Faaaogāina o Sāvali ia Maua ai Iʻuga Aogā

¹ Ua lauiloa le faalapotopotoga a Ieova i aso nei i lona taulau manuia i le faaaogāina o sāvali. O le igoa faaletulafono o la tatou faalapotopotoga, o le Watch Tower Bible and Tract Society, e faaalia ai e matuā tāua tele le vaega a sāvali i le faasalalauina atu o le tala lelei. Mai le 1881 e oo i le 1918, e sili atu i le 300 miliona sāvali na tufatufaina atu e tagata o Ieova. O le toatele o i latou o ē na avea ma sui o le vaega totoe o uso o Keriso i lena vaitaimi, na latou uluai maua le upu moni e ala i nei uluai sāvali.

² I le 1987 na toe faamamafa atu ai le faaaogāina o tamai sāvali faatasi ai ma le tatalaina o ni sāvali felanulanuai e fa, na mafai ona maua talu mai lena taimi. Sa faasilasila foi i le Tauaofiaga Itumalo i le 1992 “O Ē Faasusulu Atu le Malamalama” e faapea, o lenei faasologa o sāvali o le a faateleina, i le faaopoopo atu i ai o isi foi sāvali felanulanuai faatupu manatu e fa. O matua o nei sāvali o le Faamafanafanaga mo Ē Loto Mafatia, Olioli i le Olaga Faaleaiga, O Ai Moni o loo Pulea le Lalolagi?, ma Po o le a Faasaoina ea Lenei Lalolagi? Po o e faaaogāina ea sāvali uma e valu ina ia maua ai ni iʻuga aogā i lau faiva?

³ E iai iʻuga lelei e maua mai le faaaogāina ma le uigā o sāvali. E manaomia ai la ona tatou faamasani lelei i sāvali taitasi. Mo se faaaʻoaʻoga, po ua e faitauina ma le faaeteete na sāvali uma ina ia teu ai i lou mafaufau mea o talanoaina i sāvali taitasi? Pe sa e mafaufau ea i le ituaiga o tagata o le a fetaui i ai ia sāvali taitasi? O lou matuā faamasani i sāvali taitasi, o le a atiina aʻe ai lou talisapaia i le faaaogāina o sāvali i le galuega mai lea fale i lea fale faapea foi ma le tele o tulaga e mafai ai ona e avatu se molimau lē fuafuaina.

⁴ Faaaogā i le Faiva Mai Lea Fale i Lea Fale: Ua tusi mai se tasi ovasia matagaluega e faapea: “O loo oʻu maua ni iʻuga lelei e ala i le amataina o le tele o aʻu talanoaga i se sāvali.” Po ua e faataʻitaʻia ea lenei faafeiloaiga? Aiseā e lē faaaogā ai sāvali e fai ma auala e amata ai au talanoaga? Talu ai ua iai sāvali e valu, ua tatou maua ai nei la ni upu tomua faagaee loto se valu e filifili mai ai. O sāvali taitasi, ua aumaia ai ia i tatou se avanoa e amata ai se suesuega faale-Tusi Paia, a lē i le uluai asiasiga, ia po o se toe asiga.

⁵ E iai foi isi avanoa e faaaogā ai sāvali. A o faia se talanoaga i le fale, atonu o le a e iloa ai faapea, na seʻi faatoʻā maliu lava sē pele i lea tagata, ia po o maʻi foi se tasi o le aiga. O tagata o ē ua oo i ai le tele o faanoanoaga po o taumafai e feagai ma ni faigata faaumiumi, e masani lava ona tutupu aʻe ni faalogona lē mautonu ma oo ai i le loto mafatia. Maeu la se agaalofa pe a fetufaʻi ma i latou le feau faalaeiau o loo maua i le sāvali Faamafanafanaga mo Ē Loto Mafatia! Atonu e te iloa ai na faatoʻā uma lava ona tatala le faaipoipoga a lea tagata, po ua leai foi sana galuega. O na mea tutupu e mafai ona pagatia ma matuā āfaina ai lava le aiga. Faaaogā fesili o loo i le itulau e 2 o le sāvali Olioli i le Olaga Faaleaiga: “Aiseā ua lutia ai aiga i aso nei i na faafitauli matuiā? E mafai faapefea ona tatou olioli i le olaga faaleaiga?” Atonu o fesili moni lava na o loo taulamua i le mafaufau o se tagata. E tusa lava pe lē faaalia mai se naunau i lena taimi, ae atonu lava o le a ia faitauina le sāvali mulimuli ane.—Fai. 11:6.

⁶ I nisi faapotopotoga, ua galueaiina soo ai le oganuu, ma e toatele tagata ua uma ona latou maua nisi o a tatou lomiga. E ala la i le faaaogāina o sāvali, o le a tatou maua ai se avanoa e talanoaina ai se mea o fiafia i ai ē ona fale, e faailoa mai ai o latou manatu, ma uunaia ai i latou e mafaufau i le faamoemoe o le Malo. Ia fai atu se fesili latou te mafaufau i ai ina ia mafai ai ona talanoaina i se taimi mulimuli. Ia toe asia, ma ia faatupu atili ai lenei naunau. I se taimi atonu o le a mafai ai ona tatou amataina se suesuega ma i latou e faaaogā ai se polosiua po o se tusi ua uma ona ia i latou.

