Ovasia o Loo Taimua—Le Fai Suesuega o Le Olomatamata
1 O Le Olomatamata e Faasilasilaina le Malo o Ieova, o se sauniuniga autū lea a “le auauna faamaoni ma le mafaufau” mo le faasoaina mai o meaʻai faaleagaga ia i tatou ‘i ona itu aso e tatau ai.’ (Mata. 24:45) O le toeaina o lē na te faia le Suesuega o Le Olomatamata, ua ia te ia se matafaioi tāua i le avea o se faiaʻoga tomai o lē na te faataatia se faaaoaoga lelei i le olaga faa-Kerisiano.—Roma 12:7; Iako. 3:1.
2 Ina ia aʻoaʻo atu ma le uigā, e tatau ai i le fai Suesuega o Le Olomatamata ona faia se taumafaiga aʻiaʻi ina ia sauniuni lelei i vaiaso taitasi. Na te faia faapea ma le faaeteete ma le tatalo. O lona naunau moni i le faapotopotoga e atagia lea i lona taumafai ma le faamaoni ina ia pāʻia o tatou loto i le mataupu lea o loo suesueina. E uaʻi totoʻa atu o ia i manatu tāua o le lesona ma fesoasoani ia i tatou ia iloa pe faapefea ona fesootai atu ma le matua o le mataupu.
3 O lona faia o sauniuniga maeʻaeʻa, e aofia ai lona muai tilofaia o mau ina ia iloa le auala e faatatauina ai. Na te faamuamua pea le Afioga a le Atua i le faalaeiauina o le faapotopotoga ina ia faaaogā lelei le Tusi Paia a o faia le suesuega. Pe afai e lē o aofia mai i tali a le faapotopotoga se manatu tāua po ua lē maua le faatatauga o se mau autū, e na te faia mai se fesili faaopoopo patino ina ia aumai ai se faamatalaga. I lenei auala, ua ia fesoasoani ai ia i tatou e faia ni faaiuga saʻo ma iloa ai le auala e faatatauina ai i o tatou olaga mea ua tatou aʻoaʻoina.
4 E tatau i le fai Suesuega o Le Olomatamata ona tauivi ina ia agaigai i luma i le faaleleia o lona lava tomai tau aʻoaʻo atu. E lē faia soo ni ana faaopoopoga ae na te faalaeiauina i tatou ina ia faia ni tali—i a tatou lava upu, ia pupuu, ma ia taulai saʻo atu i le manatu. E mafai ona ia faamanatu mai ia i tatou i nisi taimi faapea, o le tagata muamua e tali i se palakalafa, e tatau ona fai atu se tali saʻo puupuu i le fesili. O isi faaopoopoga mai le aofia, e tatau ona uaʻi atu i le faatatauina o mau, e lagolagoina ai le manatu, po o le faia o se faatatauga aogā o le mataupu. I le faalaeiauina o le faia o sauniuniga totino ma sauniuniga faaleaiga, e tatau ai i le fai Suesuega o Le Olomatamata ona galue ina ia faagaee le naunau o tagata uma e faia se sao.
5 Ona o ‘tagata ua aʻoaʻoina e Ieova,’ tatou te talisapaia ai “meaalofa i tagata,” e pei o fai Suesuega o Le Olomatamata o ē ‘galulue mamafa i le . . . aʻoaʻo atu.’—Isa. 54:13; Efe. 4:8, 11; 1 Timo. 5:17.