Fesoasoani i Isi ia Iloa le Oa Sili
1 Pe a tatou talaʻi atu i isi le tala lelei o le Malo, o se tasi o o tatou sini, o le fesoasoani lea i ē loto faamaoni ina ia talisapaia le tāua silisili o le Afioga a le Atua. (Fili. 3:8) O a tatou lomiga faale-Tusi Paia ua iai sa latou vaega tāua i le faasalalauina o le feau o le Malo. Mo se faaaoaoga, ua fesoasoani le tusi o le Ola e Faavavau i le faitau selauafe o tagata ina ia auauna ia Ieova, ona o upu moni o le Tusi Paia ua latou aʻoaʻoina ai.
2 E tele nisi mea o loo aofia i la tatou faiva na i lo le tau ina tuu o lomiga i so o se tasi o loo naunau e ave. E manaomia ona tatou faatomua atu le feau i se uiga tausaafia, ia faalogo ma le naunautai i mea o loo fai mai ai lē ona le fale, ona sauni loa lea e ‘faatalitonu o ia i manatu mai le Tusi Paia.’—Galu. 17:2.
3 E Faia Faapefea Lenei Mea? O ā tatou faatomuaga e mafai ona tatala ai le auala mo ē ona fale ina ia faaalia pe latou te naunau moni i le Tusi Paia ma le feau o loo iai.
E mafai ona e faapea atu:
◼ “O loo matou asiasi mai e talatalanoa i le uiga o mea o loo tutupu i lo tatou siomaga i le lalolagi i aso nei. O le toatele o tagata ua faaitiitia le naunau i le Atua ma ana faatulagaga mo le olaga, e pei ona faataatitia i le Tusi Paia. Ua iai se aafiaga tele o lenei mea i uiga o tagata i le va o le tasi ma le isi. Po o e matauina ea lenei mea? [Faataga mo se tali. E te ono faasino atu i ni mea patino o tutupu.] Faamolemole seʻi mātau mai uiga o i latou ia e taʻua i le 2 Timoteo 3:1-5, ona e taʻu mai lea ia te aʻu pe e te manatu o le tulaga lea ua iai le lalolagi i aso nei. [Faitau] Pe iai ea se pogai talafeagai e faatalitalia ai ni tulaga lelei i le lumanai?” Afai e faaali mai le naunau fiafia, ona faasino lea i le ata i itulau e 12 ma le 13 o le Ola e Faavavau ma tatai ona manatu i palakalafa e 12 ma le 13. Afai e lē tele se naunau fiafia, e mafai ona ofo i ai le sāvali o le Lalolagi Fou Filemu.
4 Afai e faafeiloai mai oe e se matua, atonu tatou te amataina faapenei la tatou talanoaga:
◼ “O loo matou talanoa i tagata o ē naunau e fia iloa se auala e sili atu ona lelei e mafai ona tatou faafetaiaia ai faafitauli o le olaga faaleaiga. Tatou te taumafai uma lava e faia le mea e sili ona lelei tatou te mafaia, peitai afai o iai se isi mea e mafai ona fesoasoani ia i tatou ina ia atili manuia ai, o le a tatou fiafia la i ai, a ea? [Faataga mo se tali] Ua aumaia i le Tusi Paia taiala i lenei mataupu, e pei ona taʻua i le Kolose 3:12-14. [Faitau] O le ā la e manaomia ina ia olioli ai i se olaga manuia faaleaiga? Seʻi mātau le mea o loo taʻua i lenei lomiga i le mataupu ua faaulutalaina ‘Faia o Lou Olaga Faaleaiga ia Fiafia.’ ” Faitau le palakalafa e 3 i le itulau e 238 o le tusi Ola e Faavavau. Afai o tele ni mea o loo fai a lē ona le fale, pe lē o ano lelei mai foi, taumafai e ofo atu i ai se mekasini fou o loo talanoaina ai mataupu faaleaiga, po o le sāvali o le Olaga Faaleaiga Fiafia.
5 E lē taitai ona tatou mananao e mou atu lo tatou sini i le tuuina atu o se molimau maeaea e uiga i le Malo. (Mata. 24:14) O le faaaogāina lelei o le Tusi Paia ma sauniuniga matagofie o lomiga faatiokarate ua tatou mauaina, e mafai ai ona tatou faatalitali atu ma le mautinoa ia Ieova mo lana faamanuiaga i le faataunuuina o lona finagalo i nei taimi e sili ona tāua.—Kala. 6:9.