Tauaofiaga Itumalo a Molimau a Ieova 2008
1. (a) Aiseā e avea ai le fautuaga a Paulo i Kerisiano i Eperu ma lapataʻiga faanatinati i aso nei? (Faitau le Eperu 10:24, 25.) (e) O le ā le avanoa o loo loma nei lea o le a tatou faatatauina ai le fautuaga a Paulo?
1 Na faalaeiauina e le aposetolo o Paulo Kerisiano i Eperu ina ia faapotopoto faatasi, ma ia ‘atili foʻi’ ona fefaalaeiauaʻi ona ua latou iloa, o le aso ua taulata mai. (Epe. 10:24, 25) Ua tele faamaoniga o le latalata mai o le “Aso” na taʻua e Paulo! O lea la, ua tatou taulaʻi atu ai mo avanoa e faatasitasi ai ma uso ma tuafafine ina ia maua faatonuga faaleagaga, lea e taʻitaʻia ai i tatou i nei “aso e gata ai,” a o faateteleina lamatiaga. (2 Timo. 3:1) O le a maua lenā avanoa i le tauaofiaga itumalo 2008 lea o loo loma nei.
2. (a) Aiseā e tāua ai le auai i aso uma e tolu o le tauaofiaga? (e) E faapefea ona tatou amata fuafua ina ia auai?
2 Auai i Aso Uma e Tolu: E faalaeiauina outou ina ia auai i aso uma e tolu. O le a tatou maua aogā mai aʻoaʻoga faaleagaga pe afai e lē “lafoaʻiina le faapotopotoina o i tatou.” (Epe. 10:25) Ia vave amata ona fuafua i ai. E mafai ona e vave talosaga i lau pule o le galuega ina ia faia so o se fuafuaga talafeagai. Ia logo foʻi faiaʻoga i lau fuafuaga pe afai e aʻoʻoga lau fanau i le taimi o le tauaofiaga. Ia faailoa iā i latou o le fonotaga, o se vaega faifai pea o lau tapuaʻiga. E mautinoa le faamanuiaina e Ieova o au taumafaiga ina ia faamuamua manaʻoga o le Malo.—Mata. 6:33.
3. O ā auala e tatou te manatunatu ai i isi?
3 Fesoasoani i Isi ia Auai: Na augani atu foʻi Paulo i ona uso ina ia “manatunatu foʻi le tasi i le tasi.” (Epe. 10:24) Po o manaʻomia e uso ma tuafafine i la outou Suʻesuʻega Tautusi a le Faapotopotoga se fesoasoani ina ia auai i le tauaofiaga? Pe e mafai ona e fesoasoani i lau tagata aʻoga o le Tusi Paia ina ia auai i le tauaofiaga, e tusa lava pe na o le tasi le aso e auai ai? Afai ua logo i ou tauaiga lau fuafuaga mo le tauaofiaga, ia valaaulia i latou e tou te auai faatasi. Atonu o le a e tofo i ni faamanuiaga e lē faatalitalia ona o au taumafaiga alofa.
4. E faapefea ona tatou mauaina faamatalaga e faatatau i le aso ma le nofoaga e faia ai le tauaofiaga itumalo?
4 Mauaina Faamatalaga: E toʻatele tagata ua vili atu i ofisa o lālā o i atunuu uma, i tausaga taʻitasi, e fia iloa le aso ma le nofoaga o le a fai ai le tauaofiaga. O le toʻatele o nei tagata e vili atu, o uso ma tuafafine ua leva ona mauaina faamatalaga. E lelei pe a tagaʻi muamua i le Olomatamata o Mati 1, 2008, a o leʻi vili atu i le ofisa o le lālā.
5. O le a e ao ona fai pe a manaʻomia ni faamatalaga mo api, pe afai o le a e auai i se tauaofiaga e ese mai i lea na tofia i ai la tatou faapotopotoga?
