‘Ia Aʻoaʻo atu i Mea Uma ua Ou Fai atu ai ia te Outou’
1 O le faia o soʻo e aofia ai le aʻoaʻo atu. A o leʻi avea se tagata ma soʻo o Keriso, e tatau ona aʻoaʻoina o ia ina “ia tausi i mea uma” na poloai atu ai Iesu. (Mata. 28:19, 20) O le auala pito sili ona lelei e faataunuuina ai lenei mea, e ala lea i se suesuega faale-Tusi Paia i le aiga.
2 E lē masani pea ona faigofie le amataina o suesuega faale-Tusi Paia. Afai e faigata ona maua sau suesuega faale-Tusi Paia, aua le lotovaivai. O le taulau manuia i le amataina o suesuega faale-Tusi Paia e manaomia ai le maumauai ma se naunau faamaoni e tufa atu le upu moni i isi.—Kala. 6:9.
3 Atiina aʻe le Naunau: O lau uluai talanoaga e ono maua mai ai na o sina naunau. E mafai ona tuu se sāvali, se polosiua, po o se mekasini i lē ona le fale e fuafua i lona tulaga o iai. Atonu e mafai ona e faaaogāina se tasi o na mea e amata ai se suesuega faale-Tusi Paia i le aiga. Afai e naunau atili lē ona le fale i le feau, e mafai la ona tataʻi o ia i se isi lomiga talafeagai i se isi asiasiga mulimuli ane.
4 O le sauniuni, o le ki lea i le taulau manuia. Aiseā e lē muai fili ai se mau mai le Tusi Paia lena o loo sii mai i le sāvali, i le polosiua, po o se mekasini, ua e fuafua e faaaogā i lau toe asiga? I lena auala, o le a mafai ai ona e faafesootaia faamatalaga mai le lomiga ma lau talanoaga. Atonu e mafai foi ona e faitau saʻo mai le lomiga se palakalafa e tasi pe lua.
5 E mafai ona e fai atu faapea:
◼ “O loo matou fetufai i nisi o faamatalaga e uiga i se valoaga mataʻina lea o loo faataunuuina i le taimi nei lava.” Faitau le Mataio 24:3, ona faafesootai lea ma le ata ma faamatalaga i le itulau e 24 o le polosiua “Faauta!” E mafai foi ona faaaogā se faafeiloaiga faapena pe a taulimaina le sāvali Po o le a Faasaoina Ea Lenei Lalolagi?
6 Pe afai ua mautinoa se naunau faamaoni, e ao lava ona vave tuliloaina. Taumafai ia toe foi atu i ai i se taimi o le vaiaso lava lena, a o tumau pea ona manatua e lē ona le fale le talanoaga talu ai. I taimi taitasi e te asiasi atu ai, ia talanoaina ni nai palakalafa mai le lomiga na e tuua. Ona oo ai lea i se taimi talafeagai, ua mafai loa ona e faailoa atu le tusi Ola e Faavavau, e faaauau ai pea le faaaogāina o le faiga lena.
7 I aso nei, o loo tele pea galuega e ao ona faia i le seleselega tele lea na valoia e Iesu. (Mata. 9:37, 38) A o faaauau pea ona tatou aʻoaʻo tagata loto faamaoni, ua ia i tatou le faamautinoaga faamalosiau a Iesu e faapea ‘o loo iai faatasi o ia ma i tatou e oo lava i le gataaga o lenei faiga o mea.’