Le Tala Lelei ua Iai i Fesootaiga Faakomepiuta
I lo tatou vaitaimi o le poto faaonaponei i le galueaiina o masini eseese (technological age), ua maua ai e nisi tagata ni faamatalaga e ala i ni faiga faaelekitoronika (electronic), o loo aofia ai fesootaiga faakomepiuta (Internet). O lea, ua tuuina ai e le Sosaiete i totonu o nei fesootaiga faakomepiuta nisi o faamatalaga saʻo aʻiaʻi e faatatau i talitonuga ma gaoioiga o meafai a Molimau a Ieova.
O le vaega la o lenei polokalame o fesootaiga faakomepiuta (Internet Web) o loo faaaogaina e le Sosaiete, o loo iai le tuatusi lea http://www.watchtower.org, ma o loo iai se tuufaatasiga o sāvali, polosiua, ma mataupu o Le Olomatamata ma le Ala Mai! i le faa-Peretania, faa-Saina (le gagana ua faafaigofie), faa-Siamani, faa-Rusia, ma le faa-Sepania, faapea foi isi gagana. O lomiga ua iai i lenei polokalame i le komepiuta ua mafai ona mauaina e faapotopotoga ma ua faaaogaina i le faiva. O le fuafuaga na faia ai lenei polokalame o fesootaiga faakomepiuta a le Sosaiete, e lē ina ia tatala atu ai ni lomiga fou, ae ina ia mafai ai e tagata lautele ona latou maua faamatalaga e ala atu i auala faaelekitoronika. E lē manaomia mo so o se tasi ona saunia e ia lava ni faamatalaga e tuuina atu i totonu o lenei polokalame e faatatau i Molimau a Ieova, i a tatou gaoioiga o meafai, pe i o tatou talitonuga. O lena ua saunia atu e lenei polokalame faamaonia ua tuuina i komepiuta, faamatalaga ua saʻo aʻiaʻi mo so o se tasi na te manaomia.
E ui e lē o saunia e lenei polokalame a le Sosaiete se vaega mo le lafoina ai o meli i le faiga faaelekitoronika (E-mail), ae o loo lisiina atu ai tuatusi faapusameli o lālā o le Sosaiete i le lalolagi aoao. O lea, e mafai ai e tagata ona tusi atu i ai mo le mauaina mai o nisi faamatalaga atili po o le maua mai ai o se fesoasoani totino mai Molimau o lena lava nofoaga. Ia e saʻoloto e tuu atu le tuatusi ua taʻua i luga o le polokalame o fesootaiga faakomepiuta, i so o se tasi o lē manao ina ia amata ona ia aʻoaʻoina le upu moni o le Tusi Paia mai lenei auala.