Ia Fiafia e Avatu se Molimau Maeʻaeʻa
1 O i tatou uma lava, e tatou te fiafia e faia mea o loo lelei ona tatou faia. Ua faapea mai le Mareko 7:37, ua faalauiloa mai e le motu o tagata e faatatau ia Iesu: “Ua mālie [“lelei,” NW] lava ana mea uma ua fai.” E letioa ona fiafia Iesu e faia le finagalo o Ieova! (Faatusatusa i le Salamo 40:8.) O le manatunatu i fautuaga ia o loo mulimuli mai, o le a faapena foi ona tatou maua ai le olioli a o tatou usiusitai atu i le poloaiga a Iesu “e talaʻi atu i tagata, ma avatu se molimau maeʻaeʻa.” (Galu. 10:42, NW) Ia Ianuari, o le a tatou ofoina ai tusi Autasia i le Tapuaiga i le Atua Moni e Toatasi, Faia o Lou Olaga Faaleaiga ia Fiafia, po o so o se tusi Samoa tuai e 192 ona itulau o loo iai pea i le faapotopotoga. Pe afai e uma sapalai o nei lomiga, ona faaaogā lea o le tusi Ola e Faavavau. E mafai faapefea ona tatou faaaogaina nei lomiga e avatu ai se molimau maeʻaeʻa?
2 Talu ai e masani lava ona popole tagata i mataupu tau i le soifua maloloina, e mafai ona e faapea atu:
◼ “E ui lava ina maoaʻe mea ua mafai ona faataunuuina e vailaau faafomai, ae o loo iai pea le tele o mafatiaga ona o maʻi. O le ā sou manatu, aisea ua faapea ai? [Faatali mo se tali.] Na fetalai Iesu Keriso e faapea, o faamaʻi o le a avea o se vala o aso e gata ai. (Luka 21:11) Ae, o loo faamatalaina mai foi i le Tusi Paia se vaitaimi o le a lē toe iai ni maʻi. [Faitau le Isaia 33:24.] Ia mātau le auala ua faagaee ai e lenei tusi le faamoemoe i lena aʻoaʻoga faavae o le Tusi Paia.” Ia faamatilatila faamatalaga mai le palakalafa e 11, i le itulau e 82 o le tusi Autasia i le Tapuaiga, po o le itulau e 183 o le tusi Olaga Faaleaiga. Ofo atu le tusi ma faamatala i ai e tatou te fiafia e talia se meaalofa talafeagai mo la tatou faiva i le lalolagi aoao.
3 Pe a molimau atu lē fuafuaina e latalata i nofoaga e fai ai faatauga, e mafai ona e faatalofa atu i le tagata ma fesili atu:
◼ “Pe e foliga atu ia te oe ua agaʻi ina matuā taugata mea i aso nei ua matuā faigata ai ona fai lau faasoa? [Faatali mo se tali.] Pe e te manatu e iai ea se taimi o le a maua ai se saogalemu moni tautamaoaiga?” Faatali mo se tali. Ona faatomua lea o se mau talafeagai mai le Tusi Paia i le palakalafa 10, itulau 81, 82 o le tusi Autasia i le Tapuaiga, po o le itulau 183 o le tusi Olaga Faaleaiga. Ona e faaauau lea i lou faapea atu: “I le tusi lenei, o loo faaalia ai le auala, o le a foia ai e le Atua e ala i lona Malo faafitauli ua matuā faigata ai le olaga i aso nei.” Ofo i ai le tusi, ma pe afai e talia, ia faailoa atu i le tagata le avanoa e mafai ai ona ia lagolagosua i le galuega i le lalolagi aoao e ala i le faia o sina meaalofa tauofo. E mafai ona e taʻua lou matuā fiafia i le talanoaga ona e fesili atu lea: “Pe e iai se auala e mafai ai ona ta faaauauina lenei talanoaga i se isi taimi?” I lenei auala atonu o le a mafai ai ona e mauaina le numera o le telefoni po o le tuatusi o le mea e nofo ai le tagata.
4 Atonu e mafai ona e maua se avanoa e faataitai ai lenei taulimaga e uiga i le filemu i le lalolagi, e ala i le faaaogaina o le tusi “Ola e Faavavau”:
◼ “O le ā sou manatu, aisea ua matuā faigata ai ona maua le filemu i le lalolagi? [Faatali mo se tali, ona faaali lea i ai o le ata i le itulau 20-21.] O le ata lenei o se mea na tupu o loo faamatalaina e le Tusi Paia i le Faaaliga. [Ona faitau saʻo mai lea o le Faaaliga 12:7-9, 12 mai le palakalafa 17 o le tusi. Ona faitau lea ma le faamatalaga o i le ata.] O le lē mafai ona maua o le filemu i le lalolagi, o se tasi lea o āuga o le lafoina ifo o le Tiapolo i le lalolagi. O loo taliina i lenei tusi le tele o fesili tāua, ma ou te fiafia e tuuina mo oe pe afai o le a e faitauina.”
5 Pe a toe foi atu e asia i latou na faaalia le fiafia, e mafai ona e taumafai e amata se suesuega faale-Tusi Paia e ala i lou faaaogaina o lenei faafeiloaiga:
◼ “I la ta talanoaga talu ai, e manaia lava se manatu na e faaalia ai. [Taʻua le faamatalaga na faia e le tagata.] Sa ou mafaufau lava i lena faamatalaga, ma ou te manao e fetufaai ma oe iuga o ni sailiiliga na ou faia e uiga i le mataupu. [Talanoa i se mau talafeagai.] Matou te ofoina atu le faia o se suesuega faale-Tusi Paia e aunoa ma se totogi, o se faiga ua mafai ai e le faitau miliona o tagata ona suesueina aʻoaʻoga faavae o le Tusi Paia i se taimi puupuu. O sea suesuega e mafai ona atiina ae ai lou mautinoa i le faataunuuga mautinoa o folafolaga a le Atua.” Ia faamatilatila ni fesili na o le a taliina. Afai e teena e le tagata le ofo o le suesuega faale-Tusi Paia, ia faamatala i ai e faapea e iai foi sa tatou auala faavavevave faapitoa e suesueina ai le Tusi Paia e faaalu ai na o le 15 minute i le vaiaso mo le 16 vaiaso. Faaali i ai le polosiua Manaomia, suʻe i le lesona 1, ma fesili i ai pe mafai ona e faataitai atu le lesona muamua.
6 Ia Manatua e Faaaogā Pepa Valaau: E mafai ona faaaogā i se auala uigā nei pepa valaau i lau faatomuaga ina ia faagaee ai le naunau i mea faaleagaga, pe e mafai foi ona ofo pe afai e lē talia se lomiga. Afai e faaalia le naunau, ona faaaogā lea o le feau lena o loo lomia i tua o le pepa valaau e faamalosiau ai i le tagata ina ia talia se suesuega faale-Tusi Paia ma ia sau i a tatou sauniga.
7 Ia tomai i lau galuega, ma o le a e maua ai le olioli. Ia uaʻi totoʻa atu i le avatuina o se molimau maeʻaeʻa, ma ia matuā fiafia i le faataunuuina lelei o vala uma o le faiva.—1 Timo. 4:16.