O Suesuega Faale-Tusi Paia e Maua ai Soo
1 “Se a ea se mea e vaoia ai aʻu e aua le papatisoina o aʻu?” o le fesili lea a le eunuka Aitiope ina ua uma ona “folafola [e Filipo] ia te ia [o] le tala lelei ia Iesu.” (Galu. 8:27-39) I le tulaga o le Eunuka, ua leva ona faanaunau o ia mo tusitusiga faagaeeina a le Atua, ma ina ua ia maua se fesoasoani faaleagaga mai ia Filipo, sa nofo sauni loa o ia e avea ma soo. Ae peitai, e lē o tagata uma ua talitonu e faapea, e manaomia ona latou iloiloina e i latou lava le Tusi Paia.
2 E faafetai ona ua saunia e le faalapotopotoga a Ieova le tele o lomiga ina ia faalaeiau ai tagata e iloiloina le feau a le Tusi Paia mo o tatou aso. O nei meafaigaluega lelei ua fuafuaina ina ia uunaia ai tagata e iloiloina le Tusi Paia.
3 Pe a amataina se suesuega faale-Tusi Paia, o le a aogā le toe autaluina o fautuaga sili ona lelei na o loo lomia i le faaopoopoga o La Tatou Faiva o le Malo o Iuni 1996, i le auala e mafai ona faia ai se suesuega e fua mai i le tusi o Le Poto. A o faagasolo le suesuega, ia mātauina le agaigai i luma o le tagata suesue ina ia mafai ai ona e iloa po o ā vala e manaomia ona uaʻi atili atu i ai. Ia faalaeiau le tagata suesue ina ia muai sauniuni mo ana lesona, ma faitau mau. O ni tali e fai mai i ana lava upu e mafai ona atagia mai ai lona talisapaia mai le loto o le upu moni. E masani lava ona vave agaigai i luma i latou e maua taimi faaopoopo e faitau ai lomiga a le Sosaiete ma auai e lē aunoa i sauniga a le faapotopotoga. Ia faalaeiau ia te ia ina ia talanoa atu i se auala lē fuafuaina i isi e uiga i mea o ia aʻoaʻoina. Ia faaali atu ma le agalelei ia te ia mea e manaomia ona ia faia ina ia agaigai ai i luma faaleagaga. E lē tatau ona tatou faia ni suesuega faaumiumi ma ni tagata e faalotolotolua pea. E tatau i tagata suesue ona taulamua i lona fia aʻoaʻoina o ni mea, ia tu mausalī mo le upu moni, ma ia agaigai i luma i le tuuina atu ma le papatisoga.
4 I nisi o aiga, e lē na o le tasi se suesuega o loo faia ai, talu ai atonu e tofu lava tagata o le aiga ma lana suesuega o loo faia. Ae peitai, i le tele o tulaga, atonu e sili atu ona lelei pe a faia faatasi se suesuega a le aiga atoa, auā o le a fesoasoani lea i le autasia faaleagaga o le aiga.
5 Na poloai Iesu ina ia tatou ō atu e fai ni soo. (Mata. 28:19) Ina ia faia faapea, e tatau ona tatou faia ni suesuega faale-Tusi Paia e fesoasoani ai i tagata suesue ia agaigai i luma seia oo lava ina latou fesili mai, “Se a ea se mea e vaoia ai aʻu e aua le papatisoina o aʻu?”