⁷ Faaaogā Sāvali i Taimi Lē Fuafuaina: Afai e tuu sāvali i se mea e faigofie ona e maua ai—i le taga o lou ofutino, le taga o lou peleue, atotupe, po o le ato talaʻi—o le a mafai ai ona tatou faaaogāina i avanoa eseese, i so o se mea lava e maua i ai tagata. Ia faaaogā a o ō atu e faatau, a o faimalaga, po o le talanoa atu foi i aiga ma tagata asiasi mai. Tatou te gafatia le avanoa e avatu ai se molimau puupuu ona o sāvali. O le sāvali e lē o se mea e faanenefu ai se tagata, ae e tuusaʻo ma magafagafa. E sili atu ona faigofie ona talia se sāvali na i lo o se tusi po o mekasini, ona e pupuu faamatalaga o loo iai.

⁸ Ia mataala i avanoa e ofo atu ai sāvali i se auala lē fuafuaina i le aʻoga po o lou fale faigaluega, i faleʻaiga, i se pamu penisini, ma isi lava nofoaga faapena. Ina ua fuafua se tuafafine e ave lona tinā matua e vaai le fomaʻi, sa ia faamautinoa ua ave ni sāvali i lana ato. I le ofisa o le fomaʻi, sa ia amataina ai se talanoaga ma se tinā o loo maʻitaga. Ina ua ia faaali atu le sāvali Olaga i se Lalolagi Fou Filemu i le fafine, ona fesili atu lea o le tuafafine: “E te manao ea e tausia aʻe lau tama i se lalolagi e pei ona faaatagia i lenei ata?” Sa mafai ona ia tuliloa lena talanoaga i le toe asiasi atu i le fale o le fafine. Ona iʻu ai lea i le faia o ni toe asiga se tele.

⁹ E Mafai ona Amata Suesuega Faale-Tusi Paia i Sāvali: Na lipotia mai e se tasi ovasia matagaluega e faapea, sa mafai e le faapotopotoga lea na ia asiasi atu i ai, ona amataina ni suesuega faale-Tusi Paia i aiga e 64 i lena vaiaso e ala i le faaaogāina o sāvali i le uluai taimi e faafeiloai atu ai i lē ona le fale.

¹⁰ Sa e taumafai ea e ofoina atu se suesuega faale-Tusi Paia i le uluai taimi e asiasi atu ai mai lea fale i lea fale? O le faaaogāina o se sāvali, atonu o le a mafai ai ona e faataʻitaʻia puupuu le auala e faia ai se suesuega. Na faia e se tasi tuafafine lenei mea i le faaaogāina o le sāvali Olaga i se Lalolagi Fou Filemu. I le faasino atu i le ata, na ia fesili atu ai i lē ona le fale pe manatu o ia o le a iai ea se taimi e foliga ai faapena lo tatou lalolagi. Ina ua uma ona tali mai lē ona le fale, ona fai atu lea o le tuafafine na te faitau maia le 2 Peteru 3:13 ma le Isaia 65:17, o mau na o loo faamatilatilaina i le sāvali. Ona faapea atu lea o lo tatou tuafafine: “O nei folafolaga e lē o se miti po o se mafaufauga faavalea, ae o loo iai moni lava i le Afioga a le Atua, le Tusi Paia.” Ona ia fuafuaina loa lea e faaauau le talanoaga i le vaiaso e sosoo ai. I le isi asiasiga, na taliina ai le tele o fesili a le fafine ma na tuu ai le tusi E Mafai ona E Ola e Faavavau i Parataiso i Le Lalolagi. Na iʻu ina faia ai se suesuega faale-Tusi Paia.

¹¹ Po o oe o se tasi faatoʻā uma ona papatiso pe atonu foi o se tagata talaʻi e leʻi papatisoina o lē o loo fia maua se poto masani i lau faiva? Afai o lena, atonu la e te manao e saili i latou e sili atu ona agavaa, ma fesili i ai mo ni a latou fautuaga i le faaaogāina o sāvali i le oganuu a la outou faapotopotoga. E tele faaaʻoaʻoga ua tatou maua mai le Tusi Paia e uiga ia i latou o ē na maua faalaeiauga ma taʻiala mai tagata taʻumatuaina i le faatuatua.—Galu. 18:24-27; 1 Kori. 4:17.

