Fesoasoani i a i Latou e Toe Faalogo “i se Isi Taimi”
1 “Matou te toe fia faalogo atu ia te oe e uiga i lenei upu i se isi taimi.”(Galu. 17:32, NW) O le tali lena a nisi i le lauga taʻutaʻua a Paulo i le Maupuepue o Areopako. E faapena foi i aso nei, o loo naunau nisi e faalogo atili atu e uiga i le feau o le Malo o le Atua lea sa tatou tufa atu i a i latou i ā tatou uluai asiasiga.
2 O le tele o la tatou aʻoaʻo atu, e faia pe a tatou toe foi atu e faatupu atili le naunau. O le sauniuni lelei, o le a fesoasoani i a i tatou e maua mai ai ni iuga mautinoa. Ua fautua mai le itulau e 51 o le School Guidebook e faapea: “Muamua lava, ia malamalama lelei i manatu autū e lagolagoina ai le mataupu. Taumafai ia malamalama i mafuaaga o manatu ua tuuina mai. Vaai pe mafai ona e faamatala le manatu i au lava upu. Ia maua se malamalamaga lelei o faamaoniga faale-Tusi Paia. Ia nofo sauni pea e faatatau mau i se auala aogā.”
3 Afai sa e tuua le polosiua “Pe a Maliu se Tasi e Pele i a te Oe,” e mafai ona e faapea atu:
◼ “I la ta talanoaga talu ai, na ta talanoaina ai le faamoemoe mautinoa mo ē ua maliliu e pei ona faailoa mai i le Tusi Paia. O le polosiua lea na ou tuua i a te oe, o loo talanoaina ai nisi o mau o le Tusi Paia e mafai ona faamafanafanaina ai i tatou [Faitau se mau se tasi pe lua na o loo i le pusa i le itulau e 27 o le polosiua.] Ua fuafuaina lenei polosiua e fesoasoani i suesuega totino ma suesuega faaleaiga i le Tusi Paia. Ou te fiafia e faailoa atu i a te oe lona faaaogaina.”
4 I asiga na e tuua ai le sāvali “Le Pogai e Mafai ai ona E Faatuatua i le Tusi Paia,” e mafai ona e faapea atu:
◼ “Tatou te fia iloa uma lava le mea o le a tupu i le lumanai. I le vaaia o tulaga ua iai le lalolagi, o le ā sou manatu i le mea o le a tupu? [Faatali mo se tali.] Talu ai e na ona taumatemate e le tagata mea o le a tutupu, ae o le Atua na te silafia moni le mea o le a tupu. [Faitau le Isaia 46:10.] Atonu e faateia oe i le iloa o loo valoia e le Tusi Paia, o le a lē pine ae tatou olioli i faamanuiaga i le parataiso i le lalolagi fou. [Faitau le palakalafa lona tolu i le itulau 4.] Seʻi oʻu faamatala atili atu lenei folafolaga ofoofogia.”
5 Afai o e toe asia se tasi na e tuuina i ai se tusi o le “New World Translation,” atonu la o le a aogā lenei fautuaga mo oe:
◼ “Talu ai, sa ou tuua i a te oe se kopi o le Tusi Paia, ma sa ou folafola atu ou te toe foi mai e fesoasoani i a te oe ina ia e maua ai ni aogā sili. E iai nisi taimi tatou te tau mafaufau ai pe mafai faapefea ona tatou tausia ni faiā faaleuo ma isi. Ua ofo mai e le Tusi Paia se fautuaga lelei, ma ua faafaigofie e le New World Translation ona maua le mea o tatou manaomia. [Suʻe i le itulau 1595 ma vaai i lalo o le ulutala “Love(s).” Ia tataʻi mafaufau i mau e pei o le 1 Korinito 13:4; Kolose 3:14; ma le 1 Peteru 4:8. Faamatala puupuu le auala e maua ai iuga lelei ona o le faatatauina o nei mataupu silisili.] O se tasi lenei o faaaoaoga e faaalia ai le auala ua ofo mai ai e le Tusi Paia ni vaifofo aogā i ō tatou faafitauli. Ae i se isi taimi, ou te manao e faailoa atu i a te oe se isi auala e mafai ona fesoasoani ai le Tusi Paia i a i tatou e maua le fiafia ma le filemu o le mafaufau.”
6 E leai lava se isi oloa tāua sili e mafai ona tatou tufaina atu i isi na i lo o le poto saʻo o le Afioga a le Atua. O lena poto e mafai ona aʻoaʻo atu ai le mataʻu i a Ieova ma faalaeiauina tagata ia savavali i ona ala, na e mafai ona aumaia ai faamanuiaga e faavavau.—Faata. 2:20, 21.