Faafetai mo Mea ua Tatou Maua
1 “A ua faaalitinoina mai e le Atua lona lava alofa ia te i tatou, ina ua maliu Keriso ma sui o i tatou, a o tatou agasala pea.” (Roma 5:8) Maeu le tatau ia i tatou uma ona faafetai i le taulaga silisili na faia e Ieova le Atua ma lona Alo mo i tatou! E ala i le toto na faamaligiina o Keriso, ua tuuina mai ai ia i tatou le avanoa mo le ola e faavavau, o se mea e lē mafai e se tagata ona aumaia ia i tatou.
2 Pe e mafai faapefea ona tatou faaalia atu lo tatou talisapaia? E toatele tagata o loo galala mo le poto moni, lea e na o le Afioga Paia a le Atua e mafai ona maua ai. O le finagalo o Ieova ia latou maua le poto o le upu moni. (1 Timo. 2:4) Ua tatou faaalia lo tatou talisapaia o le upu moni e ala ‘i le folafolaina atu o le tala lelei o le Malo o le Atua.’ (Luka 4:43) O le faia o se sao ma le loto atoa i lenei galuega, ua faaalia ai lo tatou talisapaia e faapea, na maliu Keriso mo i tatou ma tatou te mananao e faataʻitaʻi ia te ia e ala i le usiusitai ma le faamaoni i lana poloaiga ina ia faia isi ma soo.—Mata. 28:19, 20.
3 O ā nisi o vala o le talaʻiga ua tatala mai ia i tatou? Pe e mafai ona tusia o tatou igoa e avea o ni paeonia lagolago mai lea taimi i lea taimi? A maeʻa ona mafaufau i na itu uma e aafia ai, atonu e mafai e nisi ona tauavea le auaunaga paeonia sauatoa. I le faaaogaina o nei avanoa lelei, e mafai ona faateleina ai le aofaiga o le taimi tatou te faaaluina i le folafolaina atu o le tala lelei o le Malo. I taimi ua mavae, atonu sa e mafaufau e tusia lou igoa, a e sa i ai ni toatugā. Atonu ua suia ou tulaga. Afai o lea, po ua e mafaufau loloto e ulu atu i le auaunaga faapaeonia po o le auauna o se paeonia lagolago?
4 O le a sili ona faateleina lo tatou loto faafetai pe a tatou vaavaai atu i mea o loo tutupu i lo tatou siomaga. Ua faateleina faiga sauā, le feitagai, ma le fetauai i le lalolagi aoao. Na faamatalaina lelei e Paulo o tatou taimi e faapea o “aso e gata ai” ma “aso faigata.” (2 Timo. 3:1) I le lotolotoi o nei tulaga mafatia, ua matuā anoanoai tala lelei ua ia i tatou e tufa atu i isi. E lua mekasini lelei ua ia i tatou, Le Olomatamata ma le Awake! I lenei masina, e mafai ona tatou ofoina atu kopi taitasi po o ni tusiga. Ua ia i tatou foi polosiua i mataupu eseese. E mafai e nei lomiga ona aumaia le faafouina moni ia i latou e faitau i ai. O le loto faafetai i mea ua tatou maua, e ao ona uunaia ai i tatou ia lima mafola i le tufaina atu i isi.—Epe. 13:16.
5 E mafai ona e auauna i se vaipanoa i lenei atunuu o manaomia moni ai lau fesoasoani? E mafai e la outou ovasia matagaluega ona avatu ni fautuaga e tusa ai ma lenei mataupu.
6 E tele mafuaaga e faafetai ai i mea ua tatou maua, ioe, e matuā anoanoai mea lelei. O lo tatou loto faafetai ia Ieova, e mafai ona sili ona faaalia i le faalauiloaina atu o lona suafa ma fuafuaga i isi.—Isa. 12:4, 5.