5 Afai o le a e auai i se tauaofiaga e ese mai i lea na tofia i ai lau faapotopotoga, e te ono maua faamatalaga faaopoopo mo faletalimālō pe a e tusi atu i le nofoaga autū mo tauaofiaga, e faaaogā ai le tuatusi i le pito i tua o le pepa Special Needs Room Request. O na pepa o le a avatu i le failautusi a le faapotopotoga. Ina ia tali mai le nofoaga autū mo tauaofiaga iā te oe, ia faamautinoa ua lafo faatasi i lau tusi se teutusi ua iai se faailoga.
6. O ā nisi o mea e ao ona manatua e faatatau i le pepa o le Special Needs Room Request?
6 Se Manaʻoga Faapitoa: Afai e manaʻomia e se tagata talaʻi se fesoasoani i le mauaina o se api, e ao i le Komiti o le Auaunaga a le Faapotopotoga ona filifili pe agavaa le tagata talaʻi i se talosaga o le pepa Special Needs Room Request. A o leʻi auina atu e le failautusi le talosaga i le Matagaluega o Api o tauaofiaga, e ao ona iloilo totoʻa taʻiala o loo i le pepa talosaga, ma le tusi na auina atu i toeaina uma iā Tesema 14, 2007.
7. (a) O ā auala e tatou te viiviia ai Ieova pe a auai i a tatou tauaofiaga? (e) O ā manatu na faaalia e pule o faletalimālō ona o amioga lelei a o tatou uso ma tuafāfine?
7 Galuega Lelei: O le usiusitaʻi i poloaʻiga a Ieova ina ia faapotopoto faatasi i le tapuaʻiga, e tatou te maua ai “mea e aogā.” Ae sili atu i lenā, o le a tatou maua ai avanoa e viiviia ai le suafa o Ieova. (Isa. 48:17) E iloa e le toʻatele a tatou “galuega lelei” i taimi o tauaofiaga itumalo, ma ua uunaʻia ai nisi e taʻu mai o latou lagona. (1 Timo. 5:25) I se tasi aai i le mea na faia ai tauaofiaga mo le tele o tausaga, na faailoa mai ai e se pule o se faletalimālō e faapea: “Ua tele ina talanoa tagata i le aai e faatatau i Molimau a Ieova ma le aogā o la outou tauaofiaga. Na matou vaaia lo outou faamamāina o le maota fono ma mea e paka ai taavale. Sa matou fiafia ina ua matou faatasi ma outou a o faagasolo le tau māfanafana (taimi o mālōlōga), ma e matou te faamoemoe e faatasitasi pea ma outou i taimi o i luma.” Ina ua iloa e le tamāloa pule o se faletalimālō le eseesega o uiga faaalia o isi vaega ma ʻau faafiafia, na ia faamālō ai i o tatou uso ona o le felagolagomaʻi ma le onosaʻi a o nonofo i le faletalimālō. Na ia faapea mai, “Maʻimau pe ana pei uma a matou mālō o Molimau a Ieova!” Ua matuā faafiafiaina Ieova le Atua i nei manatu na faaalia, ona o amioga lelei a o tatou uso ma tuafāfine!
8. E faapefea ona faailoa mai e le Mataio 4:4 le tāua o le uaʻi lelei i vaega uma o le polokalame?
8 Na fetalai Iesu e faalagolago lo tatou ola i le faalogo i “afioga uma e tulei mai i le fofoga o le Atua.” (Mata. 4:4) E saunia e Ieova meaʻai faaleagaga “i ona itu aso” i taimi o tauaofiaga faaletausaga, lea e sauniunia mai e le “auauna faamaoni ma le mafaufau.” (Mata. 24:45) E matuā tele galuega na faia i le sauniunia ma le tufatufaina o nei meaʻai faaleagaga. Ioe, o lo tatou auai ma le uaʻi lelei i vaega taʻitasi o le polokalame, e faaalia ai lo tatou faafetaia o Ieova ona o lana tausiga alofa.
[Pusa i le itulau 3]
Taimi o le Polokalame:
Aso Faraile ma le Aso Toonaʻi
9:20 i le taeao – 4:55 i le afiafi
Aso Sa
9:20 i le taeao – 4:00 i le afiafi
[Pusa i le itulau 4]
Ia taumafai e:
▪ Auai i aso uma e tolu
▪ Fesoasoani i isi ia auai
▪ Faia galuega lelei