Auala e Faaleleia ai La Tatou Talaʻiga o le Malo
1 Ua sili atu nei ona faanatinati la tatou talaʻiga na i lo o muamua. Pe e ola pe oti tagata, o le a faalagolago lava i la latou tali mai i le tala lelei. (1 Pete. 4:5, 6, 17; Faaa. 14:6, 7) O le mafuaaga lenei e ao ai ona tatou vaavaai pea mo ni auala e faaleleia ai la tatou talaʻiga o le Malo. O ā nisi o auala e mafai ai ona faaleleia?
2 Sauniuni Lelei: I le faaaogaina o le lomiga fou o La Tatou Faiva o le Malo, ia fili se taulimaga e te manatu o le a talafeagai lelei ma le toatele o tagata i lau oganuu. E tāua tele le faafetaui o au faamatalaga i tulaga o le oganuu. Pe e te manao foi e sauni sa oe lava taulimaga, e faaaogā ai manatu ma mau o le Tusi Paia ua e iloa e aogā. O le a e manaomia se upu tomua e faaosofia ai le naunau o tagata. (Tagaʻi i le tusi Reasoning, itulau 9-15.) Atonu o le a e fuafua e fai atu se fesili faaoso naunau pe talosagaina foi se manatu o lē ona le fale e uiga i ni tala o ni mea na tutupu i le oganuu e faaosofia ai le naunau. A iai loa sau taulimaga ua e mafaufau i ai, ona faataitai lea ma se tasi o le aiga po o se isi tagata talaʻi o lē e mafai ona ia aumaia ni fautuaga mo le faaleleia o lau taulimaga.
3 Talanoa ma Tagata: O lo tatou sini, o le faailoa atu o se feau tāua. E mafai ona faia lenei mea e ala i le faaaofia o la tatou au faalogologo i se talanoaga uigā. Afai e lāgā e lē ona le fale se tetee pe aumai foi se manatu, faalogologo lelei i le mea o ia fai mai ai. O ana faamatalaga o le a fesoasoani i a te oe e avatu ai se tali mai le Tusi Paia e uiga i le faamoemoe o i a te oe. (1 Pete. 3:15) Afai e lē tutusa lona manatu ma le Tusi Paia, e mafai ona e faapea atu ma le faautauta: “E toatele lava tagata e iai foi le lagona lena. Peitai, o le isi foi lenei itu e mafai ona ta mafaufau ai i le mataupu.” Ona faitau loa lea o se mau talafeagai, ma fesili atu i ai mo sona manatu.
4 Ia Iai se Faasologa e Mafai ona Fetuunai: O le sauniuni lelei, o le a leai se aogā pe afai e lē mafai ona e talanoa atu i tagata. Taumafai e fetuunai lau faasologa ina ia mafai ona e galue mai lea fale i lea fale i le taimi e toatele ai tagata i aiga. Atonu o le a e iloa, e sili ona lelei pe a asiasi atu i faaiuga o vaiaso; atonu o le a mauagofie isi i le vaiaso, ae i itula o le afiafi. I nisi vaipanoa, ua iloa e nisi tagata talaʻi le aogā o le molimau atu i aso mālōlō o le lalolagi, auā e toatele ai tagata latou te maua atu i fale. O le taimi lena e masani lava ona toafilemu ai tagata, ma atonu o le a sili atu ai ona fiafia e talanoa. O se mea lelei pe afai o le a faafetaui lau upu tomua ma le taimi lena ma faafesootai au faamatalaga ma se mau o le Tusi Paia.
5 Iloilo le Aogā o Lau Taulimaga: Pe a e tuua fale taitasi, ia fesiligia oe lava: ‘Pe na ou pāʻia le loto o lē ona le fale? Pe na mafai ona ou utufia maia ona manatu, ma faalogologo lelei i mea na ia taʻua? Pe sa ou tali atu ma le faautauta? E tusa ai ma ia tulaga, pe sa ou faaaogā le auala sili?’ Atonu e aogā pe a galulue mai lea taimi i lea taimi ma se tagata talaʻi e lava le poto masani po o se paeonia, ma faalogologo ma le faaeteete i ana taulimaga ma le manatu o le a aogā e faaleleia ai le uigā o lau faiva.
6 Afai e te agavaa i lau galuega, o le a mafai la ona e tufa atu upu moni o le Malo na o le a “faaolaina ai oe e oe atoa ma e ua faalogologo ia te oe.”—1 Timo. 4:16; Faata. 22:29.