Ia Atiina aʻe le Naunau e Ala i le Faia o ni Toe Asiga Uigā
1 O lauga uma e saunia lelei e aofia ai se upu tomua faatupu naunau, se faamalamalamaga aogā, ma se faaiʻuga e faagaeetia ai. O le upu tomua, e faatosina mai ai manatu o le aofia, ae a aunoa ma le faamalamalamaga ma le faaiʻuga, o le a lē atoatoa la le lauga. E faatatau foi le manatu lena i la tatou faiva. O se mea lelei le faagaeeina o le naunau o lē ona le fale i le uluai asiasiga, ae e tatau ona tatou atiina aʻe pea lena uluai naunau na faaalia e ala i le faia o ni toe asiga uigā.
2 Aiseā ua faataga ai e le Atua mafatiaga? Maeu lena fesili faatupu manatu! E te lē ioe ea o lenei mataupu o loo mafaufau i ai le toatele o tagata i aso nei? O le pogai lena na fautuaina ai e le mataupu o loo i luga, lou lāgā o lenei fesili i le faaiʻuga o le uluai asiasiga ina ia mafai ona taliina pe a faia le toe asiga.
3 Atonu e te faapea atu:
◼ “Talofa. I la ta talanoaga talu ai, na tulaʻi mai ai se mataupu e uiga i le faatagaina e le Atua o mafatiaga, ma sa ou folafola atu ou te toe foi mai ma nisi o faamatalaga mo oe. E toatele tagata ua lagona faapea, pe ana fai o manatu moni mai le Atua ia i tatou, semanū ua ia faaiʻuina nei puapuaga. Atonu o lou lagona foi lea. [Faataga mo se tali mai lē ona le fale.] Ua faamautinoa mai i tatou e le Tusi Paia faapea, o loo manatu moni mai le Atua. [Faitau le 1 Ioane 4:8.] E iai mafuaaga lelei a le Atua mo le faatagaina o mafatiaga e faaauau pea seia oo mai i le asō. O le tasi o na mafuaaga o loo faamatalaina i le 2 Peteru 3:9. [Faitau.] O isi mafuaaga o loo otooto mai i lenei polosiua.” Ona suʻe loa lea i le itulau e 12-14 o le polosiua Po o Silasila Alofa mai ea le Atua ia i Tatou? ma talanoa i se manatu o fiafia i ai.
4 O nisi tagata e ona fale atonu e naunau i se faamatalaga e sili atu ona maeʻaeʻa, ma atonu e talafeagai le faia o ni toe asiga ae latou te leʻi ioe atoatoa i le tali. O nisi o tusi e taʻi 192 itulau a le Sosaiete na o le a faatomua i le masina o Ianuari, o loo iai se mataupu lena e mafai ona faaaogā e faavae ai se isi talanoaga atili i le mataupu.
5 A o e faaiʻuina le talanoaga, ia toe faatū se isi fesili ma taʻu i lē ona le fale o le a e fiafia e fetufaʻi ma ia nisi o faamatalaga faaoso naunau pe a e toe foi atu. E toatele tagata e mananao e fia iloa po o le ā e tupu i le tagata pe a oti. Aiseā e lē fuafua ai e talanoaina lena mataupu i se taimi talafeagai?
6 O le a fesoasoani mo oe le manatua o mataupu silisili faavae e tolu. Ia fetuutuunai. Atonu e lē masani lē ona le fale i le faataatia ese o se taimi faapitoa mo se talanoaga faale-Tusi Paia. Ia faapuupuu. Aua e te nofo umi pe faaaofia le tele o ni mataupu i le taimi muamua. I le tele o tulaga, o le a tele atu ni talilelei mai i au asiasiga pe a e faaaofia na o ni nai manatu i se taimi puupuu. Ia mafana ma faaleuō. Ia faailoa i lē ona le fale lou naunau totino ia te ia ona o se tagata.
7 O lo tatou sini moni o le faaaofia lea o lē ona le fale i se talanoaga faale-Tusi Paia. Ia ona tatou mananao loa lea e amata se suesuega faale-Tusi Paia fuatele i le aiga i se lomiga talafeagai, e pei o le tusi Ola e Faavavau. O lena olioli atonu e mafai ona avea ma āu mea totino pe afai e te atiina aʻe ma le onosai le uluai naunau e ala i le faia o toe asiga uigā.