilatila i ai nisi faamatalaga faaopoopo. A faaalia le naunau moni, ona mafai lea ona e faamatala puupuu atu i ai le fuafuaga atoa o la tatou galuega, tuu i ai le tusi Ola e Faavavau, ma fuafua se toe asiga.
5 Faataatia se Faavae mo se Asiasiga i le Lumanai: E moni, e tusa lava pe sa tatou tuu se sāvali, le tusi Ola e Faavavau, po o se isi lomiga, pe sa na ona faia foi o se talanoaga fiafia, e mafai ona tatou faapea atu: “O le isi taimi pe a ou toe sau, ou te manao ta te talanoa i se mea moni e fiafia ai e faatatau i le aai na fanau ai Iesu.” Ia mautinoa ua matau ma le faaeteete le pogai o le asiasiga ma le naunau na faaalia.
6 Ua ofo mai e le Malo le faamoemoe moni e tasi mo tagata. Seʻi faaalia lo tatou naunau moni e tufa atu i tagata uma tatou te feiloai i ai, le ‘poto saʻo e uiga i le mea lilo paia a le Atua, o Keriso lea.’—Kolo. 2:2.