Tauaofiaga Itumalo a Molimau a Ieova 2000 “O Ē Faia le Afioga a le Atua”
1 “Ou te vivii atu ia te oe i le faapotopotoga tele, ma pese atu ia te oe i luma o le nuu e toatele.” (Sala. 35:18) Seʻi manatu i le fiafia na semanū e fiafia ai Tavita i aso nei i le vaai atu i le faitau afe o tagata o loo faapotopoto faatasi ma le fifilemu ina ia ave i fale faatonuga mai le Atua i a tatou tauaofiaga! Pe sa e iai faatasi ma le 1,826 o ē na auai i se tasi o Tauaofiaga Itumalo o “Afioga Faavaloaga a le Atua”? Ia Aokuso ma Setema 1999, na faia ai ni tauaofiaga se fā i atunuu e tolu i le oganuu a le Lālā o Samoa. O a tatou tauaofiaga itumalo o le tausaga e 2000 o le a saunia ai mo i tatou ni avanoa fou e faapotopoto faatasi ai ma uso tapuaʻi o ē vivii atu ia Ieova, o ē o loo “iloa o latou manaʻoga faaleagaga” ma e fiafia ma naunau e “faalogo . . . i le mea ua fetalai mai ai le Agaga i ekalesia.”—Mata. 5:3, NW; Faaa. 2:29.
2 I lenei tausaga, o loo fuafua ni tauaofiaga itumalo e faia i nisi o atunuu se lua o la tatou lālā. O nofoaga ma aso ia o loo mulimuli mai: Toga: Meeting Hall, Taufaʻahau Road, ʻAtele, Aokuso 4-6, 2000 (Faa-Toga ma le Faa-Peretania). Samoa: Maota mo Tupulaga, Sogi, Apia, Samoa, Aokuso 25-27, 2000 (Faa-Samoa ma le Faa-Peretania). O le a auai i nei tauaofiaga taʻitasi ia uso ma tuafāfine mai Amerika Samoa, Samoa ma Toga, lea o le a maua ai se avanoa matagofie mo fetufaaʻiga o faalaeiauga.
3 Faia o Au Fuafuaga mo se Āpi: O uso ma tuafāfine i Samoa ma Toga e auai i tauaofiaga i o latou lava atunuu, e masani ona nonofo lava i o latou aiga po o le faia o a latou lava fuafuaga mo ni nofoaga e āpi ai. E ui ina iai nisi mai Amerika Samoa o le a fai a latou lava fuafuaga e nonofo i fale o o latou aiga po o uō, ae o le toʻatele o le a āpi i faletalimalo. Afai o lea, faamolemole ia utagia taʻiala nei o mulimuli mai:
(a) Faamolemole, aua le taofia ni avanoa mo ni potu i se faletalimalo e te lē o fuafua e faaaogā po o le taofia foʻi o ni potu i ni faletalimalo e sili atu i le tasi, ma le manatu e muaʻi siaki uma nei fale ona faatoʻā filifili ai lea o le fale e pito sili ona lelei, ae toe soloia isi fale. (Mata. 5:37) O se faiga lē alofa lena mea, ma e taofia ai foʻi faletalimalo mai le mauaina o nisi a latou mālō sa ono iai. E lē mafai ai foʻi e isi tagata talaʻi ona maua le avanoa e faaaogāina ai na potu, ia e masani ona matuā manaʻomia.
(e) Aua le taofia ni potu mo oe po o isi ae lē faailoaina atu suafa, ma ia vave ona aauina atu tupe e taofi ai potu taʻitasi. Pe a aunoa ma se tupe e taofia ai, e iai i le faletalimalo le aiā e avatu ai lou potu mo se isi tagata.
(i) Aua neʻi faanonofoina i le potu ni tagata e sili atu na i lo aofaʻiga ua faatagaina e le pulega a le faletalimalo, e aofia ai ma tamaiti. Ia manatua, o loo e totogia le tau e fua i le aofaʻi o tagata sa e MALIE i ai o le a nonofo i le potu.
(o) Aua neʻi kukaina pe faavevela ni meaʻai i totonu o le potu seʻi vaganā o iai se umukuka mo lena fuafuaga, ma ia faaeteete e aua neʻi faapalapalāina so o se mea i totonu o le potu i au mea taumafa.
4 O le mulimuli i lenei taʻiala ua tatou maua ai le avanoa e faaalia ai lo tatou alofa mo o tatou uso Kerisiano. (1 Kori. 10:24; 1 Timo. 6:8) Ae peitaʻi, o le solia o nei vala e faalumaina ai le suafa o Ieova faapea foʻi le faalapotopotoga.—Sala. 119:168.
5 Tausia o i Latou e Iai Manaʻoga Faapitoa: O ʻauaiga, o toeaina, ma isi i le faapotopotoga o loo latou iloa tulaga patino o ni tagata matutua, o ē lē atoatoa le malosi o le tino, o ē auauna faataimi atoa, po o isi e iai manaʻoga faapitoa, e mafai ona faaalia le manatu mamafa alofa e ala i le fesoasoani atu ia i latou nei ina ia auai i le tauaofiaga. E patino le moni o lenei mea i ē faimalaga mai Amerika Samoa. (Faatusatusa i le 1 Timoteo 5:4.) I le pepa a le Sosaiete o le Special Needs Room Request, o loo otooto mai ai tulaga talafeagai e manaʻomia ina ia auina atu ai lenei pepa. O lenei sauniuniga e mo na o tagata talaʻi e lelei o latou tulaga, e aofia ai i latou e amio lelei a latou fanau, o ē ua faamaonia e le Komiti o le Auaunaga a le Faapotopotoga. O nei talosaga e tatau ona aauina atu i le Matagaluega mo Āpi i le vave e mafai ai, i le faaaogāina o le tuatusi o le tauaofiaga o loo i le isi itu o le pepa.
