Ua Agavaa ma Faaauupegaina e Aʻoaʻo Atu i Isi
1 Ina ua filifilia Mose e fai ma sui o Ieova, sa ia lagona le lē agavaa e folafola atu fetalaiga a le Atua ia Farao. (Eso. 4:10; 6:12) Sa faailoa atu e Ieremia lona lē mautonu e auauna o se perofeta a Ieova, i lona taʻu atu i le Atua e faapea, sa ia lē iloa pe faapefea ona tautala atu. (Iere. 1:6) E ui lava i o la lē mautonu i le taimi muamua, ae na faamaonia le avea uma o na perofeta o ni molimau lē fefefe mo Ieova. Sa faaagavaaina lelei i laua e le Atua.
2 I aso nei, e faafetaia Ieova ina ua tatou maua le mea o loo tatou manaomia e faataunuu ai ma le mautinoa la tatou faiva. (2 Kori. 3:4, 5; 2 Timo. 3:17) I le pei o se inisinia agavaa o loo iai uma ana mea faigaluega, ua faaauupegaina atoatoa ai i tatou e faataunuuina ma le tomai la tatou faiva tofia. Ia Ianuari, o le a tatou ofoina ai so o se tusi tuai faa-Samoa na lomia a o lei oo i le 1984 ma atonu o loo iai pea i le faapotopotoga. E ui e lē fou nei meafaigaluega faaleagaga, ae o o latou matua faale-Tusi Paia o loo talafeagai pea ma le taimi nei, ma o nei tusi o le a fesoasoani i tagata ina ia aʻoaʻoina ai le upu moni. O taulimaga o loo mulimuli mai e mafai ona fetuunai ia fetaui i le po o le ā lava le tusi o le a ofoina.
3 O le mataupu i aʻoaʻoga atonu o le a faaaogaina e faatupu ai le fiafia i le Afioga a le Atua. E mafai ona e amata se talanoaga i lou faapea atu:
◼ “Ua tele lava ina faamamafa i aso nei le manaoga mo ni aʻoaʻoga lelei. O le ā sou manatu, faamata o ā ituaiga o aʻoaʻoga e ao i se tagata ona tuliloa e faamautinoa ai ua maua le fiafiaga sili ma taulau manuia ai i le olaga? [Faatali mo se tali.] E mafai ona maua aogā tumau e i latou e ave i fale le poto e uiga i le Atua. [Faitau le Faataoto 9:10, 11.] O lenei tamai tusi [taʻu le ulutala o le tusi o loo e ofoina] o loo faavae aʻe i le Tusi Paia. O loo faasino atu i le puna e tasi lava o le poto lea e mafai ona taitaia ai i le ola e faavavau.” Faailoa se faaaoaoga patino i le tusi. Afai e faaalia le naunau moni, tuu le tusi ma fuafua mo se toe asiga. Taʻu i ai e ui lava e tuu fua le lomiga, ae tatou te talia sina mea alofa tauofo mo la tatou faiva i le lalolagi aoao.
4 Pe a toe foi atu i lē ona le fale o lē na lua talanoa e uiga i le tāua o aʻoaʻoga faale-Tusi Paia, e mafai ona e faapea atu:
◼ “I laʻu asiasiga talu ai, sa ta talanoa ai i le Tusi Paia o le puna o aʻoaʻoga e mafai ona faamautinoa ai lo tatou lumanai e faavavau. Ioe, e manaomia ni taumafaiga e aʻoaʻo ai le mea o loo manaomia ona tatou iloa mai le Tusi Paia. [Faitau le Faataoto 2:1-5.] E toatele tagata ua latou iloa le faigata ona malamalama i nisi vaega o le Tusi Paia. Ou te fia faataitai puupuu atu ia te oe le auala o loo tele ina matou faaaogaina e fesoasoani ai i tagata e aʻoaʻo atili e uiga i aʻoaʻoga faavae a le Tusi Paia.” I le faaaogaina o le tusi lea na tuu, suʻe i se vaega talafeagai ma faataitai puupuu se suesuega faale-Tusi Paia. Afai e manao lē ona le fale e faia e lē aunoa se suesuega, faamatala i ai o le a e toe foi mai ma la tatou tusi e fesoasoani i le faia o suesuega faale-Tusi Paia o Le Poto e Taʻitaʻia ai i le Ola e Faavavau.
