Po o le a Tatou Toe Faia Ea?—Se Isi Talosaga mo ni Paeonia Lagolago
1 Po o le a tatou toe faia ea le ā? Po o le a tatou paeonia lagolago ea a o faagasolo le vaitaimi o le Faamanatuga? O le faaopoopoga o La Tatou Faiva o le Malo o Fepuari 1997 na tatai atu ai o tatou manatu i le ulutala ua faamatamata tetele e faapea: “Manaomia—100 Paeonia Lagolago.” Na matou mautinoa sa outou manatu mamafa i lena manaoga. Ina ua tuufaatasi le lipoti faaleauaunaga o Mati o le 1997, sa tatou olioli i le iloaina e faapea e 133 na auai i le auaunaga faapaeonia lagolago! Pe afai tatou te faaopoopoina atu i lena fuainumera le 65 o paeonia sauatoa ma le 9 o paeonia faapito na lipotia mai i lena masina, tatou te iloaina ai toetoe lava o le tasi vae tolu o tagata talaʻi uma sa auai i le auaunaga faapaeonia. Po o le a tatou toe faia ea i le vaitaimi o lenei Faamanatuga?
2 Matou te faamālō atu ma le mafana ia i latou uma na faia taumafaiga faaopoopo e faateleina ai galuega i la latou auaunaga i le fanua i le vaitaimi o le Faamanatuga na teʻa nei. E mautinoa, o outou uma na uunaia e ala i le alofa lē manatu faapito mo Ieova le Atua ma o outou tuaoi. (Luka 10:27; 2 Pete. 1:5-8) I le lalolagi aoao, na faia ai e tagata talaʻi i tulaga eseese o le olaga ni fetuutuunaiga ina ia avea ma paeonia lagolago. I le tasi faapotopotoga, e toʻa 51 tagata talaʻi na paeonia faatasi i le masina lava lena, e aofia ai le toatele o toeaina, o se tinā sa iai lana pepe e 15 masina le matua, o se tuafafine na tuua lana galuega ma maua ai se galuega faavaitaimi ina ia mafai ai ona ia paeonia, ma se tuafafine matua sa lei paeonia muamua lava. Na tusi faapea le ovasia matagaluega: “O se taumafaiga maoae ua faia nei i le galuega talaʻi. . . . Ua lē na ona iai o se aafiaga i le oganuu ae ua faagaee ai le aasa o faapotopotoga. Ua olioli uso i le iloa lelei e le tasi o le isi e faapena foi i le vaaia o iuga lelei i le faiva.”
3 Na aofia ai ma tagata talavou i le tausaga na teʻa nei. Na tulimataia e se tagata talaʻi e lei papatisoina e 13 tausaga le matua mai le Iunaite Setete le taimi o le a mafai ona ia faailoa atu ai lona tuuina atu ia Ieova. Ina ua uma ona papatiso ia Fepuari, na ia tusia lona faanaunauga e fia avea ma paeonia lagolago ia Mati: “Ina ua leai se mea e taofia mai ai aʻu na ou faia loa laʻu talosaga. . . . O mea ofoofogia e tele na tutupu na matou olioli ai e lē tāitai ona moni pe ana leai la outou valaaulia alofa e paeonia. Ou te faafetai tele ia Ieova ona o le maua o lenei faaeaga o le avea ma se tasi o i latou e 100,000 na tali atu.” Na ia faataatia se sini e toe faia ai faapea.
4 Atonu na avea oe ma se tasi o le 133 o ē na auai i le galuega faapaeonia lagolago ia Mati na teʻa nei, po o le 105 ia Aperila, po o le 80 ia Me. Po o le a e toe faia ea i lenei tausaga? Pe afai na lē mafai ona e paeonia i le vaitaimi o le Faamanatuga na teʻa nei, pe mafai ona e paeonia i lenei tausaga? Pe mafai ona tatou faateleina le 133, o le fuainumera pito sili lena ona toatele o paeonia lagolago i so o se masina lava e tasi i le lālā a Samoa?
5 Taulai Atu ia Aperila ma Me: O le tausaga lenei, e paʻū ai le Faamanatuga i le Aso Toonai, aso 11 o Aperila, o lea ua avea ai Aperila ma masina e sili ona lelei mo le faateleina o galuega i le faiva. (2 Kori. 5:14, 15) A o faagasolo uluai aso e 11 o le masina, o le a tatou uaʻi atu ai i le valaauliaina o le toatele e mafai ai o ē fiafia e auai i le Faamanatuga. Pe afai o e fuafua e paeonia lagolago, faamolemole ia faaoo atu lau tusi talosaga a o mamao le aso e te manao e amata ai.—1 Kori. 14:40.
