Se Asiasiga e Mafai Ona Avea o se Faamanuiaga
1 Sa avea o se mea e olioli ai mo Sakaio le talia o Iesu e avea ma ana mālō i lona fale. Ma e maeu se faamanuiaga na iu i ai lena asiasiga!—Luka 19:2-9.
2 I le avea ma Ulu o le faapotopotoga i aso nei, ua tuuina atu ai e Iesu Keriso faatonuga i toeaina ina ia “leoleo i le lafu mamoe a le Atua.” (1 Pete. 5:2, 3; Ioa. 21:15-17) E lē gata i le aʻoaʻo atu i sauniga ma taimua i le auaunaga i le fanua, ae ua saunia foi e ovasia o le faapotopotoga fesoasoani totino alofa mo tagata taitoatasi o le faapotopotoga. O lea la, i nisi taimi, atonu e te faatalitalia ai le uaʻi totino atu o toeaina, a lē i lou fale, ia o le Maota o le Malo, pe i le auai faatasi i le auaunaga i le fanua, po o nisi lava taimi. Pe e ao ea ona e lagona le fefe i asiasiga a toeaina? E leai. O lo latou asiasi atu ia te oe e lē faapea ai ua e faia se mea sese. O le ā la le fuafuaga o le asiasiga faaleoleo mamoe?
3 Na faapea mai Paulo, sa manao o ia e asiasi atu i le auuso ‘i le fia iloa po o faapefea mai i latou.’ (Galu. 15:36) Ioe, ona o ni leoleo mamoe alolofa, e matuā naunau ai toeaina i le fia iloa po o faapefea mai oe. Latou te mananao e ofoina atu se fesoasoani faaleagaga atonu e aogā ma e atiina ae ai oe. O lena manatu mamafa totino, o loo faanaunau lo tatou Leoleo Mamoe alofa o Ieova ina ia maua e i tatou taitoatasi.—Eseki. 34:11.
4 Ia Talileleia Asiasiga a Toeaina: O le sini o Paulo i le asiasi atu i ona uso, ina ia ‘avatu ia i latou se mea alofa i la le Agaga, e faatumauina ai i latou, ina ia latou fefaamafanafanai ai.’ (Roma 1:11, 12) E manaomia e i tatou uma lava ni faalaeiauga faaleagaga i nei aso faigata o le iuga, ma tatou te manaomia le fesoasoani ina ia faaauau ai ona mausalī i le faatuatua. O lou tali atu ma le mautinoa i se asiasiga faaleoleo mamoe e lē taumatea o le a iu i le mauaina ai o ni fefaamafanafanaaiga lelei.
5 Ia talisapaia le tele o aogā o le a maua mai i le galuega faaleoleo mamoe a toeaina. Afai o iai se mataupu po o se fesili o e atugalu ai, ia manatua o loo iai toeaina i le faapotopotoga e fesoasoani atu. Aua e te faalotolotolua e talanoa ma i latou i so o se mataupu atonu e ono aafia ai lou lelei faaleagaga. Ia talisapaia lenei faatulagaga alofa a Ieova, ma ia olioli ai i faamanuiaga e mafai ona aumaia e na asiasiga.