5 E toatele lava tagata ua atuatuvale ona o mafatiaga o le faitau miliona o tamaiti i le lalolagi. Atonu e mafai ona e fesoasoani i lē ona le fale e iloa le silafaga a le Atua e uiga i lenei puapuaga, i lou faapea atu:
◼ “E lē taumatea ua e vaai i lipoti mai tala fou e uiga i tamaiti i le lalolagi atoa, o ē o loo fia aai, mamaʻi, ma ua tuulafoaiina. Aisea ua lē mafai ai e faalapotopotoga o loo popole i ai ona faaleleia lenei tulaga? [Faatali mo se tali.] E na o mea aupito sili lava ona lelei o loo manao ai le Atua mo tagata. Mātau lana folafolaga mo tamaiti ma tagata matutua, e pei ona faamauina i le Tusi Paia. [Faitau le Faaaliga 21:4.] O loo saunia i lenei tusi [taʻu le ulutala o le tusi] ni auiliiliga e sili atu e uiga i se lalolagi ua faia e le Atua o le a lē toe iai ni mafatiaga.” Afai e mafai, suʻe le tusi i se ata o loo faaatagia ai le Parataiso, ma talanoa i ai. Ofo i ai le tusi, ma fuafua mo se isi asiasiga. Ia talia ma le fiafia so o se foai tauofo ua lotomalie le tagata e faia i la tatou galuega.
6 Afai na e talanoa muamua e uiga i mafatiaga o tamaiti, e mafai la i le isi au asiasiga, ona e faaauauina le talanoaga i lou faapea atu:
◼ “I le taimi muamua lea na ou iai iinei, sa e faaalia lou popole e uiga i puapuaga o tamaiti o ē o loo mafatia ona o aiga malepelepe, oge, faamaʻi, ma faiga sauā. O se faamafanafana loto le faitau atu i le Tusi Paia e uiga i se lalolagi o le a lē toe pagatia ai ni tamaiti po o ni tagata matutua i maʻi, i tiga, po o le oti. Ua faamatalaina i se valoaga i le tusi o Isaia se olaga e sili atu ona lelei o loo fotuai mai i le lalolagi.” Faitau ma talanoa i le Isaia 65:20-25. Tataʻi i se suesuega faale-Tusi Paia i se taimi mulimuli ane i le tusi o Le Poto.
7 Talu ai o se faiga masani mo tagata lotu le faia o tatalo, e mafai ona e amataina se talanoaga i lenei mataupu i lou faapea atu:
◼ “I nisi o tulaga i o tatou olaga, o le toatele o i tatou ua tofo i faafitauli ua uunaia ai i tatou e tatalo i le Atua mo se fesoasoani. Ae peitai, e toatele ua lagona e lē o talia a latou tatalo. Ua oo lava ina aliali mai e faapea, o taʻitaʻi lotu o ē tatalo i le lautele mo le filemu, e lē o faafofogaina. Ua tatou fai atu faapena auā o loo faaauau pea ona iai taua ma faiga sauā ua mafatia ai tagata. Po o faafofoga moni mai ea le Atua i tatalo? Afai o faafofoga mai, aisea la ua foliga mai ai e lē o faafofogaina le tele o tatalo? [Faatali mo se tali.] Ua faamatala mai e le Salamo 145:18 le mea e manaomia pe afai tatou te mananao ia talia a tatou tatalo. [Faitau le mau.] O le mea e tasi, o tatalo i le Atua e tatau ona faamaoni ma ia tusa ma le upu moni o loo i lana Afioga le Tusi Paia.” Faaali le tusi o loo e ofoina, ma faasino atu i ai mea o loo fai mai ai e uiga i le tāua o le tatalo.
8 Pe afai e toe tuliloa se talanoaga na faia muamua e uiga i le tatalo, atonu e lelei pe a e taumafai le auala lenei:
◼ “Sa ou fiafia lava i la ta talanoaga talu ai e uiga i le mataupu i le tatalo. E lē taumatea o le a avea o se taʻiala aogā manatu o Iesu e uiga i mea e tatau ona tatalo i ai.” Faitau le Mataio 6:9, 10, ma faasino atu i popolega autū o loo faatomua mai e Iesu i lana tatalo faaaoao. Faaali le mataupu e 16, “Le Auala e Mafai ona E Faalatalata Atu ai i le Atua,” i le tusi o Le Poto, ma fesili pe mafai ona e faataitaia le auala e suesueina ai le mataupu.
9 Pe a oo i le faailoaina atu o le poto e uiga i le Atua i isi, e mafai ona tatou fesili, “O ai ua agavaa lelei mo nei mea?” Ua tali mai le Tusi Paia: ‘O i tatou.’—2 Kori. 2:16, 17.