Tausisia o Amioga Lelei e Viia ai le Atua

¹ I so o se mea lava e tatou te iai, o a tatou amio, laʻei, ma teuga e molimau lava e uiga ia i tatou faapea le Atua o loo tatou tapuaʻi atu i ai. Ua mātauina faapitoa lava lenei mea i faatasitasiga tetele a tagata o le Atua, iinā o loo mātauina ai i tatou e le toʻatele o tagata. Pe a avea i tatou ma faaaʻoaʻoga lelei, o le a faamamaluina ai le suafa o Ieova. (1 Pete. 2:12) Ae peitaʻi, o amioga lē lelei po o gaoioiga lē mafaufau a na o sina vaega toʻalaitiiti e mafai ona faalumaina ai le suafa o le Atua faapea ma ona tagata. (Fai. 9:18e) O le manatuaina e faapea, ona o a tatou amio e faamasinoina ai e tagata i tua la tatou faalapotopotoga ma le Atua o loo tatou tapuaʻi i ai, e tatau ai ona tatou mataalia e “faia mea uma ia viia ai le Atua.”—1 Kori. 10:31.

² Amioga e Fai ma Faaaʻoaʻoga Lelei i Faletalimalo: I le tele o tulaga, e matuā faafiafiaina lava tagata faigaluega o faletalimalo ona o le pulea lelei, amio faaaloalo, ma le tumamā o Molimau a Ieova. I le talanoa e uiga i aiga Molimau sa nonofo i lona faletalimalo, na faapea mai ai se tasi pule: “O fanau a Molimau a Ieova, o ni tamaiti sili ia ona lelei ua ou vaai i ai! E laʻei i ofu onomea e pei o ni tamaʻitaʻi ma ni alii; e faaaloalo i latou, e tauagafau, ma amio lelei; ma e latou te leʻi faapogaia lava so o se faafitauli. E avatu lava le faamālō ia te outou ona o a outou fanau talavou. Ua matou fiafia e talia a outou fanau iinei.” E masani ona oo mai faamatalaga faapenei, auā ua mafai ona vaaia e i latou o loo tatou feutagaʻi le alofa ma le faaaloalo o loo i tagata o Ieova.

³ I le isi itu, ua faaalia i faamatalaga a isi pule o faletalimalo le iai pea o se faafitauli i nisi o ē faatalalē i a latou amio po o ē foʻi o loo faaaogāsesē fale o le faletalimalo. E faapogaia e lena mea ia faafitauli ma faia ai ni faitioga sa lē tatau lava ona iai. Ua faitio mai nisi pule o faletalimalo i le soona pisapisaō ma le lē pulea o tamaiti laiti ma tamaiti talavou, ona o le lē vaaia lelei e o latou mātua a o tāʻeele i le vaitāʻele po o le faaaogāina o isi fale e faia ai faafiafiaga ma taaloga.

⁴ O le tele o faletalimalo e iai tulafono ua faatalitalia ia mālō e mulimulitaʻi i ai. Ua solia e nisi uso nei tulafono e pei o le pisapisaō ma le kukaina o meaʻai i totonu o o latou potu. Ua faailoa mai e pule o faletalimalo ia i matou e faapea, o le kukaina o meaʻai i mea sa lē faatagaina ai, ua masani ona faaleagaina ai a latou mea tōtino. E lē gata ua faaleagaina ai le tulaga lelei o potu ae ua iai pea o ni manogi leaga ua lē mafai ai foʻi ona toe tuu atu na potu e mautotogi ai nisi mo le tele o aso po o ni vaiaso foʻi mulimuli ane. E lē tatau lava ona kukaina ni meaʻai i totonu o potu seʻiloga ua iai se faatagaga faapitoa.

⁵ E tatau lava ona faia se taumafaiga moni e felagolagomaʻi atoatoa ma le pulega a le faletalimalo. E mautinoa lava tatou te lē mananaʻo e iai se faamatalaga lē manuia e fai mai e uiga i tagata o Ieova. Ona o ni Kerisiano, e tatau ona tatou faamaoni i taimi uma lava. E lē tatau ona tatou aveina ʻieafu, solo, tagaaluga po o isi “mea faamanatu” mai faletalimalo, auā o le gaoi le mea lena; e lē tatau foʻi ona tatou taʻu pepelo atu le aofaʻi o tagata ua tatou fuafua e nonofo i potu pe a taofia potu po o le taimi foʻi e ō mai ai e nonofo i potu.

⁶ Amioga Tatau i le Tauaofiaga: E tusa lava po o le ā le ituaiga o fale e faaaogā, ae e tatau ona manatu i ai o se Maota o le Malo telē i le taimi o le tauaofiaga. E tatau la ona faaalia ai laʻei ma teuga talafeagai e pei lava ona auai i sauniga a a tatou faapotopotoga. I le taimi a o faagasolo ma pe a māeʻa foʻi le tauaofiaga, e tatau i uso ma tuafāfine ona alofia le faia o laʻei lē onomea po o ofu o āʻega ia ua taatele, ia e atagia atu ai le agaga o le lalolagi ma faigatā ai ona mātaulia i tatou e matuā ese mamao lava. E tatau i tuafāfine ona faaeteete i le faiga ma le uumi o o latou sakete ma ofu ina ia talafeagai ma onomea. (1 Timo. 2:9, 10) E tusa lava po o auai i le tauaofiaga, nofo i se faletalimalo, pe e taumafa foʻi i se faleʻaiga, po o le faia o ni faatauga i se faleoloa, e tatau ona atagia atu ia i tatou i taimi uma lava o i tatou o faifeʻau a le Atua, ma ia lē faapogaia ai ona tausuai nisi.—2 Kori. 6:3.

⁷ O le a faia le papatisoga i le tauaofiaga i le taeao o le Aso Toonai. O loo faamatalaina i Le Olomatamata o Aperila 1, 1995, itulau e 30, uiga e ao ona tatou faaalia i lena sauniga. O loo taʻua ai o i tatou “e ao ona feagai ai ma le papatisoga i se uiga tāua e talafeagai ai. E lē o se taimi e vavaō ai, e faia ai ni patī, po o ni fiafiaga tetele. Ma e lē o se taimi foʻi o le a paū po o le matuā paia nauā ai.” E sili atu foʻi ona lē talafeagai mo i latou o le a papatisoina ona ofuina ni ofu tāʻele manifinifi pe valavala foʻi, e tusa lava po o alii po o tamaʻitaʻi. I lea, e tatau i tagata uma ona atagia mai ai le tāua ma le olioli o le papatisoga faa-Kerisiano.

⁸ Ua faamanatu mai e Peteru ‘la tatou amio e tatau ai i le amio lelei ma le amio Atua.’ (2 Pete. 3:11) Tau ina ia fesoasoani a tatou upu ma amioga i le Tauaofiaga Itumalo “O Ē Faia le Afioga a le Atua” i ē lotofaamaoni o loo matamata mai ia iloa ma tapuaʻi i lo tatou Atua silisili ese, o lē ua tatau i ai le viiga uma ma le mamalu.—1 Kori. 14:24, 25.