6 Auai i se Isi Tauaofiaga: I lenei tausaga o loo fuafua e le Sosaiete le iai o ni usufono faamaonia mai Amerika Samoa ma Samoa e auai i le tauaofiaga i Toga, ma mo usufono faamaonia mai Toga e auai i le tauaofiaga i Samoa. O le a faamatalaina i tusi mai le Sosaiete laasaga e uia e talosagaina ai le avea ma se tasi o usufono, ma o le a logo atu i latou ua faamaonia. O le a taumafai e faia fuafuaga ina ia malaga o se vaega toʻatele. Atonu o le a mananaʻo uso ma tuafāfine i le aai o loo faia ai le tauaofiaga e ofo atu ni āpi mo nisi o nei ʻauusufono mai fafo. O le talia o i latou o le a faaopoopo atu i faalaeiauga e maua mai le tauaofiaga.
7 Fuafua Ina ia Auai i Aso Uma e Tolu: Po ua taumafai ea Satani e faatosina ese oe mai le uaʻi totoʻa atu i mea faaleagaga? E faanoanoa ona ua misia e le toʻatele o uso ma tuafāfine ma o latou aiga meaʻai matuā tāua faaleagaga. E faapefea? E ala i le lē auai i le polokalame o le tauaofiaga itumalo i le Aso Faraile. I nisi o tulaga ua mātauina ai faapea, e matuā toʻatele lava o tatou uso ua misia faatonuga faaleagaga atoa ma le aufaatasiga o uso ia e maua i le polokalame o le Aso Faraile.
8 Atonu e faatalatū isi uso e faafesootaʻi o latou pule o galuega e talosagaina ni aso mālōlō mai galuega ina ia auai i le tauaofiaga. Po o le tulaga ea lea o loo e iai? Aiseā e lē tatalo ai ia Ieova e uiga i le mataupu ma maua ai le lototele e faamatala atu lou tulaga i lou pule? Manatua le iʻuga lelei na oo ia Neemia, o lē sa iai i se tulaga faapena. (Nee. 2:1-6) Ia faatuatua i le naunau o lo tatou Tamā faalelagi e fesoasoani atu ia te oe, i lou iloa e faapea, pe afai e te faamuamua manaʻoga o le Malo, o le a ia saunia mea e manaʻomia i le olaga.—Mata. 6:32e, 33.
9 E Faapefea Ona Aafia Oe i a Tatou Tauaofiaga? Na tusi mai se tuafafine mai le itu i sasaʻe o le Iunaite Setete e faapea: “Faafetai tele lava ona o le tauaofiaga itumalo i le 1999. O le auaufaatasi ma uso o ē na o le faatasi lava ona ou vaai i ai i tausaga taʻitasi, ou te matuā olioli ai. Na ou maua le upu moni a o avea aʻu ma se talavou sa maua i le maʻitaga, ma o loo oʻu manatua pea ma le matuā fiafia le taimi na ave ai aʻu e lē na faia laʻu suʻesuʻega faale-Tusi Paia i laʻu uluaʻi tauaofiaga. Sa ou vaavaai atu i ao i luga aʻe o loʻu ulu i lena malae taalaelae a o matou usuina le pese o le Malo, ‘Mano ni Mano o Uso’ ma sa ou tagi. Sa ou fesili ifo ia te aʻu lava, ‘I loʻu faatasi ai ma nei tagata matagofie uma o loo siʻomia ai aʻu, e mafai faapefea ona manaʻo mai Ieova ia te aʻu?’ I lena aso sa ou filifili ai ou te auauna atoatoa ia Ieova.” Maʻeu se faamāfanafanaloto! O le mea moni o se fiafiaga le auaufaatasi ma tagata mamā o Ieova, a ea?
10 I le vaega faaiʻu o aso e gata ai, ua sili atu ai ona tatou manaʻomia a tatou tauaofiaga itumalo faaletausaga na i lo se isi lava taimi muamua atu. O se sauniuniga mai ia Ieova ina ia tausia ai pea lo tatou soifua mālōlōina faaleagaga ma le paleni. O le mea lea, ia faia lau faaiʻuga ina ia e auai i aso uma e tolu o le Tauaofiaga Itumalo “O Ē Faia le Afioga a le Atua” i lenei tausaga. E mafai faapefea ona e faataunuuina lau faaiʻuga? Talosaga atu i lou pule a o mamao le taimi mo ni aso mālōlō mai le galuega ina ia e auai i le tauaofiaga atoa. Afai e faalēlava lau seleni, ia amata i le taimi nei ona tuu ese se seleni talafeagai ina ia mafai ai ona e auai i le tauaofiaga. Talosaga atu ia Ieova ina ia fesoasoani ia te oe ia e manumalo mai so o se toʻatugā. A o e faia faapea, e mafai ona e tulimataʻi atu e olioli i le aufaatasiga māfana ma ou uso ma tuafāfine ma faalogologo atu i afioga o le ola e faavavau mai lo tatou Tamā alofa faalelagi, o Ieova.—Faatusatusa i le Ioane 6:68.
[Pusa i le itulau 3]
Taimi o le Polokalame
Aso Faraile ma le Aso Toonai
9:30 i le taeao – 5:00 i le afiafi
Aso Sa
9:30 i le taeao – 4:00 i le afiafi