Talavou—Ia Faaaogā Lelei a Outou Aʻoaʻoga
1 Ia Aokuso ma Setema, e fai ai tuuaga o aʻoga i atunuu o loo i le vaavaaiga a le tatou lālā. O le ā sou lagona pe a toe foi atu i le aʻoga ina ua uma le tuuaga? Po o e naunau ina ia maua pea ni aogā mai au aʻoaʻoga? Po o le a e faaaogā lelei avanoa na e maua i le aʻoga e tufa atu ai le upu moni i ē tou te vasega faatasi ma faiaʻoga? E matou te mautinoa o loo tou mananao e faia le mea aupito sili ona lelei i le aʻoga.
2 Ia Avea o se Tamaitiiti Aʻoga Lelei: Afai e te sauniuni lelei ma uaʻi totoʻa atu pe a e auai i au vasega, o le a e maua ai aogā tumau. Ia filigā e faia lelei au meaaʻoga e avatu e fai i le fale, ae aua neʻi faatagaina galuega a le aʻoga e faalavelavea ai gaoioiga faatiokarate.—Fili. 1:10.
3 Ia amata le kuata fou faaleaʻoaʻoga i le toe faitauina o le polosiua Molimau a Ieova ma Aʻoaʻoga. I le amataga o tausaga taitasi faaleaʻoaʻoga, e tatau ai ia te oe po o ou mātua ona ave ia tofu ou faiaʻoga taitoatasi ma se kopi. Pe afai e toe iai se isi tou faiaʻoga fou a o faagasolo le tausaga, e lelei foi pe a ave i ai sana kopi. Ia faailoa atu ia i latou e faapea, e so o se fesili lava atonu o latou fia fesili ai, o le a taliina. O le a fesoasoani lenei polosiua ia i latou e malamalama lelei ai i ou talitonuga ma mataupu silisili ma latou galulue felagolagomai ai ma oe a o e faatatauina mea na e aʻoaʻoina. O le a mafai foi ona faamautinoa atu ai i ou faiaʻoga e faapea, e tou te mananao ma ou mātua e felagolagomai ma i latou a o latou fesoasoani atu ia te oe ina ia mauaina se aʻoaʻoga tāua.
4 Ia Avea o se Molimau Lelei: Aisea e te lē vaai ai i le aʻoga e faapea o sau oganuu totino e molimau lē fuafuaina atu ai? A o faagasolo le tausaga faaleaʻoaʻoga, o le a e maua ai ni avanoa tutasi e molimau atu ai. Ua e maua le poto ofoofogia faaleagaga lena, pe a e tufaina atu, e mafai ona “faaolaina ai oe e oe atoa ma e ua faalogologo ia te oe.” (1 Timo. 4:16) O le tausisia o amioga lelei faa-Kerisiano e fai ma faaaʻoaʻoga, ma e ala i le molimau atu i so o se taimi lava e talafeagai ai, o le a maua ai aogā e oe lava faapea ma isi.
5 Na talaʻi lē fuafuaina atu se uso talavou i ni tamaiti e latou te aʻoʻoga faatasi. Ia i latou na tali lelei mai, sa iai se tamaitiiti Katoliko, sa iai se tasi e lē talitonu e iai se Atua o lē e masani ona tauemu ia i latou e talitonu i le Atua, ma se talavou sa ulaula e lē pē le tapaa, ma o se isi e masani ona onā. I nei tagata uma, na fesoasoani atu lenei uso talavou i le toʻa 15 o ana tupulaga i le aʻoga ina ia tuuina atu ma papatisoina!
6 O lea, talavou e, ia sogasogā i aʻoaʻoga ma i le galueaiina o lau oganuu patino e molimau atu ai. Ona e olioli ai lea i aogā e sili atu i lou alu atu i le aʻoga.