“Ia Muamua ona Tofotofoina”—Faapefea?
1 Ona o le faatuputeleina pea o le faalapotopotoga a Ieova, ua iai pea foʻi se manaʻoga mo ni uso agavaa e avea o ni auauna o le faiva. O le toʻatele o uso e leʻi tofia, e aofia ai ma talavou, o loo iai se faanaunauga e auauna i le faapotopotoga. Pe a tofia atu la ia i latou ni galuega faaopoopo, ona oo lea ia i latou le lagona ua aogā ma lagona le lotomalie ua mafai ona faataunuuina se mea. O lo latou agaʻigaʻi pea i luma e faalagolago i le “muamua ona tofotofoina” o i latou. (1 Timo. 3:10) E faapefea ona faataunuuina o lenei mea?
2 Le Vaega a Toeaina: O se vaega o le fuaina o se uso e tusa ai ma agavaa faale-Tusi Paia mo auauna o le faiva na o loo maua i le 1 Timoteo 3:8-13, o le a tofotofoina ai e toeaina se uso po ua faamaonia le agavaa e tauaveina se tiute tauave. Atonu latou te tofia o ia e faia ni galuega fesoasoani e tusa ai ma le faasoaina o mekasini ma lomiga, taulimaina o mea faaleotele leo, faaleleia o le Maota o le Malo ma isi mea faapena. O le a mātauina e toeaina le auala e tali atu ai ma le tausia o lona tofiga. O le a latou vaavaai mo uiga o le maufaatuatuaina, le tausisi i le taimi, filigā, lotomaulalo, le agaga o le lotomalie, ma se tomai e feagai lelei ma isi. (Fili. 2:20) Po o fai o ia ma faaaʻoaʻoga lelei i ona lāʻei ma teuga? Po o iai sona uiga naunau i le faia o tiute tauave? E mananaʻo toeaina e vaaia i lana “amio lelei ana lava galuega, i le agamalu o i ai le poto.” (Iako. 3:13) Po o manaʻo moni o ia e fesoasoani atu i le faapotopotoga? Po o ia faia le poloaʻiga a Iesu e ‘fai tagata ma soo’ e ala i le auai ma le maelega i le faiva i le fanua?—Mata. 28:19; tagaʻi i Le Olomatamata o Aperila 15, 1991, itulau 10-20.
3 E ui ina e leai se faatulagaga faatapulaaina mo tausaga e tofia ai se tasi e avea ma auauna o le faiva, ua faasino atu le Tusi Paia i na uso e faapea o “[tane] ua lelei ona fai o le faiva.” E faigatā la ona tatou faatalitalia i latou o ni tagata e faatoʻā taʻi sefulutolu ma ona tupu tausaga, aemaise lava o loo taʻua ai le ono iai o se avā ma se fanau. (1 Timo. 3:12, 13) O na tane e lē tatau ona lolo atu i “tuʻinanau o taulelea” ae ao ona taʻuleleia i latou, ia amio lelei ma ia iai se lotofuatiaifo mamā i luma o le Atua ma tagata.—2 Timo. 2:22.
4 A o aogā le tomai ua iai i le tagata lava ia, o uiga faaalia ma uunaiga a se tasi e taulia moni lena. Pe e naunau ma le lotomaulalo se uso e vivii atu i le Atua ma auauna atu i ona uso? Afai o lea, o le a faamanuia e Ieova ana taumafaiga ina ia agaʻigaʻi i luma i le faapotopotoga.