6 Talu ai o Me e lima faaiuga o vaiaso, e ono faigofie ai la i tagata talaʻi e aʻoʻoga pe faigaluega faataimi atoa i galuega totogi ona paeonia lagolago i lena masina. E ala i le faia o le faasologa ina ia maua ai le sefulu itula i le auaunaga i le fanua i faaiuga o vaiaso taitasi e lima, o le a na o le sefulu ai la itula faaopoopo e te manaomia i le masina ina ia ausia ai itula manaomia e 60.
7 A o faagasolo masina e lua o Aperila ma Me, o le a tatou faalauiloa atu ai kopi taitasi o Le Olomatamata ma le Ala Mai! o lomiga o le ofo. E tatau ona faalaeiauina e lenei mea le toatele o i tatou e aapa atu e paeonia. Aisea ua tatou faapea ai? O mekasini e faigofie ona ofo atu ma o se mea fiafia le faaaogaina i le faiva. Ua aogā mekasini i vala uma o le auaunaga—galuega i le fale i le fale ma le faleoloa i le faleoloa, e faapena foi pe a tatou faalatalata atu i tagata i magaala, o mea e paka ai taavale, ma paka, ma isi vaipanoa e mafai ona molimau atu ai. O le mea e sili ona tāua, e lagolagoina upu moni o le Malo e Le Olomatamata ma le Ala Mai! E tataiina mai e mekasini manatu i le faataunuuga o valoaga o le Tusi Paia, e faamaonia ai ua pule le Malo o le Atua. Ua pāʻia ai foi olaga o le au faitau e ala i le feagai ai ma le malamalama i manaoga moni o tagata. Pe afai tatou te manatunatu i le auala na pāʻia ai o tatou olaga e ala i nei lomiga tāua, o le a uunaia ai la i tatou e faia se sao i le tufaina atu i le tele e mafai ai ia Aperila ma Me.
8 I le sauniuni atu mo lenei galuega mekasini tele, o le a aogā ai ia te oe le autaluina o nei mataupu: “Le Olomatamata ma le Awake!—O ni Mekasini o le Upu Moni mo le Taimi Tonu.” (Olomatamata, Ianuari 1, 1994), “Ia Faaaogā i se Auala e Sili ona Lelei a Tatou Mekasini.” (La Tatou Faiva o le Malo, Setema 1995), ma le “Sauniuni Lau Lava Taulimaga o Mekasini” (La Tatou Faiva o le Malo, Oketopa 1996).
9 Toeaina e Taimua: Ina ia fesoasoani i le toatele o tagata talaʻi o ē sa paeonia i le vaitaimi o le Faamanatuga na teʻa nei, sa faataatia ai e toeaina o le tasi faapotopotoga le Aso Toonai e tasi o le masina e fai ma aso faapitoa o le galuega o le auaunaga mo le faapotopotoga atoa. Na faia fuafuaga ina ia feiloai ai i le tele o taimi eseese o le aso, e tuuina atu ai i ē uma o le faapotopotoga se avanoa e fai ai se sao i vala eseese o le galuega molimau. E aofia ai i nei mea le galulue i pisinisi, molimau atu i magaala, asiasi atu mai lea fale i lea fale, faia o toe asiga, tusia o tusi, ma le molimau atu i telefoni. Na uigaese le tali mai, faatasi ai ma le 117 o tagata talaʻi na auai atu i le auaunaga i le fanua a o faagasolo le aso. Ina ua latou faaopoopo faatasi o latou taimi na faaaluina i le faiva na maua ai le 521 itula ma le 617 o mekasini, polosiua, ma tusi sa latou tuuina! Na iai pea le olioli tele i lena Aso Toonai seia oo mai i le Aso Sa, i le tumutumuga fou o le aofia na auai i le Sauniga i le Lautele ma le Suesuega o Le Olomatamata.
10 I Sauniga taitasi o le Auaunaga ia Aperila ma Me, e tatau ona faamanatu atu i le faapotopotoga le nofoaga ma le taimi e feiloai ai mo le auaunaga i le fanua a o faagasolo le vaiaso e sosoo ai, ae maise lava pe afai e faia nisi faatulagaga faaopoopo nai lo o faasologa e masani ai. O paeonia sauatoa faapena foi ma tagata talaʻi o ē e lē o paeonia lagolago e faalaeiauina e lagolago nei faatulagaga a vaega pe a talafeagai ma o latou tulaga.
11 O le ovasia o le auaunaga o le a manaomia ona talanoa ma le uso e tofia oganuu ina ia faia ni faatulagaga mo le galueaina o oganuu ia e seāseā faia. E ao ona faamamafa le uaʻi atu i aiga e lei maua ai nisi ma molimau atu i magaala ma mai lea faleoloa i lea faleoloa. E mafai ona faamamafa le molimau atu i afiafi, ae maise i nofoaga ia e faatelevave a latou taimi i le itula e tasi ina ia uumi ai afiafi i le faaiuga o le vaiaso muamua o Aperila. E tatau ona ota ia lava mekasini mo Aperila ma Me auā le āloālo atu mo le faateleina o galuega.
