Maua Aogā Mai le Aʻoga o le Faiva Faatiokarate mo le 1996—Vaega 1

¹ Pe ua e faitau i faatonuga ua saunia i le “Faasologa o le Aʻoga o le Faiva Faatiokarate mo le 1996”? Pe na e mātauina ai ni suiga? E mai ia Ianuari e oo ia Aperila, o le Lauga Nu. 3, o le a faavae i le tusi Reasoning, ma e amata atu ia Me e oo ia Tesema, o le a faavae lauga i le tusi fou lea na seʻi faatoʻā tatalaina, Le Poto. O le Lauga Nu. 4, o se lauga o le a faia i vaiaso taitasi e uiga i tagata eseese i le Tusi Paia.

² Tofiga o Tagata Aʻoga: O le Lauga Nu. 3 e tofia atu i se tuafafine. Pe afai e faavae mai i le tusi Reasoning, o le faatulagaga e tatau ona aofia ai le galuega talaʻi mai lea fale i lea fale po o le molimau atu lē fuafuaina. Ae afai e faavae mai i le tusi, Le Poto, e tatau ona taulimaina e pei o se toe asiga po o se suesuega faale-Tusi Paia i le aiga. E tatau ona mautinoa le matuā aogā o lenei faiga, talu ai, o le a tele lava ina faaaogaina le tusi Le Poto, e faia ai suesuega faale-Tusi Paia i aiga.

³ Afai o le faatulagaga o se suesuega faale-Tusi Paia i le aiga, e mafai ona nonofo uma i lalo tuafāfine. Ia fai loa lava le suesuega i le tau ina amata i ni nai upu tomua puupuu ma fai loa le fesili o loo lomia i le tusi. E tatau ona faatinoina i se tulaga moni lava le vaega a lē ona le fale. A lava le taimi, e mafai ona suʻe ma faitau mau na o loo taʻua ai. E tatau i le tuafafine ona faatinoina le tomai e aʻoaʻo atu ai e ala i le faia o ni fesili e faasufi ai lē ona le fale ina ia faaalia mai ni ona manatu, ma fefulisai ai ma ia i mau o loo faaaogaina.

⁴ O le ā e tatau ona faia pe afai e sili atu mau o taʻua ai i le lauga nai lo o le mea e mafai ona talanoaina i le lima minute? Ia fili tau o mau autū o loo faamatilatila ai manatu tāua. Afai e lē tele ni mau, e mafai ona talanoa ia matuā faalautele manatu tāua. I nisi taimi, e mafai ona faitau se palakalafa po o se fuaiupu mai le tusi ona talanoa lea i ai ma lē ona le fale.

⁵ I le pusa ua faaulutalaina e faapea, “Seʻi Tofotofo Lou Iloa” o loo i le faaiuga o mataupu taitasi o le tusi Le Poto, e mafai ona autaluina puupuu pe a lava le taimi e le tagata talaʻi lea e aofia ai palakalafa faaiu o le mataupu i lana lauga. E mafai foi ona talanoaina pusa o faamatalaga na o loo aofia ai i palakalafa tofia pe a lava le taimi. Afai e aliaʻi mai se pusa o faamatalaga i le va o ni lauga se lua, e mafai ona talanoaina e le tuafafine o le a taulimaina le lauga muamua. E mafai foi ona faamatala ata na e i le tusi i so o se taimi e fetaui ai i le mataupu o loo talanoaina.

⁶ O le Lauga Nu. 4, e mautinoa o le a avea o se lauga e matuā faaoso naunau ma aogā i le faapotopotoga. I vaiaso taitasi, o le a talanoaina ai se faaaoaoga o se mea moni na tupu i le olaga—o se tagata o le Tusi Paia. Ia suesue ma le faaeteete le mea o fai mai ai le tusi, Insight, Tusi 1, e uiga i le tagata o le Tusi Paia lea ua tofia mai. Ia fausia le lauga e faatatau i le matua, ma fili mau autū o le Tusi Paia na o le a fesoasoani i le aofia e taulai atu ai manatu i le tagata o le Tusi Paia ma lona uiga totino, e aofia ai uiga tumau, ona ala, po o faanaunauga tatou te mananao e faataʻitaʻi i ai pe teena foi. O mau e lē o fesootaʻi tuusaʻo atu i le tagata o le Tusi Paia, e mafai ona faaaofia ai pe afai o faamatilatila mai ai le silafaga a Ieova e faatatau i nisi o uiga lelei pe leaga, pe afai foi e fesootai atu ma le matua o le lauga.

⁷ Afai tatou te faaaogā atoatoa le toleniga ua saunia i le aʻoga, o le a mafai ai ona faaleleia atili i tatou “e talaʻi atu le upu” i se auala e faatinoina ai le tomai o le “aʻoaʻo atu.”—2 Timo. 4:2.