Vilivilitai e Saili Suesuega Faale-Tusi Paia
1 Ua matuā iloa lava le utiuti o le taimi o totoe mo lenei lalolagi tuai. (2 Timo. 3:1-5) O le ā le uiga o lena mea? O lona uiga o loo i se tulaga lamatia ola o tagata. Ae mafai ona tatou fesoasoani i nisi ina ia faasaoina. (Faata. 3:27) Ona o lenei mafuaaga, e ao ai ona tatou taumafai vilivilitai e amata ma faia ni suesuega faale-Tusi Paia.
2 E tele mea lelei ua faataunuu ona o le tufatufaina o a tatou lomiga faale-Tusi Paia. Ae sili ona manaomia e tagata le fesoasoani totino, e ala i le faia e lē aunoa o se suesuega faale-Tusi Paia i aiga. Pe mafai faapefea ona tatou fesoasoani atu ina ia latou talisapaia lea faatulagaga?
3 E mafai ona tatou faatutu atu fesili o loo atugalu i ai le toatele o tagata. O fesili faapena e mafai ona faaautu i le pogai ua matuā faaitiitia ai amioga mamā, le pogai ua matuā lē mausali ai le olaga faaleaiga, le pogai ua avea ai le faasaua ma solitulafono o se faamataʻu, le pogai ua faataga ai e le Atua alofa tulaga o loo iai nei, ma isi lava mataupu. Ia e nofouta i mataupu ma mea tutupu o loo naunau patino i ai tagata o lau oganuu. Ia faasino atu i tali manino a le Tusi Paia e tusa ai ma nei fesili. Ia faailoa atu le auala e mafai ai e lomiga o loo tatou tufatufaina, ona fesoasoani ia i latou i le aʻoaʻoina o mea o fai mai ai le Tusi Paia e faatatau i nei mea ma isi mataupu tāua o loo aafia ai i tatou uma.
4 E tāua le faaaofia o lē ona le fale i le talanoaga. Ia e nofouta e talanoa mea o ia atugalu i ai. Ia fafau aʻe le lua talanoaga i mea o ia naunau i ai po o mea foi o loo popole i ai. Ia tatai atu manatu i faamatalaga o loo i se tusi, se polosiua, se mekasini, po o se sāvali o loo faamatalaina ai le vaifofo a le Tusi Paia i faafitauli o tagata. Ae e te leʻi tuua le fale, ia faatulai se fesili e tasi pe lua e te talitonu o le a tupu ai sona naunautai e faatali mai le isi au asiasiga. Pe a e toe foi i ai, ia mautinoa lou faamanatu atu ia te ia o nei fesili, ona faaaogā loa lea o le lomiga e fesoasoani ai ia te ia ina ia ona iloa tali a le Tusi Paia.
5 O lo tatou amataina o suesuega ma le faia e lē aunoa, e mafai ona suia ai olaga o tagata. E manaomia ona tatou faaalia le naunau moni i popolega o i latou tatou te fetaiai i le fanua po o ni tulaga e leʻi fuafuaina. E manaomia ai sauniuniga lelei ina ia tuputupu aʻe ai pea lo latou naunau fiafia. E manaomia ai le onosai e tuuasiasi atu pea seia oo lava ina e fafagaina faaleagaga i latou i se tulaga faifai pea. E manaomia ai se naunau alofa i tagata. E tatau ona tatou mananao moni lava e fesoasoani ia i latou ina ia faasaoina mai le faaumatiaga o loo faaloloi mai. E ao ai ona avea la tatou galuega o le faia o suesuega faale-Tusi Paia ma mataupu o tatalo faifai pea ma vilivilitai i ai.—1 Tesa. 5:17.
6 Ua sili ona faalaeiauina le vaai atu ua toeitiiti atoa le miliona o tagata ua avea ma soʻo papatiso i tausaga e tolu ua tuanai. (Mata. 28:19, 20) O loo tatou faia nei le tusa o le fa ma le ʻafa miliona o suesuega faale-Tusi Paia i masina taitasi, ma ua faaalia ai lo tatou manatu mamafa mo ola o isi. Ae faapefea oe? Po o faia ea ni au taumafaiga vilivilitai ina ia e auai i le galuega o le faia o suesuega faale-Tusi Paia i aiga? Ia manatua, e faalagolago o tatou ola ma ola o isi, i lo tatou faamaoni i lenei itu.—Eseki. 3:17-19.