12 Toatele Tagata Talaʻi e Mafai Ona Agavaa: O loo taʻua e le fuaiupu muamua o le tusi talosaga mo le paeonia lagolago e faapea: “Talu ai loʻu alofa mo Ieova ma loʻu faanaunauga e fesoasoani i isi ia iloa o ia ma ana fuafuaga alofa, ou te manao ai e faateleina soʻu sao i le auaunaga i le fanua i loʻu auai lea o se paeonia lagolago.” O le alofa mo Ieova ma manao e fesoasoani faaleagaga i isi e faavae ai lo tatou tuuina atu. (1 Timo. 4:8, 10) Ina ia agavaa mo le paeonia lagolago, e tatau ona papatisoina se tasi, ia lelei le tulaga tau amio, ma ia iai i se tulaga e mafai ona ausia ai le 60 itula i le faiva mo le masina. A o tatou iloiloina uma o tatou tulaga, pe e mafai e nisi o i tatou o ē e lei paeonia muamua ona faia faapea i lenei tausaga ia Aperila ma Me?
13 O le toatele i le faapotopotoga e manatu faapea e mafai foi ona latou paeonia pe a latou vaai atu i isi e tutusa o latou tulaga ua avea ma paeonia. O tamaiti aʻoga, o ē matutua, tagata faigaluega faataimi atoa i galuega totogi, e aofia ai toeaina ma auauna o le faiva, ma isi ua taulau manuia i le paeonia lagolago. O se avā tausi aiga ma o se tinā e toalua sana fanau sa iai sana galuega faataimi atoa na ausia le 60 itula, na tuuina atu mekasini e 108, ma amataina ni suesuega faale-Tusi Paia se 3 i le masina e tasi na paeonia lagolago ai. Sa faapefea ona ia faia faapea? Na ia faaaogaina lona itula e ʻai ai i le aoauli i le galuega e molimau atu ai i oganuu e latalata ane, na molimau atu e ala i le tusia o tusi, ma molimau atu i mea e paka ai taavale ma magaala. Na te faaaogā lelei foi lona aso mālōlō mai le galuega i vaiaso taitasi e ala i le auai i le auaunaga i le fanua faatasi ma le faapotopotoga. E ui lava sa ia muai mafaufau e faapea o le paeonia lagolago o se sini e faigata ona ausia, ae o faamalosiauga mai i isi ma se faasologa aogā, na foia ai faafitauli.
14 Na faamautinoa atu e Iesu i ona soo: “E avegofie laʻu amo, o laʻu avega foi e māmā ia.” (Mata. 11:30) O le ulutala lena o se mataupu faalaeiau o Le Olomatamata o Aokuso 15, 1995. O loo taʻua ai se tuafafine sa iai sana galuega totogi faataimi atoa, e iai ma le tele o omiga. Pe na ia manatu ai sa lē mafai ona ia paeonia lagolago? Leai. O le mea moni, na mafai ona ia paeonia lagolago i masina taitasi. Aisea? Talu ai na ia lagona e faapea, o le paeonia e fesoasoani moni ia te ia ina ia tausia ai lona paleni. O le fesoasoani atu i tagata a o latou aʻoaʻoina upu moni o le Tusi Paia ma vaaia i latou ua suia o latou olaga ina ia maua ai le faamaoniga a le Atua o le puna sili lena o le olioli i lona olaga pisi.—Faata. 10:22.
15 So o se faataulagaina totino ma ni fetuutuunaiga e manaomia ona fai e se tasi ina ia mafai ona paeonia, o le a matuā tauia lava i faamanuiaga e maua mai ai. Na tusia e se tuafafine lona faalogona ina ua paeonia lagolago: “Na fesoasoani i loʻu mafaufau ina ia ou lē manatu ai tau o aʻu lava ae ia sili ona ou manatu mamafa e fesoasoani i isi. . . . Ou te fautuaina i latou e mafai ona faia ia faia faapea.”
