Ia Talanoa i Lou Tuaoi i le Upu Moni
1 O le tasi o poloaiga mai poloaiga sili e lua e faapea: “E te alofa atu i lē lua te tuaoi, ia pei o oe lava ia te oe.” (Mata. 22:39) O lena alofa o le a uunaia ai i tatou e tufa atu i o tatou tuaoi le mea e sili ona lelei ua tatou maua—le upu moni lea ua tatou maua i le Afioga a le Atua. Talu ai ua faasalalauina atu e mekasini o Le Olomatamata ma le Ala Mai! le feau a le Tusi Paia o le upu moni, o le tufatufaina atu la o nei mekasini i le masina o Me, o le tasi lea o auala mo i tatou e ʻtalanoa atu ai i o tatou tuaoi i le upu moni.’—Efe. 4:25.
2 O le “Ala Mai!” 2/1996 e tatau ona faatomua seia oo ina uma lau sapalai. E mafai ona amata lau taulimaga i lou fesili atu:
◼ “Pe e te manatu o le a faatagaina pea e le Atua le tagata e faaauau ona faaleagaina lenei paneta? [Faatali mo se tali.] Ua manatu le toatele, o le a mafai e tagata ona suia mea ia o loo tutupu i le siosiomaga. O le ā sou manatu i ai? [Faatali mo se tali.] I se eseesega matuā telē lava, seʻi mātau le tala a le Tusi Paia i le mea o le a faia e le Atua.” Faitau le Faaaliga 11:18 mai le itulau e 14 o le mekasini, ona faasino lea i isi mau i lalo o le tamai ulutala “Ia Fiafia Lava le Laueleele.” Ona e fesili atu lea: “E te silafia o le a faapefea ona faia e le Atua lena mea? O loo maua le tali i lenei mekasini, ma o le kopi lea mo oe e te faitau ai.”
3 Pe a ofoina “Le Olomatamata” o Me 15, taumafai e faasino i se tala fou o mea tutupu ua pogai ai ona lagona e tagata le lē saogalemu, ma fesili i ai:
◼ “E te manatu o le ā se mea e manaomia ona fai ina ia mafai ai ona tatou lagona le saogalemu moni i lenei olaga? [Faatali mo se tali.] Ma le faamaoni lava, pe faamaonia e mafai ona faalagolago i tagata e foiaina faafitauli o loo fesagai ma tagata? [Faatali mo se tali; ona faitau lea o le Salamo 146:3.] Ona sosoo ai lea ma le faailoaina mai e le faisalamo ia i tatou le mafuaaga e tatau ai ona tatou vaai atu ma le mautinoa i le lumanai. [Faitau le Salamo 146:5, 6.] O le mataupu lenei, ʻSaogalemu Moni, I le Taimi Nei ma e Faavavau,’ ua faamatala mai ai le pogai tatou te faatuatua ai ia Ieova le Atua na te aumaia tulaga sili ona lelei i le lalolagi.” Ofo i ai e mafai ona tuu mekasini e lua ma e mafai ona e toe foi atu e talanoa i le auala e mafai ai ona olioli i se olaga saogalemu i le taimi nei lava.
4 I le vaavaai atu i le faateleina o le popole e uiga i se fuafuaga mo le olaga, atonu o le a talia fiafia le tala i le mea na tupu e faapea, “Sa Leai se Fuafuaga Mautū i Loʻu Olaga ae ua Maua,” i le “Ala Mai!” 2/1996. E mafai ona e faatomua e ala i le fesili atu i ai:
◼ “I aso nei, ua faafaigata lava i tagata ona maua se fuafuaga moni i o latou olaga. Po o e mātauina lena mea? [Faatali mo se tali.] E tatou te manaomia uma lava se fuafuaga mautinoa i o tatou olaga. I lenei tala i se mea na tupu, ua faaalia ai ma le faalaeiau le auala na maua ai e se tasi tamaloa se fuafuaga mautū i lona olaga.” Ofo e tuu le mekasini i lou faapea atu: “I le isi aʻu asiasiga, ou te fia talanoa ma oe e uiga i se mataupu silisili faale-Tusi Paia, afai e faatatauina, e mafai ona fesoasoani ia i tatou ina ia mauaina ai se fuafuaga mautū i o tatou olaga.”
5 Afai e te filifilia se taulimaga puupuu, e mafai ona e faataitaia lenei i lou faapea atu:
◼ “E toatele tagata ua manatu, o le tele lava o mekasini lauiloa i aso nei ua latou soona faamamafa maia le itu tau i faiga faapisinisi, faiga faaleituaiga, po o faiga sauā. [Faaali Le Olomatamata ma le Ala Mai!] O loo matou tufatufaina atu nei mekasini aogā ua faavae mai i le Tusi Paia. E matuā lelei lava mo le tulaga tau aʻoaʻoga, ma e aʻoaʻoina ai i tatou ina ia tapuai i le Atua, alolofa i o tatou tuaoi, ma tausisia amioga tonu. Afai e te filifilia lenei ituaiga o mekasini mo le faitau ai, ou te iloa o le a e olioli i mataupu o loo iai i nei lomiga.”
6 Afai tatou te maelega e talanoa atu i o tatou tuaoi i le upu moni, o le a mafai ai ona tatou avatu i le toatele o tagata le olioli tele.—Galu. 8:4, 8.