Pe e Mafai ona E Faateleina Lou Viia o Ieova a o Faagasolo Aperila?

¹ Sa i le faisalamo o Tavita se faanaunauga mai le loto e talia le viia o Ieova, ma o lea na ia faapea ai: “Ou te matuā vivii atu ia Ieova i loʻu gutu, ou te faaneenee atu ia te ia i totonu o le toatele.” (Sala. 109:30) O Aperila o se taimi lelei lea e ‘faaopoopo i ona viiga’ i le faateleina o lo tatou sao i le faiva i le fanua. (Sala. 71:14) O e fuafua e te iai i le lotolotoi o le toatele o ē faia lenei mea i le aufaatasi atu i muaau o paeonia lagolago?

² Fuafua Nei: Ua faamanatu mai e le Faataoto 21:5 ia i tatou e faapea: “O mafaufauga o e filigā i galuega, na o le mau mea e iu i ai.” Ua manaomia e lenei mea lou tuuina atu o le mataupu ia Ieova i le tatalo, faamuamuaina o ia i au fuafuaga. (Faata. 3:5, 6) Ona sosoo lea ma le tagai totoʻa i lau faasologa o loo iai nei, e fuafua po o fea e mafai ona faia ai fetuunaiga ina ia faaalu se faatatauga o le lua itula i le aso i le faiva. O lou “faatauina mai” o le taimi mai isi meafai, e faatagaina ai oe e tuutoina atu le taimi tele i le galuega talaʻi.—Efe. 5:16, NW.

³ Fesootai ma Felagolagomai: Na tautala le aposetolo o Paulo ia i latou patino o ē sa “o se fesoasoani malosi” ia te ia i le faataulauina o lana faiva. (Kolo. 4:11, NW) Talanoa au fuafuaga ma isi o ē o mananao e tusia o latou igoa e avea o ni paeonia lagolago ia Aperila. O la latou lagolagosua ma le mafutaga e mafai ona aumaia ai aogā faaleagaga. E mafai ona fesoasoani le ovasia o le auaunaga ia te oe pe afai e iai ni au fesili e faatatau i fuafuaga o le auaunaga po o oganuu e galueaiina.

⁴ O le felagolagomai ma le lagolagosua mai totonu o le aiga e mafai ona fesoasoani i sui taitasi ia paeonia lagolago. Atonu e tatau ona fetuunai feau e faia i le fale mo sina taimi puupuu. O le faasologa foi mo le taulimaina o nei tiute atonu e manaomia foi ona fetuunai. O se faatasiga a le aiga e talanoaina ai nei manaoga e mafai ona fesoasoani i le faataulauina o lou sini. O fesootaiga lelei ma le felagolagomai o ki ia i le faamanuiaina.

⁵ Tausia Pea se Vaaiga Mautinoa: Aua neʻi vave tuulafoaia le manatu o le paeonia lagolago ona o tulaga lē logoleleia. O tagata talavou i aʻoga, tagata matutua ua lē toe faigaluega, avā nofo fale e iai fanau, ulu o aiga o loo galulue faataimiatoa, ua mafai uma ona latou faataulagaina i latou lava​—ma le fiafia tele—​e paeonia lagolago ia Aperila. Latou te ioe ma le faisalamo faapea “e ono lava i e ua amio saʻo ona vivii atu,” ma latou te lē o manatu i ai o se toatuga tele le tuuina atu o le taumafaiga faaopoopo manaomia e faaalu le 60 itula i le faiva. (Sala. 33:1) Afai e lē mafai ona tusia lou igoa, aisea e lē saosaolaumea ai i le olioli i le faateleina o au gaoioiga o se tagata talaʻi o le faapotopotoga?

⁶ Mo le toatele, o le paeonia lagolago ia Aperila o se laasaga lea i le auaunaga o le paeonia sauatoa. I le faateleina o a latou gaoioiga, ua latou mauaina faapea, o le suiga i le galuega paeonia sauatoa ua faamaonia le sili atu ona faigofie.

⁷ Ioe, seʻi o tatou faateleina la tatou gaoioiga faatiokarate ia Aperila. Ia taumafai e faia se molimau e sili atu i le taeao ma le afiafi. Tatou te mananao e faia mea uma tatou te mafaia e viia ai lo tatou Atua, o Ieova. O le paeonia lagolago ia Aperila, o se auala lelei lea e faaalia ai lo tatou talisapaia mo ana gaoioiga e tele o le alofa tunoa agaʻi mai ia i tatou.