16 E Manaomia se Faasologa Lelei: I le itulau mulimuli o lenei faaopoopoga, ua matou toe faia ai faasologa faaaʻoaʻo ia na faailoa mai e La Tatou Faiva o le Malo o Fepuari 1997. Atonu o se tasi o nei faaaoaoga e fetaui ma lou tulaga. A o e autaluina nei faaaoaoga, iloilo lau faasologa masani o galuega faalemasina. O ā ni galuega a le aiga e ono mafai ona vave fai a o lei faia lau paeonia pe e mafai ona faataatia ese foi seia maeʻa? Pe e mafai ona tuuesea nisi o taimi o loo e faaaluina i faafiafiaga, tafaoga, po o isi ituaiga o evaevaga? Nai lo le vaai i le aofai o itula e 60 ia e manaomia, fuafua lau faasologa mo aso taitasi pe faalevaiaso. E na o le 2 itula i le aso po o le 15 itula i le vaiaso e manaomia mo le paeonia lagolago. Tagai i faasologa faaaʻoaʻo, ma se penitala, vaai po o le ā se faasologa totino o le auaunaga e te mafaia ona galueaina e fetaui lelei ma oe ma lou aiga.
17 O le tali lelei mai ma le lagolagosua faaopoopo a le faapotopotoga na faaalia mo le faiva i le vaitaimi o le Faamanatuga na teʻa nei na uunaia ai le aasa o se paeonia sauatoa na faapea mai: “Faafetai tele lava mo a outou faalaeiauga alofa i le faia o se taumafaiga faaopoopo e lagolagoina ai le auaunaga faapaeonia lagolago. . . . O a outou faasologa na fautuaina mai na fesoasoani i le toatele e lei mafai ona paeonia muamua ina ia iloa e mafai ona latou paeonia foi. . . . Ua ou fiafia lava e avea aʻu o se vaega o le faalapotopotoga a Ieova ma mulimuli i le taitaiga alofa a le auauna faamaoni ma le mafaufau.”
18 Ua faamautinoa mai e le Faataoto 21:5 ia i tatou e faapea: “O mafaufauga o e filigā i galuega, na o le mau mea e iu i ai.” Ua faalaeiau mai le Faataoto 16:3 ia i tatou e faapea: “Ia e tuuina atu ia Ieova o au galuega; ona faamauina ai lea o ou manatunatuga.” Ioe, e ala i le tatalo e faaaofia ai Ieova i a tatou filifiliga ma faalagolago malosi ia te ia e fesoasoani mai ina ia tatou taulau ai, e mafai ai ona tatou mautinoa e faatatau i a tatou fuafuaga e paeonia lagolago. Pe afai e sologa lelei la tatou faasologa i se masina po o ni masina se lua e paeonia lagolago ai, o le a mafai la ona tatou togiina le pusa lea o loo i le talosaga mo le paeonia lagolago lea e faitauina e faapea: “Tosi i ī pe afai e te manao e faalausosoo lau auaunaga paeonia lagolago seia toe logo atu.” E tusa lava po o le ā le tulaga, e mafai ona tatou tulimatai atu Aokuso e toe paeonia lagolago ai, ona e lima faaiuga o vaiaso. Pe a tatou oo atu i le faaiuina o le tausaga faaleauaunaga ia Aokuso, o le a faia ai se taumafaiga maopoopo lelei mo tagata uma ina ia auai i le tele e mafai ai i le faiva.
19 Na valoia mai e Iesu e faapea: “O lē faatuatua mai ia te au, e faia lava e ia o galuega ou te faia; e fai foi e ia mea e sili i ia mea.” (Ioa. 14:12) O lo tatou faaeaga e olioli ai le auauna o ni aumea faigaluega a le Atua a o faataunuuina i se auala ofoofogia lenei valoaga. O le taimi lenei e talaʻi ai le tala lelei i le malosi sili e mafai ai, ia sema le taimi avanoa e faia ai lenei galuega. (1 Kori. 3:9; Kolo. 4:5) O le faia o se sao i taimi uma e mafai ai i le auaunaga paeonia lagolago, o se auala sili ona lelei lea e faia ai sa tatou vaega o ni ē folafola le Malo. Tatou te faatalitali ma le naunautai e vāai i le uigaese o le a faia e le pese o viiga mai paeonia lagolago i le vaitaimi o lenei Faamanatuga. (Sala. 27:6) Pe a toe mānatu i iuga na maua mai i le tausaga na teʻa nei, ua tatou tau mānatu ai, ‘Po o le a tatou toe faia ea?’ Tatou te mautinoa o le a tatou faia lava!
[Pusa i le itulau 3]
Pe Mafai ea Ona E Paeonia Lagolago?
“Po o le ā lava lou tulaga totino, ae afai ua e papatiso, e lelei lou tulaga tau amio, e mafai ona fai ni faatulagaga e ausia ai itula manaomia e 60 i le masina i le faiva i le fanua ma talitonu e mafai ona e auauna i se tasi se masina po le sili atu foi e avea o se paeonia lagolago, o le a fiafia toeaina o le faapotopotoga e iloiloina sau tusi talosaga mo lenei faaeaga o le auaunaga.”—Organized to Accomplish Our Ministry, itulau 114.