¹² E mafai ona fesoasoani tele le taʻitaʻi o Suesuega Tautusi a le Faapotopotoga i le faia o fuafuaga mo isi e fesoasoani atu ia te oe i le faaaogāina ma le uigā o sāvali. Ua iai i mātua le avega tauave e fesoasoani ai i a latou fanau ina ia agaʻigaʻi i luma i le galuega talaʻi. O se tasi Molimau talavou sa toleni e ona mātua i le ofoina o le sāvali Olaga i se Lalolagi Fou Filemu. A o auai ma lona tinā i le faia o se suesuega faale-Tusi Paia, sa ia ofoina ai se sāvali i le tane a le tagata fiafia. Sa maofa le tane i le iai i lenei tagata talavou o se talitonuga malosi faalelotu. Sa matuā olioli o ia i le faitauina o le sāvali. O taimi uma lava e foi atu ai le teine talavou ma lona tinā, na te faamatala atu ai i le tane ni mau po o ni tala faale-Tusi Paia na ia sauniunia faapitoa lava mo le tane. Ua faitauina nei e lē aunoa e le tamaloa mekasini, ma ua faaalia foi le naunau i le tusi Revelation Climax, ma sa auai foi i nisi o sauniga. Na mafaia nei mea uma ona sa faaalu e mātua se taimi e faatino ai o la avega tauave i le aʻoaʻoina o lo la afafine ina ia faaaogā lelei sāvali.

¹³ Faaaogā ma le Uigā a Tatou Sāvali Fou: I le faaaogāina o le sāvali Po o le a Faasaoina ea Lenei Lalolagi?, e mafai ona e faailoa atu oe lava, ma amata ai loa lau talanoaga i lou faapea atu: “Talofa. O loo matou talanoa atu i tagata e uiga i le tulaga o le olaga i aso nei. Pe e te manatu e mafai ona faaleleia le tulaga o le olaga, po o le a faaauau ai pea ona fāi ifo? [Faatali mo se tali.] Ua manatu nisi faapea o mea o loo tutupu i le lalolagi i aso nei, o le faataunuuga ia o valoaga a le Tusi Paia ma ua latalata mai le iʻuga o le lalolagi. O le ā sou manatu?” Pe a uma ona tali mai lē ona le fale, ona ofo loa lea i ai o le sāvali ma tataʻi mai ai i fesili e tolu na e i le palakalafa lona lua. Ona mulimuli lea i manatu o le sāvali e faaalia ai pe na faapefea ona faaiʻuina se lalolagi muamua, ma o le a faaiʻuina foi lenei lalolagi. A o faaiʻuiʻu le asiasiga, fuafua mo se isi asiasiga mo le talanoaina o faamaoniga a le Tusi Paia e iloa ai ua latalata mai le iʻuga o le lalolagi.

¹⁴ E tele lava taimi tatou te talanoa puupuu ai ma isi i le feau o le Malo, e pei o fale faigaluega ma aʻoga. I lou fale faigaluega, atonu o le a mapuna aʻe ai se talanoaga e uiga i ni tala fou e faatatau i pulega. E mafai ona e ioe faapea e ui lava i taumafaiga uma na faia e taʻitaʻi o ē sa faanaunau mo se iʻuga lelei, ae ua matuā puapuagatia lava le lalolagi i le faagasologa o talafaasolopito. Ona faasino loa lea i le palakalafa faaiʻu i le itulau e 2 o le sāvali O Ai Moni o loo Pulea le Lalolagi? Faitau fesili faatupu manatu e tolu o loo iai. Afai e lē lava le taimi mo se talanoaga puupuu, avatu i le tagata le sāvali ma fai ni fuafuaga e talanoaina nei fesili i se isi taimi pe i se isi nofoaga.

¹⁵ I le avea ma tagata taitoatasi po o aiga, ia faaalu se taimi e talanoa ai i ni auala e taulimaina ai nei sāvali eseese taitasi. Ia fai ni faataʻitaʻiga. E mafai faapefea ona e faaaogā sāvali faatasi ma se isi lomiga o loo faatomua i le faiva i le fanua mo le masina? O ā ni fuafuaga na e faia o faatalitalia e te alu ma ave i ai ni sāvali? Po o le a lua feiloai ea ma se tasi i lenei vaiaso o lē atonu o le a ia maua se aogā mai le feau talafeagai ua ofoina atu e nei sāvali?

¹⁶ O le alofa loloto mo Ieova ma le manatu mamafa mo tagata o le a uunaia ai i tatou e faia mea uma tatou te mafaia e faailoa atu ai le tala lelei. O le faaaogāina soo o sāvali o le a fesoasoani ia i tatou e faia lena mea. O se tasi tama talavou e fitu tausaga lona matua, na manao e fesoasoani i lona tuaoi ina ia oo i le faiga fou, o lea, na ia avatu ai ia te ia se sāvali, ma amataina ai se suesuega faale-Tusi Paia. E foliga mai o se mea e matuā faigofie lava! Ae pe tatou te talisapaia ea lenei faafeiloaiga faigofie i la tatou faiva? O se isi taimi tatou te tuu atu ai se sāvali i se tasi, atonu o le a oo ai foi ina faia se suesuega faale-Tusi Paia. Afai tatou te faaaogā ma le atamai sāvali i le talaʻiina o le tala lelei o le Malo, e mautinoa lava la lo tatou maua ai o iʻuga aogā.