Pusa Fesili

◼ O le ā e tatau ona manatua e faatatau i le faitauina o palakalafa i sauniga?

O le tele o le taimi o loo faaaluina i le Suesuega o Le Olomatamata ma le Suesuega Tautusi a le Faapotopotoga o loo faaaogā mo le faitauina o palakalafa. O le uiga o lenei mea, o le uso ua tofiaina e faitau o loo tauavea se tiute tauave mamafa e avea ai o se faiaʻoga. E tatau ona ia faitau i se auala ʻe uigā’ ai manatu o le mataupu ina ia malamalama ai le aufaalogologo, ae faapea foi ona uunaia ai e gaoioi. (Nee. 8:8) O lea, e manaomia ai e lē o faitau ona sauniuni lelei mo lona tofiga. (1 Timo. 4:13; tagai i le suesuega e 6 o le School Guidebook.) O nisi la nei o manatu tāua mo le faitauina ma le uigā i le lautele.

Faamamafa Upu Tatau: Ia faamautinoa muamua upu po o manatu e manaomia ona faamamafa ina ia molioo atu ai le malamalamaga saʻo.

Ia Saʻo Faaleoga o Upu: O le saʻo lelei ma le manino o faaleoga o upu e manaomia ina ia maua ai e le aofia uiga tonu o faaupuga o loo i le lomiga. Suʻe i le lomifefiloi mo upu e lē masani ai po o upu e seāseā faaaogā, po o le faalogologo i kaseti ua puʻeina a le Sosaiete.

Faitau Leotele ma le Aasa: O le faitau leotele ma le aasa e faatupuina ai le naunau, e faaosofia ai lagona, ma uunaia ai lē faalogologo.

Ia Māfana ma Faatalanoa: O le toʻa e ō mai faatasi ma le sologa lelei. O le sauniuni lelei ma le faia o ni faataitaiga, e mafai ai e lē o faitau ona toafimalie, ma o le iuga o le a faamalieina ai nai lo le taotasi i le leo e tasi ma fiugofie ai.—Sapa. 2:2.

Faitau Manatu ua Lomia: O faamatalaga i le pito i lalo faapea foi ma faamatalaga i totonu o puipui e manaomia ona faitauina ma le leotele pe afai e faamalamalamaina ai le mataupu. E pau manatu e lē faitauina o faasino tusi o loo faavae aʻe ai manatu o le mataupu. O faamatalaga i le pito i lalo e tatau ona faitau i le vaega tonu o faasino i ai le palakalafa, i le faatomuaina e faapea: “O loo faitauina faapenei le faamatalaga i le pito i lalo . . .” A uma ona faitau, ona faaauau lea i le vaega o totoe o le palakalafa.

Afai e sologa lelei le faitau atu i le lautele, o se tasi lea o auala tāua tele tatou te ‘aʻoaʻo atu ai isi ia tausi i mea uma ua fai mai ai’ lo tatou Aʻoaʻo Sili.—Mata. 28:20.