Tauaofiaga Itumalo a Molimau a Ieova 2009
1. (a) O ā faamanuiaga tatou te maua pe a auai i aso uma e tolu o le tauaofiaga itumalo? (e) O ā fuafuaga e ao ona tatou faia i le taimi nei?
1 O loo tatou sagisagi fiafia uma ma tulimataʻi le tauaofiaga itumalo 2009, o se avanoa lelei e faatasitasi ai ma aumea tapuaʻi iā Ieova, o ē e “naunau i mea faaleagaga.” (Mata. 5:3) Ua latalata mai lava le aso o Ieova, ma e matou te faalaeiauina outou uma ia auai i aso uma e tolu ina ia maua atoatoa aogā mai faatasitasiga māfana faa-Kerisiano, faapea faalaeiauga faaleagaga ina ia mausalī i le faatuatua. (Sefa. 1:14) Ia faailoa i faiaʻoga ma tagata e pule i galuega, o tauaofiaga, o se vala e tāua tele i lau tapuaʻiga. Ia loto tele ma vave ona fai au fuafuaga ma ia tatalo atu mo le faamanuiaga a Ieova; ma e mautinoa lava lona lagolagoina o oe.—Isa. 50:10.
2. O le a faapefea ona pei e faavaomalo tauaofiaga tatou te auai, e tusa lava pe lē valaaulia i tatou e auai i se tauaofiaga faavaomalo?
2 Tauaofiaga Faavaomalo: O nei tauaofiaga e lē o atunuu uma ma aai o le a faia ai, o le mea lea, e na o ē ua tofia i ai, e ao ona auai atu i ai. O lo tatou lagolagoina o nei fuafuaga, o le a taofia ai le soona tumutumu naʻuā i ia tauaofiaga. (1 Kori. 14:40; Epe. 13:17) Ae o le a pei lava e faavaomalo le tele o tauaofiaga, ona e toʻatele misionare, o tagata Peteli o loo galulue i atunuu ese, ma auauna faavaomalo o le a auai i tauaofiaga i o latou atunuu na ō mai ai.
3. E faapefea ona tatou faaalia le alofa faa-Kerisiano i a tatou faapotopotoga?
3 Fesoasoani i Isi ia Auai: Po o iai nisi i lau faapotopotoga o manaʻomia le fesoasoani ia auai i tauaofiaga? Pe a e fesoasoani i se isi ina ia auai, e tusa ua e “vaavaai ma le naunau e lē gata i au lava mea, ae i mea foʻi e lelei ai isi.”—Fili. 2:4.
4, 5. O le ā e fai, pe afai ona o lou tulaga, e manaʻomia ai ona e auai i se isi tauaofiaga e ese mai le tauaofiaga lea ua tofia i ai la outou faapotopotoga?
4 Mauaina o Faamatalaga: Faamolemole, tagaʻi muamua i Le Olomatamata o Mati 1, 2009, pe fesili i le failautusi o lau faapotopotoga, mo faamatalaga o loo e manaʻomia, ina ia faaitiitia ai le vili atu i le ofisa i Samoa e tusa o aso ma nofoaga e fai ai tauaofiaga.
5 Afai e te auai i se tauaofiaga e lē o tofia i ai lau faapotopotoga, e maua sau lisi o api, pe a tusi atu i le tuatusi o le matagaluega e gafa ma api, o loo i tua o le pepa Special Needs Room Request. Ua lē o toe umi ona auina atu lea o nei pepa i failautusi o faapotopotoga. Ina ia maua mai se tali, ia lafo faatasi ai ma se teutusi ua pipii ai se faailoga lafo tusi, ma ua faatuatusi atu iā te oe.
6. O le ā e fai pe a manaʻomia e se tagata talaʻi o iai se manaʻoga faapitoa se fesoasoani tau api?
6 Manaʻoga Faapitoa: Pe afai e manaʻomia e se tagata talaʻi le fesoasoani i se api, e filifili le Komiti o le Auaunaga a le Faapotopotoga pe talafeagai ona ia maua se pepa Special Needs Room Request. A o leʻi auina atu e le failautusi o le faapotopotoga le pepa lea i le Matagaluega o Api, e ao ona autalu e toeaina taʻiala ua iai i le tusi o Tesema 14, 2008, na auina atu i ʻau toeaina uma.
