Ia Mafaufau i le Afioga a Ieova i Aso Uma!
1 I aso taʻitasi e tulaʻi mai ai ni luʻi fou i lou faatuatua. Atonu o se tagata o le lalolagi e te lua masani e na te tauanauina pea oe lua te faia se tuugātala. Atonu e manaʻo lou faiaʻoga e te sailia se galuega totogi, pe e manaʻo lou pule e te faigaluega ova taimi. Atonu ua faalēlelei foʻi lou soifua mālōlōina. E ui lava e te ono fesagaʻi ma na tulaga faigatā i nisi taimi, ae e lē o tuua ai na o oe. O loo nofo sauni Ieova e avatu ia te oe le atamai manaʻomia ina ia e faafetaiaʻia ai na tulaga. O le talanoaina o le mau o le Tusi Paia ma faaopoopoga i le tusi, Iloiloina le Tusi Paia, o le tasi lena auala e mafai ai ona e ave i fale i se auala faifai pea le Afioga a Ieova. Po o e faaaogā lelei ea lenei sauniuniga?
2 E Avanoa Pea le Fesoasoani: Ua faamatalaina i le Isaia 30:20 ia Ieova o le ‘Aʻoaʻo Sili’ o lē e mafai ona vaavaai atu i ai tagata o le Atua mo se fesoasoani. E na te avatua ia te oe le mea tonu lava o loo e manaʻomia ina ia mafai ai ona e faafesagaʻia luʻi i lou faatuatua. E faapefea? Ua faamatala mai i le fuaiupu o loo sosoo ai e faapea: “E faalogo foi o outou taliga i le upu i o outou tua, . . . e faapea mai, O le ala lava lenei, ia outou savavali ai.” I aso nei, ua aauina atu ai e Ieova lana “upu” e ala i le Tusi Paia faapea ma lomiga a ‘le auauna faamaoni.’ (Mata. 24:45) O loo iai le ʻoa o le atamai i mataupu o Le Olomatamata i tausaga ua mavae, o loo fesootaʻi atu ma le toetoe lava o vala uma o le olaga faa-Kerisiano. O le autaluina o faamatalaga o loo sii mai i le tusi, Iloiloina le Tusi Paia, e fesoasoani lea ia te oe e fausia aʻe ai se fale teuoloa o le malamalama lea e sili ona tāua i le faafesagaʻia o ituaiga eseese o tofotofoga.—Isa. 48:17.
3 Ia Faaavanoa se Taimi mo Lea Vala: E ui lava o taeao o se taimi pisi, ae sa fai ma sini o se tasi tinā le faitau ma talanoaina le mau ma faaopoopoga ma lana tama tama a o fai le taumafataga o le taeao a lana tama. O nei upu faatasi ai ma le tatalo, o upu mulimuli na sa faalogo i ai le tama i taeao taʻitasi a o leʻi alu atu i le aʻoga. O na upu sa faamalosiʻau ia te ia ina ia tetee atu i faatosinaga i faiga faaleituaiga, ma tumau ai ma le lē faagutugutulua pe a fesagaʻi ma faiga lotonuu, ma avatu ai ma le lototele se molimau i tamaiti aʻoga faapea foʻi i faiaʻoga. E ui lava sa na o ia le Molimau i le aʻoga, ae sa lē tāitai ona ia lagona faapea ua tuua na o ia.
4 Ia vaavaai atu ia Ieova ma lana Afioga mo faatonuga ma taʻiala. Afai e te faia faapena, o le a moni o ia ia te oe, e pei o se uō maufaatuatuaina. Ia liliu atu ia te ia i aso uma! Faatasi ai ma le faitau miliona o isi tagata i le lalolagi aoao o ē o loo saili atu i aso uma i le Afioga a le Atua, tau ina ia avea ou mata ma ‘mata e vaai atu i lou Aʻoaʻo Sili.’