Taofi Mau i le Faamoemoe ua Tatou Taʻutino atu ma le Lē Fefoifoiai
1 O le Suesuega o Le Olomatamata, o le auala autū lea ua saunia ai “mea e ʻai [faaleagaga] i ona itu aso” mo tagata o le Atua i aso nei. (Mata. 24:45) Tatou te auai i lenei sauniga tāua ma taulaiga autū e lua—ina ia fausia aʻe faaleagaga ma ia taʻutino atu i isi i le lautele lo tatou faamoemoe.—Epe. 10:23-25.
2 Aogā ia i Tatou Lava: O loo fuafuaina faapea, i le tele o faapotopotoga, na o le tasi vae tolu o le aofia e suesueina mamao i le lesona. Pe ā ma le numera lava lena e tasi e saosaolaumea i le faia o tali. O meaai aano faaleagaga e taulimaina i le Suesuega o Le Olomatamata, e lē mafai ona aveina atoatoa i totonu a o faagasolo le sauniga. E manaomia ona e tuuese se taimi e suesue mamao ai faamatalaga.
3 Pe a sauniuni mo le suesuega, atonu e te maua le aogā i le faitau muamua ma mafaufau i fesili i le pusa o loo lata i le faaiuga o le mataupu. E mafai e nei fesili ona fesoasoani i lou uai atu i manatu autū o le a iloiloina i le lesona.
4 A o faagasolo le suesuega, faafofoga ma le faaeteete i mea o taʻua. Faalogo ma le lē gāse i uluai faaupuga a le faisuesuega; o faaopoopoga nei e amata ai le suesuega. Atonu na te faatū ni fesili se tolu pe fa o le a taliina, pe atonu o le a ia autaluina nisi o mea matilatila mai le lesona o le vaiaso ua teʻa, pe afai o le lesona o le vaiaso nei o le faaauauga o le mataupu lea e tasi. Afai e iai ni fetuutuunaiga i lo tatou malamalamaga i se valoaga a le Tusi Paia po o se mataupu silisili faale-Tusi Paia, o le a ia faauai atu i tatou i lenei mea. O le mea moni, e tatau ona pupuu faaopoopoga a le faisuesuega, talu ai o le tasi o fuafuaga o le suesuega, o le avatu lea i le faapotopotoga o se avanoa e faaleo ai lo latou faamoemoe. Faalogo ma le faaeteete a o tali mai isi i mea ua latou aʻoaʻoina; e fesoasoani lenei e faamalosia ai lou faatuatua.
5 Taʻutino Lou Faamoemoe: Pe e te ofo atu ma le lē aunoa faaopoopoga a o faagasolo le suesuega? O tali pupuu, tuusao e sili ona talia. (Faatusatusa i le Luka 21:1-4.) O se tali faigofie mai le loto e talisapaia e tagata uma. E masani o le tali muamua i se fesili e ao ona puupuu ma tuusao. E faataga e lenei faiga isi e taʻua se mau po o le uai atu i se auiliiliga i le palakalafa. I lenei auala, e mafai ai e le toatele ona folafola i le lautele lo latou faamoemoe. E ao i faaopoopoga ona mautinoa ma faamalosia ai i taimi uma.
6 Afai faatoʻā amata ona e auai i le suesuega pe o e poepoevale e faatatau i le faia o se tali, atonu e te manao e siligia le faisuesuega mo se fesoasoani. Talosaga atu ia te ia e vaai mo lou lima pe a iloiloina se palakalafa patino. Atonu e te ofo atu e faitau se mau o loo faasino mai ma faia se faatatauga puupuu i lona uiga. Atonu e te faia ni nai faamaumauga i autafa o le itulau e fesoasaoni ia te oe e manatua mea e te manao e taʻua pe a e tali. Afai o oe o se tagata talavou laitiiti, ia manatua o au faaopoopoga e talileleia ma talisapaia.—Mata. 21:16.
7 E matuā tāua le faaleo o lo tatou faatuatua, ma ua saunia e le Suesuega o Le Olomatamata se avanoa lelei e faia ai faapea. Afai e te faatalatu e tali, ia faia le mea e te mafai e manumalo ai i le faafitauli, ma ia faamalosia oe lava e faia se tali a itiiti mai e tasi. O le a e faia sou sao i le sauniga, ma o le a lelei ai ou faalogona pe a e faia faapena. O lea, aisea e lē fuafua ai e avatu a itiiti e tasi se faaopoopoga i le isi Suesuega o Le Olomatamata lena o le a sosoo mai?—Faata. 15:23.