Ua Fia Maua Saʻu Suesuega Faale-Tusi Paia!
1 O le toatele o i tatou ua faaalia le naunau mo le fia maua o se suesuega faale-Tusi Paia, ma e mo se mafuaaga lelei. O le galuega o le faia o suesuega faale-Tusi Paia, o iina e tatou te faataunuuina ai lo tatou sini o le faia o soo fou. (Mata. 28:19, 20) Ae peitai, o le toatele lava o i tatou ua faitau masina, pe atonu o ni tausaga foi, e lē o tofo lava i le olioli faapitoa lea e maua mai le aʻoaʻoina o se tasi i le upu moni. O le ā e mafai ona tatou faia e uiga i lenei mea ia Novema? Talu ai o lea ua faatomua i le masina lenei le tusi o Le Poto, e mafai ona tatou faia se taumafaiga faapitoa e faaaogā ai le tusi mo le amataina o ni suesuega fou faale-Tusi Paia.
2 Faataatia Ese se Faaiuga se Tasi pe Sili Atu o le Vaiaso: E matou te faalaeiauina tagata uma ia faataatia ese se taimi i lenei masina e uaʻi totoʻa atu ai i le amataina o se suesuega fou faale-Tusi Paia. E tatau i faisuesuega o Suesuega Tautusi a le Faapotopotoga ona filifili se faaiuga po o ni faaiuga o vaiaso e faaaogā faapitoa mo lenei fuafuaga, ona faamaopoopo lea o a latou vaega ina ia faia se taumafaiga fai faatasi i le galuega o le faia o toe asiga.
3 Ia aumai au faamaumauga o toe asiga i nei faatasiga mo le auaunaga. Ona asiasi atu lea ia i latou uma lava o ē na faaalia le fiafia, na tuuina i ai ni lomiga, pe na auai foi i sauniga. Ia faia asiga taitasi ma se fuafuaga patino o le amataina o se suesuega.
4 Faataitai le Faia o se Suesuega Faale-Tusi Paia: I nisi o faatasiga mo le auaunaga, e tatau ona faia ai se faataitaiga ua saunia lelei, o loo faailoa le auala e amataina ai se suesuega i se toe asiga. Atonu e te faapea atu: “E toatele tagata e tofu ma Tusi Paia, ae latou te lē iloaina, o loo iai i le Tusi Paia tali mo fesili tāua o loo fesagai ma i tatou uma i le olaga. [Faaali le faasologa o mataupu i le tusi o Le Poto, ma faitau ulutala o mataupu 3, 5, 6, 8, ma le 9.] O le faaaogaina o lenei fesoasoani mo suesuega mo se itula pe sili atu i le vaiaso, e mafai ai ona e maua se malamalamaga faavae o le Tusi Paia i le na o ni nai masina. Pe afai e te manao e fili se mataupu se tasi mai nei mataupu, ou te fiafia lava e faailoa atu ia te oe le auala e faia ai lenei polokalame.” Pe afai e faaletonu le tagata e suesue ona o le pisi o lana faasologa, faamatala i ai e iai foi sa tatou polokalame e puupuu lava. Faailoa i ai le polosiua o le Manaomia, ma fai i ai e mafai ona fai se suesuega puupuu lava mo le 15 i le 30 minute i le vaiaso.
5 Afai e faia e i tatou uma se taumafaiga autasi ina ia amataina ni suesuega, ma afai tatou te tatalo mo le faamanuiaga a Ieova i a tatou taumafaiga, o le a tatou maua moni lava ni suesuega fou! (1 Ioa. 5:14, 15) Afai e te manao i se suesuega faale-Tusi Paia, atonu o lou avanoa lenei e amataina ai se suesuega.