7. O le ā lo tatou faanaunauga autū a o tatou sauniuni faapea ma lo tatou auai atu i le tauaofiaga itumalo 2009?
7 Galuega e Faamamaluina ai le Atua: Pe afai tatou te faaalia le fua o le agaga i mea uma e fai, aemaise lava la tatou tautala ma feutagaʻiga ma tagata faigaluega i faletalimālō ma isi i le aai e fai ai le tauaofiaga, ua tatou saosaolaumea ai i le taʻuleleia o tagata o Ieova ma ʻalofia ai le faatausuai i isi. (1 Kori. 10:31; 2 Kori. 6:3, 4) Tau ina ia faamamaluina le Atua e ala i lou auai i le tauaofiaga itumalo 2009, faapea ma lau amio lelei!—1 Pete. 2:12.
[Pusa i le itulau 5]
Taimi o le Polokalame:
Aso Tofi (Mo na o Tauaofiaga Faavaomalo)
1:20 aoauli - 4:55 afiafi
Aso Faraile ma le Aso Toonaʻi
9:20 taeao - 4:55 afiafi
Aso Sa
9:20 taeao - 4:00 afiafi
[Pusa i le itulau 6]
Mea e Faamanatu mo le Tauaofiaga Itumalo
◼ Taimi o le Polokalame: E amata le polokalame i le 9:20 i le taeao i aso uma e tolu (seʻi vaganā ai Tauaofiaga Faavaomalo). O le a tatala faitotoʻa i le 8:00 i le taeao. Pe a amata ona tātā musika o le Malo e amata ai, e ao iā i tatou uma ona nofoi i nofoa ina ia amata ai le polokalame i se tulaga mamalu. O le a faaiʻu le polokalame o le Aso Faraile ma le Aso Toonaʻi i le 4:55 i le afiafi, ae o le Aso Sa i le 4:00 i le afiafi.
◼ Paka o Taavale: O nofoaga uma o le a faia ai tauaofiaga lea e tatou te pulea atoatoa mea e paka ai taavale, o le a maua lau paka e aunoa ma se totogi. O le a faaaogā pine fatafata o le tauaofiaga e fai ma faailoga e maua ai sau paka.
◼ Taofia o Nofoa: E ono mafai ona taofia na o nofoa mo ē o loo outou faimalaga faatasi i le taavale, po o tagata o loo nonofo faatasi i le aiga.
◼ Taumafataga i le Aoauli: Faamolemole ia aumai se taumafataga mo le aoauli, na i lo le alu ese atu mai le nofoaga o le tauaofiaga e aumai se taumafataga i le mālōlōga. E mafai ona faaaogā se tamaʻi cooler e ofi i lalo o lou nofoa. O cooler lapopoʻa, ipu mataʻetaʻe, ma le ʻava malosi e matuā lē faatagaina lava i le nofoaga e fai ai le tauaofiaga.
◼ Foaʻi: E tele ni tupe e faaalu i le saunia o se tauaofiaga itumalo. E faaalia lo tatou talisapaia i le faia o ni foaʻi tauofo mo le galuega i le lalolagi aoao, i le tuuina atu i pusa i le Maota mo Sauniga po o le tauaofiaga.
◼ Faalavelave Tutupu ma Mea e Tutupu Faafuaseʻi: Ua aumai le faaseā a le auaunaga o faalavelave faafuaseʻi ona o le tele o telefoni e vili atu i ni nai mea laiti e tutupu. Pe afai e iai se maʻi e oso faafuaseʻi, faamolemole ia faafesootaʻi se tagata tautua o latalata ane, o ia e na te logoina le vaega o le Auaunaga Muamua ina ia vaai i ai ē agavaa i le matuiā o le tulaga, ma fesoasoani i ai.
◼ Laau Puʻeleo: E lē tatau ona sulu atu se uaea o so o se mea puʻeleo po o mea puʻeata i so o se palaka po o mea faaleotele leo o le fale, ma e ao ona faaaogā i se auala e lē faalavelave ai i isi.
◼ Puʻeina o Ata: Pe a puʻe ni au ata, e lē tatau ona emo se meapuʻeata a o faagasolo le polokalame.
◼ Telefoni Feaveaʻi: E tatau ona seti ina ia lē avea ma faalavelave a o faagasolo le polokalame.
◼ Le Nofoaga E te Api Ai: (1) Ia talosaga mo se nofoaga e api ai a o leʻi taitai le taimi. (2) Ia fesoasoani i le sauniaina o taumafataga ma feʻau i le fale. (3) Ia ofo atu e te totogia nisi o tupe faaalu a o e nofo i inā. (4) Ia fai au lava fuafuaga i le faimalaga atu ma le toe foʻi mai, mai le nofoaga o le Tauaofiaga. (5) Ia faaali fua o le agaga paia i taimi uma.—Kala. 5:22, 23.