Ia E Puipuia Oe i le Aʻoga

¹ I a Setema, o le a amataina ai e ā tatou talavou i Samoa i Sisifo le kuata mulimuli o le latou tausaga faaleaoaoga, ae i Amerika Samoa, o le amataga lea o la latou tausaga fou faaleaoaoga. E iai ni mea e olioli ai o loo faatalitalia, ae e iai foi ma ni nai mea e ono faapogaia ai lamatiaga. E toatele talavou o le a eseese o latou faiaoga e tofia i ai, o le a fou foi ni mataupu o le a latou aʻoaʻoina, ma o le a aufaatasi vavalalata ai ma ni tamaiti aʻoga, o ē latou te leʻi masani ai. E oo lava foi i a i latou o loo faaauau pea a latou aʻoaʻoga ma latou te lē o faia nei suiga, e mafai lava ona omia a o faasolo ina lalata mai suega i le iuga o le tausaga. Pe afai la o loo e iai pea i le aʻoga, o le taimi tonu lava la lenei ua talafeagai ai ona e iloiloina le auala e mafai ona e puipuia ai oe i inā. E mananao o tatou talavou e felagolagomai ma faiaoga ma ia faamasani lelei atu i tamaiti latou te aooga, peitai ane e ao ona latou manatua, e ao ona latou leoleomalu ia teenaina so o se mea e faaleagaina ai faaleagaga.—1 Kori. 15:33.

² O le faaeteetega sili mo tamaiti laiti ma talavou Molimau, o le alofia o aafiaga leaga a le lalolagi, ia ua sao atu i totonu o aʻoaʻoga i atunuu e tele i aso nei. E ao i Kerisiano talavou ma ē matutua ona lototetele e teteeina amioga ma mafaufauga faalelalolagi ia ua faasilisilia i aso nei e uiga i mataupu o amioga mamā, ma e ao ona latou ‘puipuimalu’ e ala i le saili atu ma ia taitaia e le Afioga a Ieova. (Sala. 119:9) E manaomia ona logoina i mātua o loo naunau e fia iloa, mea o loo aofia i polokalama a le aʻoga ina ia mafai ai ona avatu le taitaiga talafeagai i ā latou fanau. Afai o mea o loo aʻoaʻoina i le aʻoga po o se isi lava mea, e feteenai ma le paia ma le mamā lea e manaomia i auauna a Ieova, e ao la ona alofia.—1 Pete. 1:15,16.

³ Ua taatele foi le fetaiai ma mataupu e aofia ai sauniga faalotonuu, o aso faamanatu, o taaloga, po o faatasitasiga o faafiafiaga. Ua aogā le polosiua o Aʻoga ma Molimau a Ieova i talavou Kerisiano e tusa ai o nei mataupu. O tulaga e foliga mai e faigata e ono foia pe faaitiitia pe a tausolomua mātua o fanau talavou ona oo atu i faiaoga ma avatu i ai se kopi o lenei lomiga. E mafai ona latou faamatala atu e faapea, o le a faamalamalamaina e lenei tusi i le faiaoga le pogai ua filifili ai Molimau a Ieova ina ia lē auai i nisi o gaoioiga. O le mauaina e le faiaoga o nei faamatalaga e tele sona aogā i le atiina aʻe o le agaga o le felagolagomai.

⁴ E lē gata i lea, o le a lelei foi mo tamaiti aʻoga Kerisiano ona iai ni ā latou lava kopi o le polosiua o le Aʻoga faatasi ma ā latou meaaʻoga. E masani ona tulai mai avanoa mo le molimau atu i isi tamaiti aʻoga o ē fesili mai pe a oo ina talanoaina o tatou talitonuga. E tatau foi i fanau Molimau ona latou feaveai i taimi uma ā latou pepa faafomai o le Advance Medical Directive/Release po o le Identity Card o loo lata mai nei ona faatumuina, ua saʻo ona molimauina, ma ua sainia. O i latou e usitaia lenei timaiga e mautinoa o le a pei i latou o ‘lē faautauta ua ia iloa atu le leaga ona lafi ai lea.’—Faata. 22:3.