O le ā e Mafai Ona Fesoasoani ia i Tatou ia Tūmau i le Faatuatua?
1 Talu lava ona amata ona tatou auaufaatasi ma le faalapotopotoga a Ieova, ua faamaonia le avea o lo tatou agaʻigaʻi i luma faaleagaga ma puna o lo tatou ʻoliʻoli! Peitaʻi, ina ia tausia le ‘mauaa, le atiina ae, ma le faatumauina i le faatuatua,’ e manaʻomia ona faaauau pea ona tutupu aʻe faaleagaga. (Kolo. 2:6, 7) A o taulau manuia le toʻatele i le itu faaleagaga, e iai nisi ua tafetafea ese ona o le lē taulau ona “tumau i le faatuatua.” (1 Kori. 16:13) E mafai ona tatou puipuia le ono tupu o lenei mea ia i tatou. E faapēfea?
2 Gaoioiga Faifai Pea Faaleagaga: Ia faamautū se faasologa lelei faaleagaga i totonu o le faalapotopotoga a Ieova. Iinei, o loo matuā tausia lelei ai o tatou manaʻoga faaleagaga. O sauniga a le faapotopotoga, fonotaga, ma tauaofiaga ua uunaʻia ai i tatou ina ia tutupu aʻe i se tulaga e sili atu faaleagaga ma ia faatūmauina ai, pe a faapea o lea tatou te auai pea e lē aunoa ma seleseleina mai ai aogā. (Epe. 10:24, 25) O le iai o se faasologa faifai pea o le faitauina o le Tusi Paia, o mekasini o Le Olomatamata ma le Ala Mai!, ma tusi o loo talanoaina ai meaʻai aano o le Afioga a le Atua o le a faapogaia ona faalolotoina ma mālolosi ai o tatou āʻa faaleagaga. (Epe. 5:14) O le faataatitia o ni sini tōtino faaleagaga ma galulue ma le filigā ina ia faataunuuina, o le a aumaia ai foʻi aogā tūmau.—Fili. 3:16.
3 Fesoasoani Mai Ē Taʻumatuaina: Taumafai ina ia faalautele atu e ala i le auaufaatasi ma tagata ua taʻumatuaina faaleagaga i le faapotopotoga. Taumafai e faamasani i le ʻautoeaina, talu ai o i latou tonu na e mafai ona faamalosia i tatou. (1 Tesa. 2:11, 12) Ia talia ni aʻoaʻiga po o ni fautuaga e latou te ono ofoina mai. (Efe. 4:11-16) E fiafia foʻi auauna o le faiva e fesoasoani i isi ina ia faatūmauina i le faatuatua, o lea, ia vaavaai atu i na uso mo ni faalāʻeiʻauga.
4 Pe e te manaʻomia se fesoasoani i le faiva? Talanoa i toeaina, ma talosaga mo se fesoasoani. Atonu e mafai ona faaaofia ai oe i le polokalame Fesoasoani Paeonia i Isi. Pe o oe o sē fou faatoʻā papatisoina? O le suʻesuʻeina o le tusi Our Ministry ma faatatauina mea o iai o le a uunaʻia ai se agaʻigaʻi i luma i le taʻumatuaina faaleagaga. Pe o oe o se matua? Ia faaauau pea ona faamālosia le tulaga faaleagaga o lau fanau.—Efe. 6:4.
5 E ala i le mauaʻa ma tūmau i le faatuatua, ua tatou ʻoliʻoli ai i se faiā vāvālalata ma Ieova faapea se aufaatasiga māfana ma o tatou uso. E mafai e lenei mea ona tatou tatalia ai osofaʻiga a Satani, ma faamālosia ai lo tatou faamoemoe mo le ola e faavavau i le lumanaʻi.—1 Pete. 5:9, 10.