O le Poto e Uiga i le Atua Moni e Taʻitaʻia ai i le Ola

¹ Na fetalai atu Iesu i lona Tamā i se tatalo e faapea: “O le ola e faavavau foi lenei, ia latou iloa oe le Atua moni e toatasi.” (Ioa. 17:3) Maeu se taui agaalofa o lena mea! I le faaaogaina o le lomiga E Mafai ona E Ola e Faavavau i Parataiso i Le Lalolagi, e mafai ona tatou fesoasoani ai i isi e iloa le mea e manaomia ona latou faia ina ia ola ai e faavavau. O le ā se tala e mafai ona tatou fai atu e faagaee ai lo latou naunau ma uunaia ai i latou e fia faitau i le tusi o le Ola e Faavavau?

² E mafai ona e faaaogā se taulimaga e faatomua ai le Tusi Paia e avea o le puna aogā o taʻiala, i lou faapea atu:

◼ “O loo matou talanoaina ma o matou tuaoi po o fea e maua ai se puna aogā o taʻiala auā le faafetaiaia o faafitauli o le olaga. I aso ua mavae, e toatele tagata sa saili muamua atu lava i le Tusi Paia. Ae i le taimi nei, ua suia uiga o manatu o tagata; e toatele ua iai masalosaloga e uiga i le Tusi Paia, ua iai le manatu e faapea, ua na o se tusi na tusia e tagata. O le ā sou manatu? [Faatali mo se tali.] E iai se mafuaaga lelei ua faapea atu ai, o le Tusi Paia, e aogā mo o tatou aso. [Faitau le 2 Timoteo 3:16, 17.] E tutusa lelei lava le tāua o le faatatauina o mataupu silisili o le Tusi Paia i le taimi nei e pei lava ona faia ai i le taimi na faagaeeina ai e le Atua le tusiaina o le Tusi Paia.” Suʻe i le itulau e 56 i le tusi o le Ola e Faavavau, ma faaopoopo puupuu e faatatau i le tele o valoaga ua faataunuuina. Ofo le tusi, ma fai se fuafuaga e te toe foi atu e tali le fesili, E mafai faapefea ona tatou maua totino aogā mai le poto lea o loo maua i le Tusi Paia?

³ Ona o le tatalo o se mataupu e fiafia i ai le toatele o tagata, atonu la o le a e fiafia e talanoa i ai i lou fesili atu faapea:

◼ “I faafitauli uma lava ia e tatau ona tatou faafesagaia i le olaga i aso nei, faamata e te lagona e mafai ona avea le tatalo o se fesoasoani moni ia i tatou? [Faatali mo se tali.] E toatele ua lagona e faapea, ua mafai ona latalata atu i latou i le Atua e ala i le tatalo atu ia te ia, ma o le faia faapea, ua mafai ai ona latou maua le malosi i totonu, o le mea tonu lava lena o loo folafola mai e le Tusi Paia. [Suʻe le tusi o le Ola e Faavavau i le itulau e 229, ma faitau le 1 Ioane 5:14.] Ae peitai, atonu ua lagona e se tagata e faapea, i se isi taimi e lē talia ai ana tatalo. Ua talanoaina i lenei mataupu ‘E Faapefea ona Maua Le Fesoasoani e Ala i Le Tatalo.’ [Ofo le tusi, ma taʻua le fuafuaga mo foai tauofo mo le galuega i le lalolagi aoao.] Ua faamalamalama mai i lenei mataupu le mafuaaga e tatau ai ona tatou faalogo atu i le Atua, ina ia mafai ona faafofogaina a tatou tatalo. E mafai ona ta talanoa i lena fesili i se isi taimi ou te toe sau ai.”

⁴ Pe e te manao e faataʻitaʻi se taulimaga tuusaʻo e amata ai se suesuega? O se taulimaga lenei atonu e aogā mo oe:

◼ “O loo matou ofoina i tagata se polokalame o suesuega faale-Tusi Paia i aiga e faia fua e aunoa ma se totogi. Pe na e faia muamua se polokalame o suesuega faale-Tusi Paia? [Faatali mo se tali.] Seʻi oʻu faaali atu ia te oe le fesoasoani o loo matou faaaogaina mo le suesuega.” Faaali le tusi o le Ola e Faavavau, suʻe i le itulau e 5 ma le 6 ina ia mafai e lē ona le fale ona iloa mai le faasologa o mataupu, ma fesili i ai, “O e tau mānatu po o le ā o fai mai ai le Tusi Paia e uiga i nei mataupu?” Suʻe i se mataupu e sili ona naunau i ai lē ona le fale ma faitau ulutala laiti. Faamatala i ai, e te manao e faataʻitaʻi puupuu le auala tatou te talanoaina ai nei faamatalaga i a tatou polokalame o suesuega faale-Tusi Paia. Pe amataina pe leai se suesuega, ae afai e folafola mai e lē ona le fale o le a ia faitauina le tusi, ona tuu lea.

⁵ E anoanoai tagata i aso nei ua tali atu i le poto saʻo e uiga i le Atua moni. (Isa. 2:2-4) O se faaeaga mo i tatou le fesoasoani atu i le toatele o tagata tatou te mafai ona oo atu i ai, ina ia latou iloa e uiga ia Ieova ma taʻitaʻia atu ai i le ola e faavavau.—1 Timo. 2:4.