Ia Ati ae e le Tasi le Isi e Ala i le Faia o ni Tali i Sauniga
1 Ua apoapoaia i tatou i le Eperu 10:24 ina ia ‘taufaatupu e le tasi le isi i le alofa ma galuega lelei.’ E aofia ai i lenei mea le atiina ae e le tasi o le isi e ala i le faia o ni tali uigā i sauniga a le faapotopotoga. Aisea e tatau ai ona faia ni a tatou tali? E mafai faapefea ona tatou faia lenei mea? O ai e mafai ona maua ai aogā?
2 Seʻi manatu i le tele o taimi na e maua ai aogā i lou faalogologo atu i isi o fai mai a latou tali faigofie ma le manino, e faalauteleina ai lou malamalama ma faamalosia ai oe faaleagaga. Ua e maua foi la le faaeaga e faia ai lena lava mea mo i latou. Pe a faia sou sao, ua e faailoa atu ai lou faanaunauga e ‘avatu se mea alofa faaleagaga’ mo le faalaeiauina o i latou uma o loo auai.—Roma 1:11, 12.
3 Le Auala e Faia ai Tali Uigā: Aua le faia ni tali uumi, e faaaofia ai manatu uma lava i le palakalafa. O tali uumi e masani ona lē taulau ai ona maua le tali patino ma e ono faalotovaivai ai nisi mai le faia o se sao. O le tali muamua lava i le palakalafa e tatau ona puupuu, ma o se tali e tuusaʻo atu i le fesili o le palakalafa. O i latou e fai mai ni tali faaopoopo, e mafai ona faia loa ni faatatauga aogā o le mataupu po o le faaalia mai o le auala e faatatauina ai mau. Tagai i le School Guidebook, itulau 90-92.
4 Afai e te manatu i le faia o se tali o se mea e faapopoleina ai oe, ia muai sauniuni se tali puupuu, ma fai i le faisuesuega e tofi mai oe e faia le tali o le palakalafa lena. Pe a mavae ni nai sauniga o e faia lena mea, o le a oo ai ina faigofie ona faia sou sao. Ia manatua na faaalia e Mose ma Ieremia le lē mautonu i lo la tomai e tautala atu ai i luma o le lautele. (Eso. 4:10; Iere. 1:6, faaopoopoga i le pito i lalo o le mau i le NW.) Ae sa fesoasoani Ieova ia i laua e tāutala atu ai e fai mona sui, ma o le a ia fesoasoani atu foi ia te oe.
5 O Ai o le a Mauaina ni Aogā Mai Au Tali? O le a aogā ia te oe lava auā o au tali ua atili faamausalīina ai le upu moni i lou mafaufau ma lou loto, ma faafaigofie ai ona e manatua le faamatalaga i se taimi mulimuli ane. E maua ai foi e isi aogā mai le faalogologo atu i au tali faalaeiau. E faalaeiauina i tatou pe a taumafai tagata uma, e tusa lava pe iai se tomai, talavou, matamuli, pe fou, e faailoa atu lo latou faatuatua i sauniga a le faapotopotoga.
6 Tatou te mautinoa lava ‘o upu e fai atu i le taimi tatau, e maeu lava le lelei’ pe a faaaogā e ati ae ai e le tasi le isi i sauniga!—Faata. 15:23.