Po o E Galue Faatasi ai ma se Fuafuaga?
1 O Ieova o le Atua o fuafuaga. (Isa. 55:10, 11) Ua apoapoaʻiina i tatou ina ia faataʻitaʻi ia te ia. (Efe. 5:1) O lenei mea, e mautinoa e tatau ona faaalia i le auala o loo tatou faatinoina ai la tatou faiva. O lea, ua talafeagai ai le fesili e faapea: “Po o e galue faatasi ai ma se fuafuaga?”
2 O lau talaʻiga mai lea fale i lea fale, molimau atu lē fuafuaina, ma le tufatufaina atu o lomiga o vaega uma lava na o se faiva e iai se fuafuaga. Ae ia manatua o lo tatou tofiga e aofia ai e lē gata i le talaʻiga ae o le faia foi o soo. (Mata. 28:19, 20) Pe a uma ona lūlūina fatu o upu moni o le Malo, e manaʻomia ona tatou toe foi atu ina ia faasūsū na fatu ma tuuina atu le tausiga e lē aunoa a o tatou vaavaai atu ia Ieova na te aumaia le faatelega. (1 Kori. 3:6) E manaʻomia ona tatou faamaoni i le faia o toe asiga ma le amataina o suʻesuʻega faale-Tusi Paia.
3 Faalautele Atu Lau Faiva: E masani ona oo ia te oe se faalogona lelei pe afai e te toe tepa i tua i mea na e faia i le auaunaga ma e faapea ifo: “Ua ou faataunuuina le mea na ou fuafuaina e fai.” E pei ona faamauina i le 2 Timoteo 4:5, na timaʻi mai Paulo e faapea: “Ia e matuā faaiuina lau faiva.” E aofia ai i lena mea le faateleina o au taumafaiga e toe asia tagata fiafia uma na maua. I lau faasologa o le auaunaga faalevaiaso, ia fuafua se taimi patino e faia ai toe asiga. Galue agaʻi i le sini o le taumafai e amataina ni suʻesuʻega faale-Tusi Paia ma i latou o loo naunau i le amiotonu. E tatau ona avea lenei mea ma au fuafuaga pe a auai i le faiva.
4 Fesili atu i le ʻau talaʻi i so latou lagona ina ua latou vaavaai atu i a latou tagata suʻesuʻe o le Tusi Paia ua papatisoina i se fonotaga. Atonu na olioli tele i latou, e pei foi o i latou na papatisoina. Ua latou faataunuuina se fuafuaga sili! Ua faapea ona faamatala mai e se tasi o lē na faia soo: “O le faia o soo o lona uiga, o le sāga faatoʻateleina lea o ē vivii ia Ieova. O lona uiga, o le ola mo i latou o ē talia le upu moni. E ese loʻu fiafia e aʻoaʻo le upu moni i isi—o se mea matagofie tele! . . . O le toʻatele o i latou o ē ua oo ina alolofa ia Ieova, ua avea ma aʻu uō pele.”
5 Seʻi manatu i le lagona e oo i ai pe a mafai ona fesoasoani atu i se tagata e avea ma auauna tuuina atu a Ieova! Maʻeu se pogai mo le olioli! O na fua ua mafai ona maua ona o le galue faatasi ai ma se fuafuaga i le faiva.—Kolo. 4:17.