Faagaee le Tuputupu aʻe e Ala i Toe Asiga Uigā
1 Ina ia fesoasoani ia i latou o ē na faaalia le naunau, e matuā tāua lo tatou faaauau ona saunia mo i latou o se gasologa o meaai faaleagaga e ala i le toe asia e lē aunoa. O a tatou asiga o le a fesoasoani mālie e faagaee lo latou tuputupu aʻe faaleagaga. (1 Kori. 3:6-9) Ae ina ia uigā a tatou asiga, e manaomia ona tatou sauniuni mamao, i le iai o lena tagata i le mafaufau.
2 Toe Asia i Latou na Tatou Tuua ai se Sāvali: Atonu sa tuua le sāvali Lalolagi Fou Filemu i le uluai asiga.
A maeʻa ona autalu puupuu mea sa talanoaina, atonu tatou te siligia se mea faapenei:
◼ “O le ā le pulega e mafai ona aumaia nei suiga? [Faataga mo se tali.] E lē masalomia o oe foi o le a fiafia e ola i tulaga faapenei. E mafai faapefea ona tatou olioli totino i ia tulaga?” Ona mafai lea ona iloiloina faamatalaga i lalo o le tamai ulutala “Le Auala e Mafaia ai mo Oe.” Afai e faaalia le naunau, e mafai ona tatai le uai i le tusi Ola e Faavavau, mataupu e 15, “Ia Avea Ma se Tagatanuu o Le Pulega a Le Atua.” Atonu tatou te talanoaina palakalafa muamua e lua ona siligia lea o le fesili: “E ao faapefea ona aafia i tatou i le aʻoaʻoina e faatatau i le Atua?” Atonu e faia ni fuafuaga e talia le fesili ma ia talanoa atili i le mataupu i le asiga e sosoo ai.
3 A toe asia i latou na tuua ai le polosiua “Po o Silasila Alofa mai ea le Atua ia i Tatou?,” atonu tatou te faapea atu:
◼ “I le taimi mulimuli na ou asiasi mai ai, sa ta talanoaina le tele o faafitauli ua fesagai ma tagata, ma mea na folafola mai e le Atua o le a ia faia i ai. Ae aisea ua faataga umi ai e le Atua puapuaga? O le tali faatupu manatu ua maua lea i le vaega e 6 o le polosiua sa ta vaai i ai.” Fesili i lē ona le fale e aumai lana kopi pe a talafeagai. A maeʻa le iloiloina o ni nai palakalafa, atonu tatou te siligia faapea: “O le ā e ao ona tatou faia ina ia aogā ia i tatou folafolaga a le Atua?” O faamatalaga i lalo o le vaega e 11, “O loo Saunia Nei le Faavae o le Lalolagi Fou,” itulau e 28-31, atonu e faamatilatila mo le talanoaga i le isi asiga.
4 Toe Asia i Latou na Tatou Tuua ai Mekasini: Afai na e filifilia se mataupu patino na naunau i ai lē ona le fale, ia faalautele manatu faaopoopo mai le mataupu pe a e toe foi, taulai ou manatu i se mau autū e tasi ma faamatalaga o loo talanoaina ai. Afai o iai pea le naunau, ona talanoaina lea o aogā o mekasini. Atonu e tatai foi le uai i le isi lomiga o le mekasini pe afai o iai se mataupu o loo talanoaina le manatu lea e tasi. A lē o lena, atonu tatou te tatai le uai i faamatalaga i le tusi Ola e Faavavau i lena lava mataupu, ma fai fuafuaga e talanoa i ai i la tatou asiga e sosoo ai.
5 O lo tatou faaalia o le naunau totino i le tuliloaina o toe asiga uigā, o le a faataitaia ai lo tatou alofa mo tagata ma mo Ieova. (Ioa. 13:34, 35) Seʻi o tatou faaauau ona faagaee le tuputupu aʻe faaleagaga o i latou i la tatou oganuu, i le faia e lē aunoa o toe asiga uigā.