Faia Suesuega Faale-Tusi Paia i le Tusi Ola e Faavavau

¹ I le faasino atu i le tusi Ola e Faavavau, na faapea mai ai ma le ofo se tasi fafine: “Ua ou iloa faatoʻā ou faitauina lenei o se tusi, e pito atu i le Tusi Paia, i lona matuā saʻo aʻiaʻi, i lona faagaeeina, ma le uunaia ai o aʻu!” Tatou te ioe uma lava o lenei tusi o se tasi o tusi aupito sili ona lelei ua lomia, e fesoasoani i tagata ina ia malamalama i le Tusi Paia, ae maise ina ia uunaia ai i latou e avea o ni ē toaaga e vivii atu ia Ieova.

² I le 1984, o le tausaga lea na tatalaina ai le tusi Ola e Faavavau i le gagana Samoa, e 256 le au talaʻi na latou faia ni suesuega faale-Tusi Paia e 247 i Amerika Samoa ma Samoa i Sisifo. I le taimi nei, e 487 le au talaʻi ua faia ni suesuega faale-Tusi Paia e 504. E oo mai i le asō, e 62 miliona kopi o le tusi Ola e Faavavau ua lomia i gagana e 115. Maeu se aafiaga ua faia e lenei tusi i la tatou galuega i le lalolagi aoao!

³ Faataatitia ni Sini: O lenei tuputupu aʻe mataʻina, o le iʻuga lea o le faamanuiaga a Ieova, atoa ma le filigā o ona tagata e fesoasoani atu i ē loto faamaoni e ala i le feau faasaoola mai le Tusi Paia. (Roma 10:13-15; 1 Timo. 2:4) Ua tatou iloa lelei le faanatinati o le taimi ma ua manaomia ai ona filigā i le folafolaina atu o le Malo o le Atua.

⁴ A o agaʻigaʻi i luma le faalapotopotoga, ae po o faapefea i tatou taitoatasi i a tatou gaoioiga? Po o tatou maumauai ea e faia se sao atoatoa i le galuega sili ona tāua o le faia o soʻo? Ina ia faataunuuina lenei mea, e ao ona tatou faataatitia ni sini totino. Pe e mafai ona tatou matuā filigā atili i le tuliloaina o ē naunau? Aiseā e lē faataatia ai se sini o le amataina o se suesuega fou faale-Tusi Paia i le masina o Fepuari?

⁵ O Ai e Mafai ona Faia se Suesuega Faale-Tusi Paia?: E toatele tagata talaʻi mai talaaga eseese o le olaga ua olioli i le faia o se suesuega faale-Tusi Paia i le tusi Ola e Faavavau. O le faigofie o lona faaupuina ua faafaigofie ai ona faia se suesuega, e oo lava i tagata talaʻi fou, ua mafai ona faia ai se sao i lenei galuega tāua. E lē gata i lena, e toatele foi i tatou ua suesueina totino le tusi, ma ua tatou masani lelei ai ma ona mataupu. O se tasi tagata talaʻi o lē na te leʻi faia muamua lava ni suesuega a o leʻi faaaogāina le tusi Ola e Faavavau, na tusi mai ma le talisapaia: “Ua tolu ni aʻu suesuega, ma o lea ua sauni atu e amata le lona fa. Ua lē lava aʻu upu e momoli atu ai laʻu faafetai mo le faafaigofieina o le faia o suesuega faale-Tusi Paia.”

⁶ E oo foi i le au talavou, o loo faia se sao maelega i le galuega o le faia o suesuega faale-Tusi Paia e ala i le faaaogāina o le tusi Ola e Faavavau. E masani ona tuu e se tasi uso talavou le tusi i luga o lana kesi i le aʻoga. O lenei faiga ua faaava atu ai le auala mo ni talanoaga lelei ma ni suesuega faale-Tusi Paia. E faaaogā e nisi talavou se faafeiloaiga tuusaʻo e ala i le talosaga atu i mātua latou te feiloai i le faiva mai lea fale i lea fale ina ia faatagaina le faia o se suesuega faale-Tusi Paia ma a latou fanau. E lē o matuā laiti a tatou fanau e ono lē mafai ai ona talanoa atu e uiga i le folafolaga a Ieova i le ola e faavavau i se lalolagi parataiso.

⁷ E tusa lava pe talavou pe matua, a o se tasi o olioli aupito sili e mafai ona maua e so o se tasi i le faiva, o le faia lea o se suesuega faale-Tusi Paia i se aiga. O lea, seʻi o tatou taitoatasi ma tatalo mo le fesoasoani a Ieova, ma ia puʻe avanoa uma e folafola atu ai i le lautele lo tatou faamoemoe. Ia faaaogā le tusi Ola e Faavavau e fesoasoani atu ai i isi e aʻoaʻo pe faapefea ona latou faia se sao i le vivii atu i lo tatou Atua, o Ieova.—Sala. 148:12, 13.